ကလေးမြို့နယ်မြောက်ပိုင်းတွင် စစ်ကောင်စီတပ်က လေကြောင်းမှပစ်ခတ်၍ အရပ်သား ၄ ဦး ဒဏ်ရာရ ================== ပါခွီး (မဇ္စျိမ)။ ။စစ်ကိုင်းတိုင်း၊ ကလေးမြို့နယ်မြောက်ပိုင်းရှိ ရှုခင်းသာကျေးရွာကို စစ်ကောင်စီတပ်က ရဟတ်ယာဉ်ဖြင့် လေကြောင်းမှပစ်ခတ်တိုက်ခိုက်သောကြောင့် အရပ်သားလေးဦး ဒဏ်ရာရရှိခဲ့ကြောင်း သိရသည်။ လက်ပံချောင်းနှင့် ရာဇဂြိုလ်ကားလမ်းဘေး၊ ရှုခင်သာကျေးရွာရှိ စာသင်ကျောင်းကို စစ်ကောင်စီတပ်မှ ဇွန်လ ၅ ရက်နေ့ ၉ နာရီ ၃၀ မိနစ်ခန့်တွင် တိုက်ခိုက်ရေးရဟတ်ယာဉ်ဖြင့် သုံးကြိမ် လာရောက်ပစ်ခတ်ခဲ့ ခြင်းဖြစ်သည်။ “ ကလေးတွေအတွက် ကိုယ်ထူကိုယ်ထဖွင့်ထားတဲ့ကျောင်းက ဆရာ၊ ဆရာမလေးတွေ တွေ့ဆုံကြတာလို့ ကြားတယ်။ အဲဒါကို ဘေးနားက ကံကြီးပျူစောထီးရွာက စစ်ကောင်စီကို သတင်းပေးလို့ လာပစ်တာလို့ ကြားရတယ်” ဟု လုံခြုံရေးအရ အမည်မဖော်လိုသည့် ဒေသခံက မဇ္စျိမသို့ပြောသည်။ ရှုခင်းသာတွင် PDF ကာကွယ်ရေးတပ်ဖွဲ့များစုဝေးနေကြပြီး လက်နက်ကြီးများလည်း တပ်ဆင်နေ ကြောင်း ကံကြီးကုန်းပျူစောထီးရွာမှ စစ်ကောင်စီတပ်သို့ သတင်းပို့သည့်အတွက် ယခုကဲ့သို့ ပစ်ခတ်ခဲ့ ခြင်းဖြစ်ကြောင်း ၎င်းက ဆိုသည်။ ရှုခင်းသာကျေးရွာတွင် ကာကွယ်ရေးတပ်သားများလည်း ရှိမနေကြောင်းနှင့် ပစ်ခတ်မှုကြောင့် ဒေသခံ လေးဦး လက်နက်ကြီးကျည်ဆံအစများထိမှန်၍ မစိုးရိမ်ရသောဒဏ်ရာများရရှိခဲ့ကြောင်း သိရသည်။ တဆက်တည်းပင် နံနက် ၁၁ နာရီခန့်ကလည်း စခန်းကြီးရွာဖက်မှ စစ်ကောင်စီတပ်သားးများက လက်ပံ ချောင်းရွာအတွင်းသို့ လက်နက်ကြီးဖြင့် အကြောင်းမဲ့ပစ်ခတ်ခဲ့ကြောင်း အဆိုပါဒေသခံကပြောသည်။ ယင်းသို့ပစ်ခတ်မှုကြောင့် ရွာအလယ်ခေါင်တွင်ကျရောက်ပေါက်ကွဲပြီး ဒေသခံတစ်ဦး ခြေထောက်ပြတ် သွားကြောင်း ဒေသတွင်းသတင်းရင်းမြစ်များထံမှ သိရသည်။ စာတည်း ။။ Alden စာမူတည်းဖြတ်။ ။စောဖေ #ကလေးမြို့ #ရှုခင်းသာကျေးရွာ #လေကြောင်း #လက်နက်ကြီး #စာသင်ကျောင်း ------------------------ လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U 912 views12:34