2022-08-02 10:23:53
ئەیمەن زەواهیری سەرکردەی قاعیدە کوژرا! دەرئەنجامەکانی ئەم تیرۆرە چی دەبێت؟بەپێی ڕاپۆرتی هەواڵەکانی جیهانی ئیسلام؛ جۆ بایدن سەرۆکی ئەمریکا لە هێرشی ئەم دواییەی فڕۆکە بێفڕۆکەوانەکانی ئەمریکا بۆ سەر پایتەختی ئەفغانستان، کوژرانی ئەیمەن زەواهیری، سەرکردەی گروپی تیرۆریستیی قاعیدەی ڕاگەیاند.
لە میانەی کۆنگرەیەکی ڕۆژنامەوانیدا لە کۆشکی سپی، جۆ بایدن، سەرۆکی ئەمریکا رایگەیاند کە ئەیمەن زەواهیری، سەرۆکی ڕێکخراوی قاعیدە لەلایەن سوپای ئەمریکا و دەزگای هەواڵگری ناوەندی (CIA)ـەوە کوژراوە. ئۆپەراسیۆنی تیرۆری زەواهیری ڕۆژی شەممە ٣٠ی تەمووز لە سێ شوێن لە شاری کابوڵی پایتەختی ئەفغانستان ئەنجامدرا.
لەم کۆنفرانسەدا بایدن سەبارەت بە چۆنیەتی ئەنجامدانی ئۆپەراسیۆنی تیرۆرکردنی زەواهیری وتی: زەواهیری رابردووی کوشتن و توندوتیژی دژی هاوڵاتیانی ئەمریکی لەدوای خۆیدا بەجێهێشت. ئێستا دادپەروەری ئەنجام دراوە و ئەم تیرۆریستە چیتر بوونی نەماوە. دەزگا هەواڵگرییەکانمان لە چەند مانگی ڕابردوودا شوێنی حەشاردانی ئەیمەن زەواهیرییان دۆزیەوە. بۆ ئەوەی لەگەڵ ئەندامانی خێزانەکەی بێت، ڕووی لە کابوڵ کردبوو. دوای بە وردی لێکۆڵینەوە لە بەڵگە پشتڕاستکراوەکان سەبارەت بە شوێنەکەی، فەرمانم بە هێرشەکە دا.
لەم بارەیەوە میدیاکانی ئەمریکا لە زاری بەرپرسانی ئەم وڵاتەوە ڕایانگەیاندووە کە زەواهیری لە باڵکۆنی شوێنی حەشاردانی لە ناوچەی شیرپور لە ناوەندی شاری کابوڵدا بووە کاتێک فڕۆکە بێفڕۆکەوانە ئەمریکییەکە دوو مووشەکی ئاراستەی ئەو شوێنە کردووە. ئەندامانی خێزانەکەی لەم بینایەدا بوون، بەڵام زیانیان پێنەگەیشتووە و لەم هێرشەدا تەنیا زەواهیری کوژراوە.
زەبیحوڵڵا موجاهید وتەبێژی تاڵیبان لە بەیاننامەیەکدا لە کاردانەوە بەرامبەر بەم هێرشەدا نووسیویەتی، هێرشی ئەم دواییەی کابوڵ بۆ سەر خانوویەکی نیشتەجێبوون لە ناوچەی شیرپور ئەنجامدراوە. ناوبراو ئاماژه‌ی به‌وه‌شداوە: سروشتی ئه‌م ڕووداوه له سه‌ره‌تادا ڕوون نه‌بووه. دەزگا ئەمنی و هەواڵگرییەکانی ئیمارەتی ئیسلامی (تاڵیبان) لێکۆڵینەوەیان لە ڕووداوەکە کردووە و بۆیان دەرکەوتووە کە هێرشەکە لەلایەن فڕۆکە بێفڕۆکەوانەکانی ئەمریکاوە ئەنجامدراوە.
ئیمارەتی ئیسلامی ئەم هێرشە بە هەر هۆکارێک ئەنجامدرابێت ئیدانە دەکات و بە پێشێلکردنی ڕوونی بنەما نێودەوڵەتییەکان و ڕێککەوتنی دەوحە دەزانێت. ئەم کارانە ئەزموونە شکستخواردووەکانی ٢٠ ساڵی ڕابردوو دووبارە دەکەنەوە و دژی بەرژەوەندییەکانی ئەمریکا و ئەفغانستان و ناوچەکەن. دووبارەکردنەوەی ئەم جۆرە کارانە زیان بە دەرفەتەکانی ئێستا دەگەیەنێت.
ئەیمەن محەممەد ڕەبیع زەواهیری سەرکردەی گروپی جیهادی ئیسلامی میسر بوو، کە دوای گەیشتنی بە ئەلقاعیدە وەک کەسی دووەمی ئەم گروپە تیرۆریستییە لەلایەن وڵاتانی رۆژئاوا و بەتایبەت ئەمریکاوە خرایە لیستی تیرۆرەوە. دوای کوژرانی ئوسامە بن لادن لە ساڵی ٢٠١١، زەواهیری سەرکردایەتی قاعیدە و ئۆپەراسیۆنەکانی ئەم گرووپەی گرتە ئەستۆ.
زەواهیری هەر لەسەرەتای دامەزراندنی داعش دژایەتی ئەم گروپەی دەکرد و رەنگە یەکێک لە هۆکارەکانی کوژرانی ناوبراو، دروستبوونی ناکۆکی لە نێوان ئەندامانی باڵای قاعیدە و گەیشتنی ئەو هێزە ناڕازیانە بۆ ڕیزەکانی داعش لە ئەفغانستان و وڵاتانی دیکەی ئاسیای ناوەڕاست بێت. تیرۆرکردنی زەواهیری کێشە بۆ ئەمریکا دروست دەکات، چونکە ئەوان ئەم تیرۆرەیان لە کابوڵی پایتەختی ئەفغانستان ئەنجامداوە و کوژرانی میوانیش وەک شتێکی شەرمەزارکەر و گرنگ لە کلتوری پشتوونی تاڵیبان دادەنرێت. جگە لەمەش، ئەگەری وەڵامدانەوەی قاعیدەش بۆ ئەمریکا هەیە و سەرەڕای لاوازبوونی ڕێکخراوی ئەم گرووپە لەم ساڵانەی دواییدا، دەسەڵاتی پێویست بۆ ئەنجامدانی هێرشی تۆڵەسەندنەوەیان لە دژی پێگەکانی ئەمریکا هەیە.
https://kurdish.iswnews.com/15601/
9 views07:23
ھ
