شكثر تتحمل يزينب روحچ هواي صارن يالعقيله جروحچ ياجبل من الصبر. حزن گظيتي العمر آ. يزينب آ. يزينب ----------------------------- كربله اول مصيبه ارد اعدها واحسب الصارن گبلها الكل بعدها لان يوم يعادل الدنيا بأمدها ريحة الدخان بهدومچ بعدها لسه طبع السوط فوگ متونچ وذكريات السبي بين عيونچ يوم ينعد بالف. كلف يازينب كلف آ. يزينب. آ يزينب ------------------------------------ عشتي ايام المحرم ليله ليله لو گلت ايام سوده هم قليله يوم عاشر شد عليچ انهاره حيله يوم بيه افراگ كل خل الخليله گعدتي ما بين الحرم حيرانه صفن خيماتچ فقط دخانه والاطفال مشرده. وبيچ متشمته العده آ. يزينب. آ. يزينب -------------------------------- عينچ اعله الگمر گلبچ يم الحسين وانتي وياچ بغربتچ بس هالاثنين واحد انطه اعله النهر للخوه چفين صابوا الثاني بسهم لن گلبه نصين شفتي اخوچ بحين گطعوا راسه وحيد خلاه ومشه عباسه يمه حضرت فاطمه. هاي صوره مؤلمه آ. يزينب. آ. يزينب ---------------------------------- شفتي جثت حسين يازينب سليبه شفتي روس اخوتچ مخضوبه وتريبه شفتي بالطف روحچ وحيده وغريبه بس عليل وياچ ذابحته المصيبه يمچ الفگدن ولدهن صاحن وين العزاز وعليهم طاحن راحوا اعزاز الگلب. موقفچ كلش صعب آ يزينب. آ يزينب -------------------------------------- شفتي لوعات السبي ودرب المشيتيه ومو قليل البالخرابه الانتي شفتيه شلون مدري شلون يازينب حملتيه هناك چم مره العلي صحتي ونخيتيه حاضر وياچ وتنضرچ عينه هيبتچ سر الي بينچ بينه عگب كل هاي المحن الشام صارتلچ وطن آ. يزينب. آ. يزينب ------------------------------------- بهل مصايب عشتي كل عمرچ حزينه گلبچ الينبض صبر مات بأنينه كل محب لمصاب فگدچ تبچي عينه گبرچ بغربه وتصد عينچ علينه لا تضنين انتي هسه الوحدچ الچ زوار وحمايه المرقدچ لا تخافين الهدم. انتي حراسچ زلم آ. يزينب. آ. يزينب -------------------------------------- الشاعر كريم دانه الاعرجي https://t.me/joinchat/AAAAAEXfC0WTgXR6jaIf6w قناة تهتم بنشر القصائد و الألحان @Ahbabalzahrae1 #خدمتكم شرف لنا 111 viewsنٌوُرَ آلَوُلَآء آلَفُآطٌـمِـيّ, 14:51
