2021-09-11 09:29:07
سایین دوستوم «آیدین روشن»ین عزیز خاطیره‌سینه
#ووقار_نعمت
اوزون شعرلری ویری چکمز
قیسا شعرلری سئوردی
عؤمرو کیمی قیسا
و گؤزل!
عؤمرونو شعره آداییب
قیسا شعرلره وئردی!...
قیسا گؤزل شعرلره راستلایاندا
حدسیز سئوینردی
روحو اوجالیر، آرینیردی سانکی
و اونو پایلاشماغا تله‌سیردی
گؤروشه دؤزمه‌میش کیمی
زنگ ائله‌ییب
اونلاری ائرته‌دن اوخویاردی منه
حیاتین
سون آنلارینی یاشار کیمی‌یدی بیر تهر
اؤنومه شعر چیچک‌لری سَردی
حیاتدان
حیاتین اؤزونو دردی!..
درگی درنکلرده
فرزانه یایین ائوینده
گؤروشردیک چوخو زامان
پیادا یورور سوکاکلاری
اوردان- بوردان دانیشاردیق
دونیادان قوپموش کیمی‌یدیک بیر تهر
بو اورتاق سوچوموز ایدی بیزیم
«اورتاق سوچلاریمیز»ی چیخاراندا
دویونجا گولموشدوک اونا قوناراق
سن‌می؟!
سوچمو اولان؟!
هئچ راستلادینمی اونا بیر کؤشه‌ده؟!
نه ایسه،
من تکیمه «شیمیران‌نو»دا قالیر
او دا بیر ائو کیرالامیشدی «صفا»دا
ایکیمیزینکی ده بنزه‌ر
ایکیمیزینکی ده تؤکه-سئچه
ایکیمیزینکی ده نظیم‌سیز
اؤز قویدوغوموزو اؤزوموز تاپا بیلمزدیک
هردن بیرگه قالاردیق
من بیرآز ایچیمه قاپالی
آما او عکسینه دیشا آچیق ایدی
چوخ دانیشاردی
گؤزلرینه باخماسایدین دئمزدی سؤزلرینی
؛ «آیدین جان، واللاه قولاغیم سنده‌دیر سؤزونو دئ» دئیه‌ردیم من!
اورکدن گولوب؛ «یوخ سارییانمازسان» دئیه‌ردی!
بیر سؤیوش ده قاتاردی آرخاسینا
من، تکجه دینله‌مک دئییل،
شعریمین آنالیزینی
سؤزلریمه اولان آلقینی
گؤزلرینده گؤرمک ایسته‌ییرم! -دئیه‌ردی
بو قده‌ر ده بیر حساس روحا مالیک ایدی البت
الیمده هر نه اولسا بوراخیب
اونو دینلردیم
گؤزلرینده قیمیلدانان جوجوقسو سئوینج
و هیجانی
اوره‌ییندن اوزونه ووران تمیزلییی
و شعری!..
دوز شعری!..
دوغرو شعری!..
شعر چوخ اوخودوغونا گؤره
ادبی اوغورلوقلاری
فیریلداق
و اویونبازلیغی
اینجه‌لییینه دویار و آنلاردی
آما اوزونه گتیرمز
قانینی قارالتمازدی
گولوب کئچردی ساده‌جه!..
دؤشونه دؤین آدام دئییلدی
آما دؤشو آلتینداکی اوره‌یی
کیمسه داشی‌یامازدی!..
سئوگی‌سی ده اؤزو کیمی
اؤزگو و تمیز ایدی
سئودییی بیر قیز واردی هم ده
منه اوندان دانیشاردی
آدینی
آرالاریندا اولوب کئچه‌نی
اونا سؤیله‌دیکلرینی
اونون تاویرلارینی
گوله-گوله
سئوینج دولوسو
آغیز دولوسو سؤیلردی
جیکیندن-بؤکونه هر شئیی دانیشاردی
دانیشدیق‌لارینی یاشار
یاشادیقلارینی دانیشاردی
اوشاقجاسینا تمیز بیر قلبی وار ایدی
حسد آپاراردیم هردن او صافلیغا
آه نه قده‌ر تمیز هم ده!..
بو چاغ‌دا
چیراق ایشیغینا
گونش ایشیغینا
دونیانی گزسن،
تاپیلمایاجاق قده‌ر تمیز!..
قیسا شعر یازدیقدا
اونلاری منه اوخویار
باخیشیمی آلاردی
شعرلرینده
بیر بنؤوشه حوزنو
بیر نرگیز اوتانقاجلیغی
بیر جوجوقسوو
صافلیق اویالانیردی سوره‌کلی.
بعضن ده ائله-بئله‌سی یازدیغی
شعرجیکلری ده اولاردی
اونلاری منه اوخودوقدا:
«آیدین جان،
سن آللاه ییغیشدیر،
اؤزونو ساریما،
آخی بونون هاراسی شعردی؟!
بو فانتئزییالار هر کسه یاراشسا دا
سنه یاراشماییر» دئیه تپکی گؤسترردیم.
گولردی
چوخ گولردی
بیر داها اوخویوب گولردی
اوغونوب گئده‌ردی!
«منی دولامیسان می؟!» دئیه سوراردیم.
«یوخ ووقار جان، -دئیه‌ردی!..»
سنین رییاسیز نظرلریوه گولورم
یاخشی‌کی وارسان!
قارپیزدی؟! دئیه سوراردیم
یوخ، قیرادی، -دئیه‌ردی، خوجا قیراسی!..
بیر گون ده منه:
گئری وئر منزیلینی
گل بیر منزیلده قالاق دئدی!
ایکی تنبل،
ایکی آوارا
ایکی ده‌لی
ائوی چیینینده ایکی قومبارا!...
آما گئج‌دی نه یازیق کی
من
تهرانی بوراخماغی قرار آلمیشدیم
او ایسه
الی تزه-تزه یاتیردی بو شهره
اوف آیدین جان!
کئشکه
بیر ایکی ایل ده بیرگه قالسایدیم سنینله
نه‌لری یاریم بوراخدیق؟!
ادیب جان‌سئوه‌رله،
واقف صمد اوغلونو ایشلهیهجهیدیک
نه واختیمیز اولدو بونون اوچون
نه ده پولوموز!..
من تهرانی بوراخدیم
سن دونیانی!..
هله-هله اونوتمام کی دوستوم منیم،
بیر «ساعات» ایشلهیهجهیدیک
سون باهاردان
باهارا ایش‌له‌یه‌سی!
بیر ده، بیر «سیقارئت» ایشلهیهجهیدیک
سون پوکوندان باشلایاسی!
وای به!..
«یاز شعرلری» ده قالدی به اولان
حالا قولاغیمدایکن سسی!...
__________________@Chiragh1
979 viewsedited 06:29
Ç
