@tapuynusrawe #شیعر ــــــــــــــــــــــــــــــ "ئاوا بوون" دڵم... ئەوە چەندین ساڵە... دڵم وەک زەنگی کڵێسایەکی کاولبوو... تۆز و گەردی... هەموو دنیای لێ نیشتووە! جاران... دەستی ڕەحمەتێک دەهات... هەزاران ئاوازی ڕەنگاوڕەنگی... هەڵدەوەراند... هەر ئاوازێک هەزاران کۆترە باریکەی تریقە و خۆشی... لە ئاسمانی چاوەکانما هەڵدەفڕاند... * ئەمێستا من بوومەتە گوندێکی چۆڵ و خەرابات کڵێسای ڕۆح... بێ سایە و سێبەر و سابات...! هەردوو باسکیشم... دوو باڵی خاچێکی شکاون بێناز... کەوتوون! * دڵم زەنگی تۆزلێنیشتووی کڵێسایە کچە گاورێکی ڕەنگزەرد و... چاوزەرد و نەخۆش... عاشقە عیسا.. نایەت و.. ئەم زەنگە لێ دا..! تا خۆڵ و گەردی سەر باڵام.. تۆزی ناو گەرووم... بداتە دەم "با"..! زەنگی چی..؟ زەنگی ژەنگگرتوو دڵی منە ژێرکەوتووی تۆز و خۆڵی خەم و مردنە.! *** ڕەنگە سبەی.. یان دوای سەدان ساڵی تر... هەر بە ڕێکەوت... قەلەڕەشێکی ڕەحمەت لەسەر زەنگی ئەو دڵە تۆزلێنیشتووەم هەڵبنیشێ...! ئەوسا.. ئاوازێکی کپ و غەمگین وەک خوێنی ڕەش...دادەچۆڕێ. تک تک دەڕژێ... تا کڵێسای کاولبووی عومرم.. سەرخوێن دەکەوێ..! ــــــــــــــــــــــــــــــ دارشەقەکانی نیشتمان و دواهەمین ورتەورتی من #شێرزاد_حەسەن #تاپوی_نووسراوە @tapuynusrawe 462 views05:50
