2022-04-29 17:01:50
IELTS Writing: Task 2 insholarini farqlashni o‘rganamiz
IELTS Writing imtihonining Task 2 qismida quyidagi 5 turdagi insholardan birini yozish talab etiladi:
Opinion Essay— fikr-mulohazalar bo‘yicha insho. Bunday insholarda siz keltirilgan mavzuda aniq bir tarafni tanlab olib, kirish qismida bu boradagi shaxsiy fikringizni ta‘kidlab o‘tishingiz, inshoning oxirigacha o‘z fikringizda qolishingiz va bu uchun sabablarni izohlab berishingiz lozim. Bu kabi insholarda "sizning fikringiz qanday?", "bu fikrga qo‘shilasizmi yoki qarshimisiz?" kabi savollar beriladi.
Discussion — muhokama va tahlillar bo'yicha insho. Unda siz masalaning har ikki tarafini tahlil qilib chiqishingiz kerak. Bu borada eng yaxshi usul — o‘zingiz ma‘qul deb bilgan bitta fikr va sizningcha noto'g'ri bo‘lgan boshqa bir fikrni tanlab olish hamda ikkisini muhokama qilib yozishdir. Muhokamani avval siz noto'g'ri deb bilgan fikrdan boshlang.
Problem solution — muammo va uning yechimlari bo‘yicha insho. Topshiriqda sizga bir masala taqdim etiladi, siz esa, uning sabablari(muammolari) va yechimlarini tahlil qilib chiqishingiz kerak. Lekin, birdanida ko‘plab sabablar va yechimlarni qalashtirib yuborish yaramaydi. Bir yoki ikkita muammoni tanlab olib, yechimlari bilan batafsil keltirib o‘tishingiz yetarli.
Advantages and disadvantages — foydali va zararli jihatlar bo‘yicha insho. Unda siz ma‘lum bir narsaning foydali va zararli tomonlarini izohlab yozishingiz lozim. Insho nomi ko'plik sonida bo‘lgani bilan, siz mavzuga oid bitta foydali va bitta zararli jihatni tanlab olib, tahlil qilib yozganingiz ma'qul.
Double question — ikkita masala/savol bo‘yicha insho. Bunday insholarda sizga ikkita bir-biriga bog‘liq yoki bog‘liq bo'lmagan savollar beriladi. Siz har ikki savolga to‘liq javobni berishingiz shart. Ammo, inshoyingiz "Opinion Essay" yoki "Discussion Essay" turlariga o‘xshab qolmasligi kerak.
Insho turlari va ularning talablarini to'g'ri anglash orqali Writing Task 2 imtihonida bemalol yuqori balldan umid qilsangiz bo‘ladi.
Siz uchun qanday insholarni yozish qiyinroq? Bu haqida izohlarda yozib qoldiring.
@ieltswonder
388 views14:01