2021-11-13 20:52:10
في مولد الإمام العسكري (ع)
ليل ميلادك أحِسَّن شاعِري
او من بِزغ نورك تِنُومَس ناظِري
او كلِت يا نبضات كلبي ابكِل سُرور
الـ جَيَّةِ الغالي دَصلّي و انْحَري
وانتي يا دنيه مِنِ اتشوفينه طاح ..
ساجد اعله الكاع .. أذْنِي او كبِّري
ألله أهدالِج ضُوه ابهيئةْ إمام
اتْبَخْتِري يا دنيه بيْهِ اتْبَخْتِري
وابقدوم (الخير) يا أرض او سماء
ابلا جِنِح .. طيري ابعشِكـ واسْتَبْشِري
وابعطر إبن النِّبي الـ فاح ابسلام
يا حروف او يا قوافي اتْعَطِري
او رِسْمِي لوحه الـ حِسْنه قَدْرِ المُستطاع
و ابصفاته البيض هيمي و اسْكري
لملِمِي المعنى او مثِل طبْع الرِّمال
يم جمال ابن البتوله اتْبَعْثِري
وابنَفَس واحد مِنَ انفاسه أريد
كون عن برْدِ الشِّعِر تِتْدَثِري
او حرِّري الإحساس من سجْن (الخَليل)
او بالفرح بُركان أخضر فَجِّرِي
إنته بس انته تِرَس عيني ابضُواه
و انته منّ اعطش أشوفك كوثري
او من يظلموني البشر إنته النصير
او من أحارب إنته سيفي او خَنْجَري
او والله منِّ اتصير وَيّايه الحياةْ
مُرَّه .. ألكاك انته صاير سُكّري
بِعِت كلبي ابسوكـ ايسمونه الهَيام
او عيني ما شافت سِواكُم يِشْتِري
اتمَلّكِتْني من قَبِل تِشْري الدِّليل
او بس قِنَع هوه ابهَواكُم ضامري
عَلَكـ شفتك سيدي ابمَتْن الشهيد
او شفِت بسمك رايه وسْط (المُشْتَرِي)
& & & & &
الليله من شعشع على الدنيه ضُواك
وَجْها شمعات الفرح وادي (الغَري)
إنته تحمل طيبه من كلْب الرسول
او لو زِعَلْت ابيوم زَعْلك حيدري
الناس تسألني نشوفك عالي راس ؟!
آنه كِتِّلْهُم طبيعه ابجوهري ..
العنْده مثل (العسكري) خل او حَبيب
حكّه ياخذ كل شُمُوخي او مَفْخَري
إنته صوتي من يِبِح صوت الزمان
و انته يا مولاي صولةْ مِنْبَري
على إسمك سيدي أصحه او أنام
او حبك إحرامي او ضَريحك مَشْعَري
أمي نذرتني نِذِر رادت أصير
يالحسن في جيش إبنك عسكري
او عندي أصعب كُل شِي منّ افكُد رِضاك
و العُيونك سهله اقدِّم مَنحَري
آنه بالدنيه او لأن أشتَم هواك ..
ما أحير .. اشلون احير ابمَحْشَري ؟!!
الما يحبك هذا مِسكين او فقير
و اليحبك هوه بس هذا الثّري
يِسْألوني أهْل العشكـ ما اسْم الحَبيب ؟!
كِلِت لتْسِألوني عدكم خاطري
جاوب اعليهم دِليلي ابلا كلام
فقط أشّر على إسم (العسكري)
& & & & &
تبكه يبن الهادي ماضِيّي الجَميل
او زهرةِ المستقبل او فَيْ حاضِري
علي جدك خط حُروفك عالفَقَار
او صاح لعيونك أطُرِّ (العامِري)
& & & & &
خادم العسكري (ع) : إبراهيم الدريس
962 viewsنٌوُرَ آلَوُلَآء آلَفُآطٌـمِـيّ, 17:52
ت
