2021-05-06 00:34:55
فرنسا هاي الدولة الحلوة الكيوتة الي عدهم طبيعة وبناء وثقافة كلنا نحلم نكون جزء منها ونعيشها
هي كانت وما زالت اسوء دولة مستعمرة في التاريخ..
هسة تكول شلون مُستَعمِرة وهي منسحبة من كل الدول الي احتلتهن؟
الحقيقة ان انسحابهم جان حركة شكلية ما انهت سيطرة الدولة الفرنسية على هاي الدول، وانما ثبت براثنهم اكثر واقوى بأُسس الدول المُستَعمْرة ومؤسساتها.. وبصورة دستورية وقانونية!
-١٤ دولة افريقية ما عدهم عملة خاصة بيهم انما يتعاملون بشي اسمه الفرنك الافريقي الي ينقسم نوعين
فرنك افريقيا الوسطى (الغابون، كونغو، تشاد، الكاميرون، غينيا الاستوائية، افريقيا الوسطى)
فرنك افريقيا الغربية (السنغال، ساحل العاج، مالي، بنين، نيجر، بوركينا فاسو، غينيا بيساو، توغو)
كل مجموعة من هاي الدول عملتها موحدة، يصدرها البنك المركزي الخاص بهاي الدولة
ويتحكم بيها وبقيمتها السوقية البنك المركزي الفرنسي وهو يحدد شكد سعر الصرف اله
-البنك المركزي ايضا
يجبر الدول المذكورة اعلاه ان يخلون ما نسبته ٥٠٪ من احتياطها من الاموال الاجنبية بالخزائن الفرنسية
وبحال اذا احتاجت اي دولة منهن ان تسحب مبلغ من هاي ال٥٠٪، فالفرنسيين راح ينطوها الهم على شكل قرض يتم تسديده بفترة محددة ويتم تحميل فوائد عليه
-هاي الدول ال١٤
ممنوع عليهم منعاً باتاً التصرف بثرواتهم الطبيعية الا بإذن فرنسا، وايضا ممنوع عليهم إن يبيعون اي شي منها لدولة غير فرنسا (الي تاخذ بالسعر الي يعجبها بعيدا عن السعر العالمي) الا اذا الاخيرة رفضت تشتريه..
وطبعا من فرنسا تشتري الذهب او النحاس من عدهم راح يدفعون للدول بالعملة الاجنبية، وبالتالي
لازم يودعون ما نسبته ٥٠٪ منهن عند الفرنسيين!
-الشركات الفرنسية
هي الوحيدة الي الها حق الاستثمار الحكومي بهاي الدول وإن كانت المناقصة بيها شركات اخرى تنجز نفس العمل وبقيمة اقل وجودة اعلى.. الفرنسي مُفضل دائماً.. ولهذا الشركات والبنوك والاستثمارات الكبرى كلها شخوصها واصولها فرنسية
-عسكرياً
ممنوع على هالدول التحالف مع اي حليف آخر عدا جماعة الكرواسون ومو غريب اذا اكول ممنوع شراء السلاح غير من باريس الي مجبورين يدخلون معاها اي حرب تخوضها ضد اعدائهم (المشتركين)
- (٢٠٪ من الناتج القومي المحلي مدى الحياة) هي النسبة الي لازم هاي الدول تدفعها لعاصمة العطور لفدشي اسمه "
ضريبة الاستعمار" والي هي مثل الثمن مقابل البنية التحتية الي بنوها الفرنسيين الهم اثناء الاحتلال
من عدا حالة الطمس الثقافي والاجتماعي وسياسة الفَرْنَسة الي تمثلت بالغاء اللغات المحلية وابدالها بالفرنسية..
فبعد هذا كله، هل ممكن نشوف الغرب ينهار؟
الجواب نعم ممكن وبحالة وحدة هي ان افريقيا وبقية الدول الغنية بالثروات والطاقات تنهض وتنتفض على سيطرة الرجل الابيض مصاص الدماء، المتغذي على الحروب والازمات..
الصورة الفوك لجندي مشاة فرنسي سنة ١٩١٢ او هيج شي
156 viewsedited 21:34
𝐅
