چمکنے لگا سربسر نور ہوکر
میں جل جانے والا نہیں طور ہوکر
تری یاد میں خود سے بھی دور ہوکر
میں بس رہ گیا نور ہی نور ہوکر
نہ پاس آؤ اتنے چلو دور ہوکر
میں کچھ اور کہہ دوں نہ منصور ہوکر
سرِ دار ہو کر سرِ طور ہوکر
ترے پاس آیا بڑی دور ہوکر
نہ ترساؤ ہر گام پر دور ہوکر
کوئی ہار بیٹھے نہ مجبور ہوکر
زباں چپ رہی گر چہ مجبور ہوکر
رہا بال بال اپنا منصور ہوکر
تصور سلامت تحیر سلامت
میں بیٹھا ہوں اپنی جگہ طور ہوکر
بدلنے لگے کروٹیں اہل مرقد
ذرا دور ہوکر ذرا دور ہوکر
یہ کس کے لیے جان دیتے چلا ہوں
چلی آرہی ہے قضا حور ہوکر
عجب اک معمہ سا میں بن گیا ہوں
نہ مختار ہوکر نہ مجبور ہوکر
چلا آرہا ہے کھنچا اک زمانہ
کشش اسقدر، اس قدر دور ہوکر
حدیں عشق کی کررہے ہیں وہ قائم
کبھی پاس آکر کبھی دور ہوکر
خوشامد، درآمد، تضرّع، تملّق
سبھی کچھ کیا دل سے مجبور ہوکر
کسی حال میں چین پاتا نہیں دل
نہ مغموم ہوکر نہ مسرور ہو کر
نہ جینے سے خوش ہوں نہ مرنا روا ہے
یہ جینے میں جینا ہے مجبور ہوکر
اب اتنی رعایت تو اے آسماں ہو
نئے غم ملیں پچھلے غم دور ہو کر
میں مجذوب ہوں جذبِ الفت سلامت
بچو گے کہاں مجھ سے تم دور ہو کر
اقتباس: کشکولِ مجذوب از خواجہ عزیز الحسن مجذوبؒ
https://t.me/faizanemuhabbat
