السلام عليكم طلبتي دكاترتنا الدفعة 48 ثالثة بشري اول شي سا | Dr.Ahmed Elzalitini

السلام عليكم طلبتي دكاترتنا الدفعة 48 ثالثة بشري
اول شي سامحونا علي قلة التواصل الايام الي فاتن كنت نمر بوعكة صحية قوية رقدتني حوالي اربع ايام (حرارة وأبراد) بس الحمدلله اليوم الوضع افضل وشكراً لكل الطلبة الي نشدو عليا وفقدوني وبارك الله في الجميع يا خوتي وخواتي

ثاني شي نحب نوضح لطلبتي اني حنتوقف نهائياً عن إعطاء محاضرات المايكروبيولوجي في المعاهد بالنسبة لكلية الطب البشري نظراً لانشغالي ولظروفي الخاصة فياريت تسامحونا يا طلبة وبالنسبة لباقات التدارك مستمرات في باقة الثلاث مواد (بارا وفارما وباثو) او باقة مادتين (فارما وباثو - باثو وبارا - فارما وبارا) والي انسجم مع طريقتي وعطائي في المايكرو بالله يسامحنا واجد وبالنسبة للي يسألني منين نقروها ننصحكم تقروها من الدكتور محمد العماري لأن هو الي قرانا في المايكروبيولوجي وانا شخصياً كنت طالب عنده ايام ثالثة .

بخصوص البارسيتولوجي زي ما تعرفو موعد المحاضرة الاولى كان مفروض يوم الثلاثاء السابق الساعة 10 مساءً بس للاسف صار جو شين وبلاغات من ايميلات وهمية لعند حذفو محتوى المحاضرة ولذلك حيكون في سيناريو جديد في الاشتراكات بالنسبة لقنواتي الخاصة لأن العبدلله موتيلكم قريب اربع قنوات مفيدة بكل في سنة ثالثة بشري وحنعلنو عن كل قناة في وقتها باذن الله تعالى بس هذي اول قناة وبدا فيها اللبز والبلاغات والجو الشين ، والبارا مازال بدري بكل بكل عليها لان احتمال كبير مافش اصلاً امتحان جزئي اول في البارا حسب المعلومات الي جني عن القسم بس برضو حنبدو وحنكمل قبل الجامعة زي كل سنة باذن الله تعالى .. بما ان هذي اول قناة وصار فيها هكي وبلاغات وجو شين معناها حيختلف نظام التسجيل وحيكون في نظام أدق ومنظم اكثر باذن الله تعالى ...

نحن اليوم الأحد بتاريخ 2023/1/15 م ركزو معايا بالله يا 48 ، الي حاب يحضر باراسيتولوجي في القناة الخاصة بيا ياريت يطبق الكلام الي توا :

1 - حنكون متواجد في معهد التدارك من الساعة 1 ظهراً الى الساعة 7 مساءً (أيام الثلاثاء والاربعاء والخميس الجايات )

- تاريخ 1/17 الموافق الثلاثاء يوم خاص بالطلبة الي دفعو قيمة كاملة (150 دينار) ياريت يجو من جديد (سامحونا بالله عليكم) لمعهد التدارك بين الساعة 1 و 7 ويجيبو معاهم (البطاقة الدراسية - صورة من البطاقة الدراسية)

- تاريخ 1/18 الموافق الاربعاء يوم خاص بالطلبة الي دفعو قيمة غير كاملة ( 100 أو 50 أو أي قيمة غير كاملة) ويجيبو معاهم (لبطاقة الدراسية - صورة من البطاقة الدراسية) .

- تاريخ 1/19 الموافق الخميس يوم خاص بالطبة الي مازالو ما اشتركو بكل وحابين يشتركو في القناة ويقرو معايا البارا وبرضو يجيبو معاهم (البطاقة الدراسية - صورة من البطاقة الدراسية)

نوعدكم السنة هذي بما أن اغلبكم عجبكم شرحي في المايكرو وان شاءالله حيعجبكم شرحي اكثر في البارا بالطريقة الجديدة وحانزل دروس لغة انجليزية مفيدة بكل لسنة ثالثة بشري في قناتي العامة وحنوضح ليش انا مركز عاللغة في سنة ثالثة

ممكن حد يسأل ليش الشحورة هذي يا دكتور ماهو جينا ودفعنا ليش نجو اخرى والدنيا مطر وصقع حرام عليكم ؟


الإجابة ببساطة لأن الدكتور بعد بدا في المحاضرة الثلاثاء الي فات الساعة 10 مساءً لقيت ان الفويسات ينحذفن من البلاغات لأن العبدلله طيب وضفت وجدين بكل بلاش وضفت وجدين ما نعرفهمش و دافعين قيم بسيطة بكل وفعلاً زي ما يقولو (خيرا تفعل شراً تلقى) فكلمة شكراً حصلتها الثلاثاء الي فات في البلاغات وتصكيرة قناتي ، فأنا واعوذ بالله من كلمة انا كدكتور احمد الزليتني مش مستعد نتعب ونفكر وندير فكرة القنوات الخاصة الي هي مريحة بكل للطلبة بالذات في الصقع والمطر وانسجمو معاها ال47 الدور الثاني وكانت نسبة نجاح جماعتي 90 % وبعد التعب هذا يجو مجموعة مريضة يخربو علينا شغلنا (والله ماهي صايرة والفكرة مش حتموت) ولذلك الاجراء الي وضحته فوق ياريت نطبقوه وياريت كل حد يلتزم باليوم متاعة ونذكركم مرة ثانية

الثلاثاء القادم .. الطلبة الي دافعة قيمة كاملة
الاربعاء القادم .. الطلبة الي دافعة قيمة غير كاملة
الخميس القادم .. الطلبة الي حابه تشترك

بعد تنتهي القصة يوم الخميس ونعرفو الي لنا والي علينا حنصكر الاشتراك نهائياً في قناة البارسيتولوجي وحنبدا في شرح المحاضرات الاسبوع القادم (موعد المحاضرة الاولى حتكون الاحد بتاريخ 1/22 )