မင်းကွန်းပုထိုးတော်ကြီးအနီး စစ်ကောင်စီတပ်စွဲပြီးနောက် ဒေသခံ ၁,၀၀၀ ကျော် ထွက်ပြေးနေရ ========================== 007 (မဇ္စျိမ) ။ ။စစ်ကိုင်းတိုင်းအတွင်း စစ်ကြောင်းထိုးနေသော စစ်ကောင်စီတပ်၏စစ်ကြောင်းတခု ဇွန်လ ၅ ရက်နေ့ညက မင်းကွန်းပုထိုးတော်ကြီးအနီးတပ်စွဲလိုက်သဖြင့် အနီးအနားရှိကျေးရွာ ၁၀ ရွာထက်မနည်း စစ်ဘေးရှောင် ထွက်ပြေးနေကြရကြောင်း ဒေသခံတဦးက မဇ္ဈိမကို ပြောသည်။ “အင်အား ၅၀ လောက်ရှိမယ်ထင်တာပဲ၊ အဲဒီစစ်ကြောင်းက မင်းကွန်းပုထိုးတော်ကြီးတောင်ဘက်က ရွှေပန်းမြိုင်(ဘုန်းကြီး)ကျောင်းမှာ တပ်စွဲလိုက်တယ်။ အဲဒီကနေ ရွာတွေကို စစ်ကြောင်းထိုးမယ့်ပုံစံမြင်လို့ ရွာနီးချုပ်စပ် အကုန်ထွက်ပြေးနေကြရတယ်၊ အားလုံးပေါင်း ၁၀ ရွာ လောက်ရှိမယ်”ဟု ဒေသခံတဦးက ပြောသည်။ အဆိုပါစစ်ကြောင်းသည် ဇွန်လ ၃ ရက်နေ့က ၀က်လက်မြို့နယ် နပဲပင်လှကျေးရွာတွင် အိမ်ခြေ ၈၀ ဝန်း ကျင်နှင့်ဘုန်းကြီးကျောင်း၊ စာသင်းကျောင်းများအား မီးရှို့ဖျက်ဆီးကာ လူတဦးကိုလည်း သတ်ဖြတ်သွား ကြောင်း ဒေသခံတဦးက ပြောသည်။ “အဲဒီစစ်ကြောင်းပဲ မွှေနေတာ၊ တမာကန်(ကျေးရွာ)မှာ တညအိပ်ပြီး မနေ့ကမနက်ပိုင်းမှာ စစ်ကိုင်းထဲ ၀င်လာတဲ့စစ်ကြောင်းပေါ့၊ ညနေပိုင်းမှာ မင်းကွန်းဘက်ရောက်လာပြီး ညအိပ်တပ်စွဲတယ်၊ အခုထိတော့ ဆိုးဆိုးရွားရွား ဘာမှမကြားသေးဘူး” ဟု ဒေသခံတဦးက မဇ္ဈိမကို ပြောသည်။ အဆိုပါစစ်ကြောင်းသည် စစ်ကိုင်း-မင်းကွန်းလမ်းရှိ ပယ်ငါးဆယ်ကျေးရွာ မြစ်ဆိပ်မှ ရေယာဉ်တစီးဖြင့် မင်းကွန်းရှေးဟောင်းနယ်မြေသို့စစ်ကြောင်းချီလာပြီးနောက် မင်းကွန်းပုထိုးကြီးတောင်ဘက်ရှိ ရွှေပန်း မြိုင်ဘုန်းကြီးကျောင်းအတွင်း စခန်းချတပ်စွဲလိုက်ခြင်း ဖြစ်သည်။ ယင်းကြောင့် လက်ရှိတွင် မင်းကွန်းရှေးဟောင်း သာသနာ့နယ်မြေအနီးရှိ ကျေးရွာများမှ ဒေသခံ ၁,၀၀၀ ခန့် ဘေးလွတ်ရာသို့ထွက် ပြေးနေကြရကြောင်း သိရသည်။ စစ်ကိုင်းမြို့နယ်အတွင်း မေလ ၁၉ ရက်နေ့ကစပြီးစစ်ကြောင်းထိုးနေသော စစ်ကောင်စီစစ်ကြောင်းများ သည် အိမ်ခြေ ၁,၅၀၀ ခန့်ရှိသော ပဒူကျေးရွာကိုလည်း မီးရှို့ဖျက်ဆီးမှုများပြုလုပ်ခဲ့ကြောင်း သိရသည်။ စာတည်း။ ။ နောင်နောင် စာမူတည်းဖြတ်။ ။စောဖေ #မင်းကွန်းပုထိုးတော်ကြီး #စစ်ကိုင်း #စစ်ကောင်စီတပ် #Mizzima ------------------------ လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U 1.1K views11:22
