استغفرت.. ومشت علي الأوضة الوحيدة البابها لسع ما انفتح.. ياربي | The Mania🖤🖤

استغفرت..
ومشت علي الأوضة الوحيدة البابها لسع ما انفتح..
ياربي نايم كل دا..
بس ما عوايدو ينوم كدا
ويفوتوا اذان او صلاة..

دقت على الباب بهدوء واتمهلت..
ما جاها رد..
في مرتين اتنحنحت

دخلت عليو

الغرفة فاضية
وحالها زي حال البلد
مقلوبة من فوق لي تحت
زي التقول اتفتشت

علم البلد مختوت علي الترابيزة في آخر الركن
وأوراق مشتته في الأرض.. اتكرمشت..

مصلايتو مفروشة ف مكانها كما الدوام
والسبحة فوقها اتكومت..

ياربي ما بيت هنا؟
والله ما عاداتو ما يبيت معاي..
سواها يوم قبال سنة...
بس تاني ما اتكررت..

ياربي بس لطفك علي..
يا ربي دا الداخراهو لي

يا ربي هو الولد الوحيد
ركازتي في زمني العنيد..

ومشت علي التلفون تفتش في النمر
ياربي بات عند النذير؟
ياربي بات عن ناس عمر؟
ياربي اضرب لي منو؟
الدنيا بدري.. اقول شنو
احسن اخلي الشمس تشرق وانتظر..
بس بالي كيفن يهدأ فكرو ويستقر؟

طق طق طرق
الباب ضرب
دقات مكررة بي ادب
دقات ضيوف..
والقلب زاد جواها خوف..

ياربي عل الجاي خير..
انا بي حبالك مستجير

ومشت علي الباب في قلق
فتحت لقت كل الخلق..

الحلة.. واصحابو الكتار
والقلب ولع فيها نار

اصحابو غارقين في الدموع..
والناس تردد من بعيد
والله ما مات الشهيد..
والباقي عارفااااهو.. النشيد

يا والدة والله الحصل
ولدك بطل
ناضل فدا الوطن الفضل..
كان بحمي في اخوانو ديل
فوق المتاريس... انكتل...
ضربوهو اولاد الحرام
كان داير افضو الاعتصام
يا أمي كان بيوصي نهديك السلام
ووصيتو ليك
ما تدقوا صيوان العزاء
طول ما البلد ماسكاها اذيال النظام