2022-06-27 18:50:01
پریشان حالین اولدوم سورمادین حال پریشانیم
غمین دن درده دۆشدوم قیلمادین تدبیر درمانیم
نه دئرسن روزگاریم بؤیله می کئچسین گؤزل جانیم؟
گؤزوم جانیم افندیم سئودیگیم دولتلی سلطانیم
اسیر دام عشقین اولالی سندن وفا گؤرمن
سنی هر قاندا گؤرسم اهل درده آشنا گؤرمن
وفا و آشنالیق رسمینی سندن روا گؤرمن
گؤزوم جانیم افندیم سئودیگیم دولتلی سلطانیم
دیر هر دم وفاسیز چرخ یاییندان منه مین اوخ
کیمه شرح ائیله ییم کیم محنت و اندوه و دردیم چوخ؟
سنه قالدی مروت سندن اؤزگه هیچ کیمسه م یوخ
گؤزوم جانیم افندیم سئودیگیم دولتلی سلطانیم
گؤزومدن دم به دم باغریم اۆزوب یاشیم كيمی گئتمه
سنی ترک ائتمه زم چون من منی سن داخی ترک ائتمه
اماندیر ظالم اولما من کیمی مظلومی اینجیتمه
گؤزوم جانیم افندیم سئودیگیم دولتلی سلطانیم
قاتی کؤنلون نه دن بو ظلم ایله بیداد راغیبدیر
گؤزل لر سن کیمی اولماز جفا سندن نه واجیبدیر؟
سنین تک نازینه نازنین ایش لر مناسبدیر
گؤزوم جانیم افندیم سئودیگیم دولتلی سلطانیم
نظر قیلمازسان اهل درد گؤزدن آخیدان سئیله
یامانلیق دیر ایشین عشاق ایله یاخشیمی دیر سؤیله؟
گل اللاهی سئورسن عاشقه جور ائتمه لطف ائیله
گؤزوم جانیم افندیم سئودیگیم دولتلی سلطانیم
"فضولی" شیوه ی احسانین ایستر بیر گدایین دیر
دیریلدیکجه سگ کۆیون، اؤلنده خاک پایین دیر.
گرک اؤلدور گرک قاو حکم حکمون رای رایین دیر
گؤزوم جانیم افندیم سئودیگیم دولتلی سلطانیم .
"فضولی"
@mollafuzuli
574 views15:50