BnSamy

2024-07-02 22:08:47 الجهاز المركزي أعلن إن عدد سكان مصر زاد 500 ألف خلال 144 يوم... طبعاً التعليقات عالخبر كان كلها من نوعية (يالهوي كل دا؛ يعني في الظروف دي والناس لسه بتخلف كثير؛ شايفين الظروف يعني الدولة تعمل ايه)

عدد سكان مصر 106.5 مليون نسمة لو قولنا زادوا في 144 يوم نص مليون يبقى دا مكافئ ل 1.27 مليون في السنة أي نسبة 1.2% تقريباً نسبة الزيادة...

طيب نسب الزيادة في مصر كانت ايه آخر 30 سنة؟ (هجيب أرقام البنك الدولي قبل 2010 ثم الجهاز المركزي من 2010)
سنة 1984 كانت 2.8%
سنة 1989 كانت 2.7%
سنة 1994 كانت 2.2%
سنة 1999 كانت 2.1%
سنة 2004 كانت 2.0%
سنة 2009 كانت 2.0%
بعد الثورة
سنة 2011 كانت 2.36%
سنة 2012 كانت 2.49%
سنة 2013 كانت 2.44%
سنة 2014 كانت 2.47%
سنة 2016 كانت 2.2%
سنة 2018 كانت 1.87%
سنة 2020 كانت 1.56%
سنة 2022 كانت 1.54%
سنة 2024 لو استمر كده هيبقى 1.2%

سرعة انخفاض معدل المواليد هي للنص آخر 10 سنين ويقصد هنا نسبة لعدد السكان... دائماً وأبداً فكر في نسبة مش في رقم مطلق... يعني لو بلد 10 مليون زادت مليون فكده 10% بينما المليون يساوي 1% في بلد 100 مليون ويساوي 0.1% في بلد مليار نسمة. فكر بالنسبة مش برقم مطلق.

الزيادة السكانية يعني المواليد ناقص الوفيات... دا الرقم اللي لما يوصل ل صفر ويسلب الدولة بتبقي بتنكمش؛ وغالبية دول اوروبا تلاقيها 0.2 و 0.3 و 0.4 وهكذا ولما تبص للتفاصيل تلاقي ان بس الوفيات قليلة جدا وليس المواليد مرتفعين فكده دولة بتشيخ.

المصادر من البنك الدولي والجهاز المركزي في التعليقات بالفيسبوك وتليجرام Open / Comment

2024-07-02 11:08:44 تصحي من النوم متأخر تلاقي الغاز فاصل؛ اه مهو ربنا ياخد الكائن اللي ب راس شطافة اللي قرر ان الغاز يفصل كل شهرين لو مشحنتش؛ يكون في رصيد او مفيهوش هو لازم يفصل؛ يعني ايه يا مواطن تقعد شهرين متدفعش فلوس.

طبعاً أنا اكتشفت الحقيقة المرة دي بعد ما كنت شحنت مبلغ ضخم بالعداد؛ أنا في الكهرباء بتروح اشحن عدة آلالاف واسيب العداد شهور بقي؛ فكنت فاكر الغاز كده؛ لكن لقيت اني كل شهرين لازم اشحن تاني بغض النظر عن قيمة الرصيد... بهاااايم في أشكال بشرية.

لا وعشان تكمل القصة؛ في آلية معينة لشحن الرصيد لو فصل شحن؛ مهواش تشحن وتخلص لااا..

بص يا سيدي الاول انا اتشعبط وطبعاً انتم عارفني رفيع ورشيق واقفل الغاز واحط الكارت وبعدين انزل واشحن الكارت وارجع اكرر نفس العملية تاني واستني شوية وبعدين اروح افتح الغاز عقاااب عشان انتا حيوان مشحنتش كل شهرين.

قوم ايييه؛ افتح برنامج PetroTrade اللي هو بترو شحن عشان اشحن زي ما بعمل؛ اه بترو شحن مفيهوش شحن؛ الاقيهم خير اللهم اجعله خير؛ مهي لازم تكمل غباوة؛ شالوا الخاصية بتاعة الشحن NFC ليييه متعرفش؛ لازم تتكدر وتشوف ال Quality Of Life والتقدم في مصر وتنزل تشوف كشك تشحن منه الكارت.

طبعاً ييجي اللي يقولك مهي معمولة عشان الحسابات؛ بقوله بطيخة مهو لو عاوز تعرف الرصيد مش محتاج تشحن ممكن تضيف خيار Check بس يعني احط الكارت في العداد واخش أعمل تشك من الاب يرفع الداتا... وبعدين ايه شهرين مهو الكهرباء اظن 6 شهور...

واخواتهم بتوع الأمان؛ برضك بطيخة لان تفصل بعد شهرين لو مفيش استهلاك لكن استهلاك يومي يبقي المكان مستخدم ليييه تفصل عنه

هروح الكشك أقوله عمو ممكن تشحن لي ب 5 جنية عشان شوية مخلوقات عبقرية... ربنا يستر والجماعة الملاحدة ميلقهومش ويقولك اكتشفنا حلقة مفقوده ومخلوقات لم تتطور للذكاء البشري.

بس كده دا بوست النهاردة؛ قفلوني من الكتابة وعملوا لي صداع؛ مش بحب المفاجآت وخاصة النوعية دي.

تحديث

لقيتها في فوري في الاخر كده

ملقتهاش في سهل بس لقيتها في MyFawry

كده همسح ام ابلكيشن بتروتريد المتخلف

ملحوظة
فوري خلاني شحنت 16 جنية Open / Comment

2024-07-01 21:08:07 لو حد سألني اول ما صحيت من النوم ايه اهم خبرين كنت مهتم تشوف ايه اللي حصل فيهم... هقول شوفت يا تري اخدنا هدية بنزين بمناسبة العام المالي الجديد... ويا تري نتيجة الانتخابات الفرنسية ايه.

للي مش متابع فكان الشهر الماضي في انتخابات البرلمان الأوروبي... في فرنسا اتهزم تحالف الرئيس الفرنسي ماكرون وشهد صعود قوي للتحالف الوطني اليميني المتطرف بقيادة ماري لوبان.

الرئيس الفرنسي قالك كده مبدهاش مش هينفع ممثلي فرنسا في البرلمان الاوروبي يكونوا من تكتلات مختلفة مع البرلمان الفرنسي... وبناء عليه قرر حل البرلمان والدعوة لانتخابات مبكرة... البرلمان الفرنسي أصلا لسه منتخب في 2022 وكان مفروض مكمل ل 2027.

المهم نزلوا الانتخابات الجولة الأولى إمبارح وشهدت تقدم واضح لليمين المتطرف اللي زي ما قولنا تحت زعامة ماري لوبان... ولو مش عارف مين اليمين المتطرف ومين ماري لوبان؛ بص يا سيدي عارف ترامب في أمريكا؛ طيب فاكر شبيهة بوريس جونسون انجلترا؛ اهي ماري لوبان اختهم الثالثة في الرضاعة .

دا يا أخي الثلاثي بيكرهه المهاجرين رغم ان ترامب جده مباشرة ابو ابوه الماني(كنت كاتبها انجليزي) ؛ وبوريس جونسون جده كان وزير عثماني بعد الاطاحة بآخر خليفة ذو سلطة (عبد الحميد الثاني) ؛ وماري لوبان بقي جدتها مولوده في اسكندرية

أما التوجه السياسي لليمين المتطرف عشان احنا في مصر معندناش احزاب ولا توجهات سياسية ولا انتخابات فمنعرفش... فدول بتوع الحرية المطلقة للفرد + العنصرية ضد الغريب... حاجة كده شبه الكيميتيين او جروب سكان الرحاب مع الاغراب.

المهم نتيجة الانتخابات إيه في الجولة الأولى...

حزب اليمين المتطرف التجمع الوطني بنسبة 33.5% ولو الاعادة كده هيبقي التيك توكر جوردان بارديلا رئيس الوزراء (اه رئيس الحزب تيك توكر وبيطلع لايفات ومجابش 29 سنة) والمهم دي أبرز ملامح توجهات الحزب

تقليل الضرائب وخاصة على الكهرباء والبنزين تبقي 5% مقابل 20% حالياً وعدم الاعتراف بفلسطين واعادة ضريبة الثراء وضد قانون الأرض (منح الجنسية للمواليد علي أرض فرنسا)... طيب هيجيب فلوس منين لما يقلل الضرايب؟ عادي هيقلل الانفاق عالمواضيع اللي ملهاش لازمة في رأيه زي ميزانية الاتحاد الأوروبي ومشاريع البيئة وكمان مفيش اسلحة بعيدة المدي ولا قوات تروح لاوكرانيا وطبعا هيرحل المهاجرين فيوفر الفلوس اللي بتتصرف عليهم. اه ونسيت عاوز يقلل سن المعاش اللي رفعه ماكرون ل 64 بحيث ينزل ل 62 ثم 60 (تعرفوا ان مصر رفعت سن المعاش تدريجي وهيبقي 65 أي حد مولود بعد 1975 معاشه 65 سنة كنتم تعرفوا دا...)

المركز الثاني الجبهة الشعبية الجديدة 28.1% ودول العكس تماماً يعني اليساريين؛ دول بتوع فرض ضرايب الأثرياء وضريبة الارباح الاستثنائية... وفي نفس الوقت رفع الأجور وربط الحد الأدني مع التضخم بحيث يزيد مع زيادة التضخم؛ ونحافظ عالبيئة ونحمي الأقليات المهاجرين وحتى نعترف بفلسطين...

حزب معاً ودا بقيادة البسكلته جابرييل أتال رئيس وزراء فرنسا الحالي وحصل علي 20.7% ودا حزب وسط يعني استقرار الوضع كما هو عليه وفرنسا الحالية

الحزب الجمهوري بتاع الرئيس الفرنسي بحصة 10% أيوان 10% بس هو اكمنه حزب وسط برضك فمتحالف مع معاً ومعين رئيسه ك رئيس وزراء فكده تعتبر الرئيس معاه 30%

الانتخابات دي مهمة عشان هتوصل اليمين المتطرف للسلطة ( الحكومة مش الرئاسة) يعني فرنسا العنصرية دي كانوا وسط تخيل بقي لما يبقوا يمين متطرف دا هيطلع عين اخواتنا مسلمي فرنسا ومهاجري الجزائر وقارة أفريقيا... وكمان اليمين المتطرف في كل مكان في العالم صديق مع كل الدكتاتوريين ومش بتاع حقوق الانسان ولا حقوق البيئة وحتي مش هواة حقوق البسكلته ولا حقوق أي أقليات .

أوروبا كان بيحركها رباعي؛ انجلترا العجوزة ودي خرجت بالبريكست... وألمانيا اقتصادياً وفرنسا عسكريا وسياسياً (المانيا ملهاش في البطيخ وكبيرها شجب وادانة ولا جامعة القلل العربية بس فرنسا بتتدخل عسكريا زي أمريكا) ورابعهم ايطاليا عشان هي جايه كده معاهم دول كبار أوروبا فتغير فرنسا هيشقلب أوروبا.

نتابع سوى بقي نتائج جولة الاعادة يوم 7 يوليو ونخرج شوية من قوقعتنا Open / Comment

2024-06-30 12:25:51 عشان كل شوية حد يبعت لي ايه حكاية اتفاقيات مع شركات أوروبية في مجال الطاقة النظيفة والهيدروجين اللي أعلنوا عنهم إمبارح..

اللينك التالي دا بوست من 2022 بشرح ايه الهيدروجين الاخضر وإيه الأزرق وايه الرمادي وكمان بقولكم مصر قالت اتفاقيات ب 117 مليار دولار وقتها

https://t.me/BnSamyPosts/813

فأنا مش هقعد أحكي كثير روحوا شوفوا البوست القديم واعرفوا قصة الهيدروجين؛ بس عندي طلب واحد بس للي هيقرأ البوست القديم.

هتلاقوني بقول عاوز هيدروجين رمادي بسيطة عندنا غاز كثير نحرقه ونعمل طاقة وحرارة ونطلع هيروجين رمادي... عاوزين هيدروجين أزرق بسيطة عندنا كهرباء نستخدمها..

سامحوني يا جدعان وقت البوست 2022 كان عندنا كهرباء وعندنا غاز؛ مهو أنا مش منجم وبدرب الودع ودجال يعني وهعرف ان بعد شهور من البوست هنبدأ تخفيف الأحمال لعدم وجود غاز هعرف ازاي ان قطاع الغاز المصري هيدخل الانعاش لأسباب لا داعي لذكرها.

اه بالنسبة المشروعات الطاقة المتجددة فدي بالفعل موجود عدة مشاريع عملاقة زي مشروع أبو ظبي بالتعاون مع انفنتي (عائلة منصور) عشان يعملوا محطة رياح (سوري كنت كتبتها شمسي غالبا عشان حران) مهولة قدرتها تفوق ال 4 مفاعلات نووية مع بعض (هتطلع 10 جيجا) مفروض المحطات دي هتاخد 6 سنين عشان تتعمل بتكلفة 10 مليار دولار هتدفعها ابو ظبي/منصور... وهيتم بيع الكهرباء للحكومة بالدولار عشان مش منطقي هما يتكلفوا دولار ويبيعوا بالجنية... ففي عدة مشاريع كده طاقة نظيفة ومتجددة والحكومة هتشتري منهم الكهرباء بالدولار وتبيعها للشعب بالجنية .

بس يا سيدي وصباح الفل وكل عام وانتم بخير النهاردة نهاية العام المالي 23/24 للحكومة وبكره بداية العام المالي 24/25... واللي فات حمادة واللي جاي سطح الواد حمادة . Open / Comment

2024-06-29 17:40:04 نهاية 2022 كتبت بوست بعنوان الرداءة وحققت وقتها 1300 شير وكنت بتكلم عن تبعات الوضع الاقتصادي عالمجتمع واننا هنتحول للرداءة في كل شيء وأحد النقاط قولت هتزيد السرقات... صراحة متوقعتش اشوفها بالسرعة دي

تاجر وصديق عزيز حصل معاه موقف إن عصابة طلبوا من عنده منتجات قيمتهم فوق 70 ألف جنية وبعت مندوب من عنده يسلمهم وبالفعل فرد العصابة فتح له باب العمارة واخد منه المنتجات ودخل يجيب الفلوس؛ اتاري العمارة دي مش عمارته وهو بس جه قبله دخل ورد الباب اكنها عمارة عيلة وفتح له... والحرامي نط من العمارة من وراه ل عربية منتظراه وطار (ما سبق عرفناه من الكاميرات بالمنطقة).

لو في حد يعرف يساعد في الموضوع دا ممكن يقولي عشان الصديق دا يهمني

قبلها ب ايام كنت عند صديق فاتحكي لنا عملية نصب برضك على مندوب توصيل لاب توب من شركة عميله اخدت الاب توب وهوبت صوتت وبيتعدي عليا والناس تتلم؛ المندوب جري طبعا وشكراً خلاص.

دا غير عصابات شغالة في مناديب شركات الشحن؛ معاهم أرقام عملاء وعناوين يخشوا المواقع بتاعك الشركات اللي عارفينها لتوصل معاهم يعملوا طلبات بالمنتجات اللي يعرفوا يصرفوها... لو الشركة شحنت خلاص بقينا عارفين ان الطلب دا هو اللي هيتسرق خده وحط اي عبط في كيس الشحنة وغلفها عادي تاني وقول لم يستدل العميل.... دا حصل معايا مش بضرب مثال خيالي لعميل طلب اوردر من الجونة من الموقع شحناه العميل مستلمش بنكلمه قال انا معرفش حاجة عن الطلب دا ومطلبتش حاجة. رجع الطلب لينا لقيناه مسروق.. طبعاً كلمنا شركة بوسطة وقتها فالنتيجة هي (مش بنعوض علي سرقات؛ اعمل تأمين علي شحناتك او اقفل الشغل معانا)

للتجار : لجأت لحل وهو جبت سيكورتي ستيكر من بره مصر بحيث أميز الكيس بتاعي بيه فالمندوب ميعرفش يبدل الكيس لانه مش هيعرف يجيب السيكورتي؛ لكن عادي بقوا يفتحوا الكيس ويسرقوا المحتوي معتمدين ان سياسة شركة بوسطة ان المندوب من حقه يسرقك عادي ومش بنعوض حد... فوقفت تعامل مع بوسطة.

لو فاكر إنك لو بتشتري من مخازن أمازون ونون هيكون الوضع أحسن... من 4 أيام صديق جالة حاجات شاريها من أمازون؛ شاحن ب 1600 جنية طالب منه 2 وكابل... أمازون شحنتها مع بوسطة... مش محتاج اوضح ايه حصل اخدوا شاحن من ال 2 واخدوا الكابل من جوا العلبة... يعني هياخد شاحن بدون كابل... صديقي كلم أمازون اعتذروا له وعوضوه.

مش عاوز اطول في بوست حزين كده بس الموضوع بقي اسرع ما كنت اتخيل؛ أنا بطبيعتي بحب ارسم سيناريوهات واللي بيحصل في مصر تقليدي واللي شاف أمريكا الجنوبية ومراحل ما بعد عقيدة الصدمة فيهم حصل ايه؛ بس السرعة فوق توقعاتي وخاصة ان أنا مش بحكي مواقف بعيدة؛ المذكور بعض مواقف اخر شهر بس واللي وصلني.

وجود القانون النافذ مهم قوي في فترة نا يسمونه الاصلاح الاقتصادي لإن الفقر + الجهل + غياب الدين فكده معادلة سحرية توديك حتت مش ظريفة خالص. عاوز اقولكم إن صديقي بداية البوست اللي سرقوه عادي لسه مشغلين تليفونهم وبيرد حد يقوله انتم مين معرفكمش ولا عمري كلمتكم؛ عاااادي جداً... طبعا لو في دولة وقانون مكانش دا حصل لكنهم عصابة عارفه هي عايشة في ايه... وعادي هتزداد الجرايم دي اضعاف مضاعفة... واللي خايف؛ يروح الكومباوند فيه أمان .

بوست فضفضة وفي جزء تاني منه خليه لاحقاً...

بوست الرداءة القديم

https://t.me/BnSamyPosts/825 Open / Comment

2024-06-28 18:06:48 من كام يوم Skytrax نزلت تصنيفات 2024 بتاعتها والمواقع المصرية فرحانه جدا؛ هقولك ليه بس كمل معايا.

سكاي تراكس دا أشهر موقع تصنيف لمجال الطيران؛ بيعتمد في التصنيف بتاعه على استطلاع رأي ضخم ومكتوب تفاصيله؛ مش بيقوله رأيك في شركة كذا تقول حلو؛ لالا خالص في تفاصيل كثير زي ايه اخبار موقع الشركة؛ طيب وقت التشكن ان؛ طيب اسلوب الموظفين؛ طيب كراسي الطيارة؛ طيب سرعة استجابة ال ضيافة للطلبات؛ طيب الاكل وووو... اسئلة كثير بحيث يقللوا هامش الخطأ.

المهم بقي نزلوا تصنيف 2024 وهكتفي بذكر تصنيفات المنطقة بتاعتنا يعني هكتب شركات طيران الشرق الأوسط وافريقيا وهحط بين قوسين تصنيف العام السابق 2023.

القطرية 1 ( 2 سابقاً)
الإماراتية 3 (4 سابقاً)
التركية 7 (6 سابقاً)
الاتحاد 19 ( 13 سابقا)
السعودية 20 ( 23 سابقاً)
العمانية 25 ( 27 سابقاً)
الاثيوبية 36 (35 سابقاً)
الخليجية 41 (32 سابقا)
ناس 48 (51 سابقا)
المغربي 55 (53 سابقاً)
فلاي دبي 67 ( 70 سابقا)
جنوب افريقيا 69 (72 سابقاً)
الكينيا 77 ( 73 سابقا)
رواندا 81 (90 سابقاً)
مورشيوس 85 (78 سابقاً)
مصر للطيران 88 (110 سابقاَ)
الكويتية 93 (60 سابقا)
العربية 94 (88 سابقا)


علي مستوي المطارات بتكون علي مواعيد الهبوط والإقلاع ودقتها وسرعة الإجراءات ونظافة المطار واسلوب العمال (كل سنة وانتا طيب وحمد لله عالسلامة يا بيه) واللغات يعرفها الموظفين والامن وموظفي الهجرة والمواصلات العامة اللي بتروح المطار والتاكسي وتأجير السيارات وخريطة للمطار والافتات و الشاشات اللي تعرفك تروح فين وجودة الاونج وأماكن الانتظار للأفراد والسيارات والخدمات وتنوع الأكل والمحلات في المطار وكده. ودا تصنيف مطارات الشرق الأوسط وأفريقيا.

الدوحة قطر 1 (2 سابقاً)
دبي الإمارات 7 (17 سابقاً)
إسطنبول تركيا 10 (6 سابقاً)
المنامة البحرين 22 (26 سابقاً)
الرياض السعودية 35 (27 سابقاً)
مسقط عمان 40 (42 سابقا)
المدينة السعودية 50 (52 سابقاً)
الدمام السعودية 51 (44 سابقاً)
كيب تاون جنوب أفريقيا 54 (47 سابقاً)
جدة السعودية 56 (41 سابقاً)
ابو ظبي الإمارات 62 (87 سابقاً)
الملك شاكا جنوب أفريقيا 72 (61 سابقا)
جوهانسبرج جنوب أفريقيا 83 (75 سابقاً)

مطار القاهرة بره ال 100 الأوائل وترتيبه ال 9 أفريقيا بعد ثلاثي جنوب أفريقيا السابق ومطارات كازبلانكا ومراكش من المغرب ومطار موريشيوس ومطار أديس أبابا من إثيوبيا ومطار كيجالي رواندا.

دي كانت نتيجة سكاي تراكس 2024؛ طيب هتقولي عندنا ليه احتفلوا بيها... دا عشان مصر للطيران أخد لقب 2 أحسن مطار تحسن الاداء بتاعه في أفريقيا (طلعنا من 110 لل 88 يعني 22 مركز) واخدنا المركز الأول في أفريقيا في تحسن الخدمات...

للتوضيح بس لما تبقي سايق علي سرعة 50 وبعدين تروح ل 100 فكده انتا زودت سرعتك 50... واحد تاني سايق علي 200 زودها ل 220 فهو زود سرعته 20... انتا كده المركز الأول في زيادة السرعة لكنك مش الأسرع... كده وضحت. فمصر للطيران أحسن واحدة في التحسن والتطور في قارة أفريقيا.

مش معني دا انا كونك الأفضل في التحسن حاجة قليلة؛ بالعكس دا شيء حلو جداً ومفروض لو استمرينا عليه لسنوات نبدأ نشوف خدمة كويسة تنافسية في مصر للطيران تشجعنا نركبها.

بالنسبة لمطار القاهرة والتبعية كل مطارات مصر فهي خارج القائمة بس مفروض خلال العام المالي القادم هيعلنوا عن توقيع عقود ادارة المطارات المصرية من شركة عالمية غالباً إماراتية؛ هتطور وتنظم بقي وتعمل شغل فنادق في المطارات ونشوف حاجات حلوه بدل موقف الطيارات المسمي مطار بتاعنا دا... وهنا هنشوف مطار القاهرة ضمن التصنيفات العالمية مستقبلاً.

اللي عاوز يشوف التفاصيل وباقي المطارات يكتب Skytrax في جوجل ويعيش Open / Comment

2024-06-28 09:28:47 اللحمة واللبن في خطر

يعني مش كفاية هولندا عاملة مشروع بقالها 3 سنين بتكلفة 25 مليار يورو هدفه تقليل والتخلص من نصف الثروة الحيوانية وتحديداً الأبقار من أجل الحفاظ على البيئة وعاملين خطة اسمها 3 بقرات في الهكتار (10 الاف متر مربع)

وجت إمبارح الدانمارك أعلن عن أول ضريبة بقرية قالك اعتباراً من 2030 كل مزارع عنده بقر هيدفع 300 كورونا دانمركية (43 دولار) ضريبة عالراس وتفضل تزيد لغاية 750 كرونا (107 دولار) بحلول 2035.

انجلترا برضك شغالة علي خطط لكن مش زي هولندا خلاص بقت واضحة؛ لكن هدفهم برضك تقليل الثروة الحيوانية بهدف الحفاظ على البيئة.

للي مش فاهم البقر يعتبر ماكينة إصدار غازات دفيئة وأهمها غاز الميثان اللي هو بيعمل احتباس حراري؛ فالبقرة قاعدة تطلع ميثان ليل ونهار بالإضافة الي انها سفاحة مياة... انتاج 1 كيلو لحمة بيحتاج 15000 لتر مايه... (البصمة المائية للحمة مش بتشرب الماية دي ولو مش فاهم يعني ايه بصمة مائية دور في بوستاتي القديمة. فالبقرة مخلوق يخلص لنا الماية ويدينا ميثان .

عامة خطط هولندا والدانمارك وانجلترا وكل الدول دي على ادها... مصر بقي كانت في 2018 عندنا 17.5 مليون رأس ماشية جالنا وباء خلاهم 8 مليون (حد قالي الاستيراد كمان خلي المربي يخسر فبطل يربي) ومحدش حس عادي؛ لان ارتفاع الاسعار سببه جشع التجار . الارقام دي بتاعة الجهاز المركزي للتعبئة والاحصاء مش جايبها من بيتي فالمعترض يروحله.

فمصر تخلصت ذاتياً من نص الابقار والماشية عامة وحافظنا عالكوكب من التلوث ... طبعاً في خطط كثير فنكوشية لتربية الأبقار بس بيكون دايما ردي... تحب تستورد العلف بالدولار اللي مش موجود ولا تزرع العلف في مصر بالماية اللي بتنقص برضك... مهي البصمة المائية معظمها في العلف فاما تستورده او تزرعه... عشان كده كل المشاريع دي فشلت.

المهم بقى انا ك شخص عاشق الألبان ومنتجاتها واول 20 سنة في حياتي بعد الفطام كان كل يوم الصبح لازم ماج كبير لبن.. وثلاجتي لازم يبقي فيها 5+ نوع جبنة دا غير الزبادي فأنا مش زي الجيل الجديد اللي طالع ترند جبنة كثير؛ لا انا البيض بحط عليه انواع جبنة من ايام مبارك... مدمن قديم. دلوقتي لما الناس بتوع البيئة دول يتخلصوا من البقر ويزيد أسعاره؛ أنا هعيش إزاي عارف في مزارع اللحمة وكنت كتبت بوست عنها من سنتين بعنوان (اللحوم المزروعة) ابحثوا عنه للي حابب... بس اللبن ايه بقى هنجيب لبن مزروع هو كمان زي اللحمة

يعني مصر هتبطل تزرع قصب ومش هيبقي في عصير قصب بالمستقبل ولا نمص قصب؛ واللبن هيقللوا هو كمان... الاجيال القادمة دي هتعيش عالحبوب غالباً

مجبتش سيرتك يا استراليا ياللي بتعمل اعدامات بالرشاشات للجمال عندك Open / Comment

2024-06-27 12:17:44 تاجيل ل 1 سبتمبر عشان متفقين مع الصندوق عالزيادة
وبعثة الصندوق هتيجي بداية سبتمبر تشوف ايه تم وتقر الدفعة الجديدة قبل 15 سبتمبر

عامة قرار واضح ل امتصاص الغضب الشعبي؛ وغالبا هيحصل زيه للبنزين او الزيادة التقليدية 10% يعني 1.5 جنية عكس المفروض قفزة لتعويض فارق التعويمات (فعليا مستهدفين 25+ جنية نهاية 2025) Open / Comment

2024-06-26 08:07:23 تخيل معايا 3 سقطوا في امتحان؛ جابوا نفس الدرجة بالظبط؛ لكن واحد سقط عشان مذاكرش وواحد سقط رغم انه ذاكر كويس لكنه مرض وجاله حمي امتحن وحرارتة 40 والثالث ذاكر كويس بس حصله حادث فوصل الامتحان من نصه فملحقش

نظرياً الثلاثة زي بعض لكن هل ينفع نقول الثلاثة فعلا ساقطين لنفس السبب؟ هل ينفع الأول يقول مهو فلان (اللي سخن) سقط زيي؟

اهو دا اللي بنعمله في مصر مع قطع الكهرباء؛ بنشوف بلد فيها الكهرباء قاطعة ونقول اهو سقطوا زينا... طيب هل نفس السبب؟

مصر عندها محطات قادرة على انتاج كهرباء تكفي مصر وليبيا والسودان وفلسطين والأردن مع بعض... لكن المحطات مقفولة عشان مفيش غاز.

الدول الثانية بقي عندها محطات شغالة بالسعة القصوي لكن الحرارة العالية بتقلل السعة القصوي للمحطات فبيحصل عجز.

فهل كده الاثنين زي بعض!!! اللي قاعد جمب محطات مش شغالة بيهوي نفسه زي اللي مشغل المحطات بس الحرارة قللت كفاءتها .

لا والانقح ان رئيس الوزراء بيقولك أصل وقف قطع الكهرباء هيكلف مصر 1.2 مليار دولار وممكن يزيد... يعني بلد بحالها اتشقلبت ومصانع وقفت وناس تضررت عشان 1.2 مليار دولار... يا عم قول 2 مليار دولار.

عارفين البنوك المصرية والمركزي دخلهم كام من ساعة التعويم؟ راس الحكمة وهوت ماني وتنازلات مصريين يعني موارد غير تقليدية؟ اللي بيقول 25 مليار دولار غلط... 30 مليار دولار برضك غلط؛ 35 غلط؛ 40 مليار دولار غلط؛ 45 مليار دولار غلط؛ 50 مليار دولار برضك غلط... دخلها ما يقارب 60 مليار دولار... 24 مليار راس الحكمة وتقديرات ان اكثر من 30 مليار دولار هوت ماني؛ علي 3-4 مليار دولار تنازلات المصريين.

دولة دخلها 55 مليار دولار تنام من المغرب عشان منسحبش 1 او 2 مليار دولار؟ مصانع بتصدر تقف وسلع يزيد سعرها وسلع تتلف وناس بتشتغل مبرمجين بيحققوا دخل دولاري. محلات تقفل بتدفع ضرايب ووو... دي مفروض كده رسالة للمستثمرين توضح لهم مستوي التخطيط في مصر ايه

دا أنا لسه كاتب بوست بقول أهم حاجة اعادة الثقة؛ فتضرب مفك في مفهوم الدولة بتصريح ان مشكلتنا في مصر هي مشكلة مادية عشان ندبر ال 1.2 مليار دولار . خلى كذا حد يقولي الحكومة خلاص مبقاس معاها دي معجزة في مليار دولار وشكلنا خلال ايام رايحين لل 60 و 63 جنية يالهوي عالتخطيط. نقعد احنا شهر نكافح اشاعات ونقول عندنا استقرار دولاري سنتين؛ وتصريح واحد يضرب كل شيء

مشكلة مصر في الكهرباء هي عدم قدرة انتاج؛ صراحة كده لو الكهرباء وقفت قطع بعد 3 اسابيع ازعل متفرحش؛ دا معناه ان المحطات إشتغلت مازوت... تشغيل المحطات مازوت يعني كإن معاك مرسيدس S وقررت تمونها بنزين 80 وتقول دا حل عبقري للتوفير... برافو عليك جابت موتور وعمرها الافتراضي راح.

ولا اقولك؛ دا احنا أصحآب المثل الشهير عيشنا النهاردة وموتني بكره... البقاء لله Open / Comment

2024-06-25 15:22:54 خلاص هانت؛ الراجل قال من الاسبوع الثالث... انا مواليد 23 يوليو فهو قال يسبقكم كلكم ويقولي كل سنة وانتا طيب يا بن سامي ومش هنقطع الكهرباء تاني بمناسبة عيد ميلادك

وقال ولا حتي شهر اغسطس

هو بس اسبوعين كمان قطع وخلاص معلش

وقال ان القطع الحالي سببه ان حقل تمار الإسرائيلي خرج من الخدمة عشان شركة شيفرون قفلته لانه ظهر في فيديو الهدهد بتاع حزب الله... الحقل بيزود مصر 10% من استهلاك محطات الكهرباء من الغاز تقريباً

طبعا هو موضحش لكنه قال ان حقل قي دولة مجاورة خرج من الخدمة؛ مهو مش هنقول للناس اننا منورين بالغاز اللي جاي من ولاد ال....


ملحوظة
مش هيحصل ما سبق Open / Comment