عطشان يمه. أريد الماي عبدالله يبني بعيد الماي //////////// | الشاعر وسام المبارك
عطشان يمه. أريد الماي
عبدالله يبني بعيد الماي
///////////////////
يايمه اريدا ماي اشفافي يبست
عطشان يمه ودموع العين نشفت
الساني بلهاتي سوه يايمه طبگت
دليني اروحون اجيبه زحف بلكت
اعيوني غارن. جمر بحشاي
عطشان يمه. اريد الماي
////////////////////////////
يايمه وين أتريد خافن يسحگوك
بگد حافر الخيال صدرك يأذوك
اچماله فوگ الضيم وبلايه كاروك
لاتمشي وانت صغير ماضن يشوفوك
وانه ذهيله وفگدت الراي
عطشان يمه اريدن الماي
/////////////////////////////
كلش بعيد الماي يمه اشيجيبه
چفت دموع العين صدري بحليبه
واني ادري يالعطشان هاي المصيبه
خافن يروح وخيل ليه تجيبه
الله اكبر. مصيبه هاي
عطشان يمه اريدن الماي
/////////////////////////////
اركض ودور ماي مابين الخيام
واسمع صدى مناغاه واشرگ بلالام
ندري الطفل عطشان من يرضع اينام
لادمع لا ظل ماي وگفتلي بسهام
اعصر بحيلي. وجفن عيناي
عطشان يمه. اريدن ماي
////////////////////////////
اشلون هذا الليل يخلص وتغفه
راح ابقه عالكاروك اگظيها وگفه
من العطش كل ساع ايمدلي چفه
يمه بهذيج الگوم محد نعرفه
كل ساع اشيطن. وانه ابلواي
عطشان يمه اريدن ماي
////////////////////////////
حتى النواغي البيه مبحوحه تطلع
من كثر ماعطشان مابية اسمع
اركض ورد اردود وبصفة ارجع
صدري نشف وشلون يوليدي ترضع
اشلون ارضعك يبعد جلاي
عطشان يمه اريدن ماي
//////////////////////////
كل طفل لوعطشان ايناغي لمه
من العطش احاه ماهدله جلمه
ست اشهر وعطشان هذا اشيهضمه
لوتمر نسمة عليه بجلاه تلجمه
ضامي اعله ابيه اشلون بهاي
عطشان يمه اريدن ماي
//////////////////////////
دوهنت حالي اعليك ذيج الليالي
مرعوبه افز ونعاك والمهد خالي
مناغك وصوت ابجاك شادهلي بالي
انهض وگومن ورد حسبالي اجالي
مهدك حضنته وهز بهداي
عطشان يمه اريدن ماي
////////////////////////////
وسام المبارك
