مرحبا.. كيفِك.. شو الأخبار؟ مافي شي حبيت اطمن عنك على اعتبار ا | شـಿـعور

مرحبا.. كيفِك.. شو الأخبار؟
مافي شي حبيت اطمن عنك على اعتبار اليوم عيد الحُب.. شو عاملة؟ مانك رايحة لمحل؟ ليش؟ قلّة محلات تروحيا؟ مافي حدا تروحي معو؟ إي وشو عليه.. ليش مين قال أصلاً أنو عيد الحُب هو بس لتنين بيحبو بعض؟ مابتحبي أمك؟ أخوكي؟ رفقاتك؟ روحي احتفلي معن..
قليلن إنك بتحبيّهن قبل ما يسافروا أو يختفوا بساعة غفلة وماتلحقي تقوليلون إنك بتحبيّون متل ماصار فيني معك..
يا ستّي وبأسوأ الأحوال روحي بهاليوم لحالك.. وين المشكلة يعني؟ احتفلي بمناسبة أنك بتحبّي حالك.. أصلاً كيف فيكي تقولي إنك بتحبّي حدا إذا كنتي حالك مو قدرانة تحبيّا؟
ممم.. كلّك مشاكل.. شايفة حالك ماحلوة؟ ناصحة شوي؟
بتتلبكي بس تحكي؟ اي وين المشكلة يعني..
حدا قال إنك لازم تكوني مفصلّة عالكاتالوك.. شوفي الله قديش خلقك مهضومة والناس بتحب قعدتك.. و قديشك طموحة وبتتعبي كل يوم لتوصلي لحلمك إنك تصيري .. الله العليم شو رح تصيري.. بس متأكد إنك رح تصيري.. أنا كنت ولح ضل مآمن فيكي..
ما بيكفّي يعني؟
لازم تكوني بنت خارقة الجمال.. وحياتك لا مضطرة لا لمكياج ولا للبس ولا لتكوني بغير يلي انتي عليه أصلاً.. شوفي الله شو حبّاب وقت خلقلك هالعيون..
إيه متل ماعم قلّك.. بعدين مانك متذكرة شو كنت اكتبلك بعيد الحُب؟ تذكريتا؟ إيه رجعي اقريا يمكن تفيدك..
ولك شبنا.. لسّا هلأ عم قول عنّك حبابه..
بس، ما حتردّي ماهيك؟.. يمكن ماعندك شي تقوليه.. لان هي اول مرة بحبك هالقد وبتخسريني هالقد..
أنا؟
والله ماني عامل شي..
عم اركد ما الحق.. عم اتفركش بهالناس بالشارع.. هاد يلي راكد يرسم لوحة لخطيبتو.. وهي يلي جايبة رفقاتا مشان يساعدوها باختيار الهدية.. وأنا لا فاضي لا لفالانتاين ولا حتى ل سبت الأموات.. لأنو في قهوة مالحقت حتّى اقعد معك فيا..
فقدت الشعور.. وأكتر من هيك.. فيكي تقولي هاد احساس الحُب يلي كنت احكي عنّو فقدتو.. في شي عم ياكلني من جوّا.. قعدت كتير فكرت ليش.. يمكن اشتقتلك..
هيك غالباً..
بس غالباً كمان مشكلتي أعقد من هيك.. أنا كيف بدّي قلّك.. ماعم أقدر حب حالي من بعد خذلانك.. عم تفهمي عليي ما!!
وأخيراً.. في حال ما اقتنعتي بكلشي قلتو وضليتي متنحة (متل عوايدك)..
انا بس بتمنّى تحبّي حالك متل ما أنا بحبِّك.

كل سنة وأنا بحبِّك أكتر من سِنة..
#blbl