2021-04-14 21:31:00
رايح يشتري لخطيبته هدية وكان حاطط في جيبه " ٥٠٠ جنيه" ، كانوا متراهنين مين هيجيب هدية أحلي للتاني..
دخل المحل وقعد يدور علي حاجه مختلفة وتكون أحسن من الحاجة اللي هيا هتجبهاله ، بعد نص ساعه خرج من المحل من غير ما يشتري
وقف عند مكتبة قديمة بعد ما لفت نظره نوتة صغيرة وتصميمها هادي ، إشتراها وأشتري قلم أبيض وقلم دهبي ورجع بيهم البيت
دخل أوضته ، إستربع علي السرير بعد ما قفل الباب ، فتح اول صفحة في النوتة وكتب "أسمها" في النص ، نزل سطرين وكتب أسمه ، وبين السطرين كتب بلون مختلف
"اللهم إجتماعك" ورسم إيدين في حافة الورقة ، كان شكلهم غريب فكتب في النوتة من تحت
"ملحوظة أنا فاشل في الرسم "
وقف عند الشباك وقلب الصفحة ، كتب في أول سطر
"تسمحيلي؟!"
عدي أول وتاني ورقه وهو بيوصف ملامحها وتوترها وطريقه كلامها وضحكتها ، شكلها وهيا متعصبة ، حركات أيدها وهيا بتتكلم ، لما تيجي تعتذر برضاها ولما تعتذر غصب عنها
لاحظ إنه بيقلدها وهو بيكتب فضحك
وصف كل تفصيلة فيها حتي طريقة أكلها ومسكتها للتليفون
قلب علي الصفحة العاشرة وهو مكمل وصف ، قعد علي السرير تاني وميّل نفسه علي النوته وسرح وهو ماسك القلم
كتب تلاتة وعشرين ورقه وهو بيوصف كل المواقف اللي جمعتهم ببعض ، بص لعدد الورق وقال "أنا حفظت كل حاجة فيكي كأني داخل أمتحان "
قسّم النوتة نصين وكتب في النُص الأخير من النوتة
"الركن دا في النوتة إسمه ركن "العتاب" ، مش مسموح بالبعد ولا مسموح بالفراق مسموح بس بالعتاب ، لما نزعل من بعض هنلجئ للركن دا ، انتي هتكتبي وانا هكتب ، هنعاتب ونشتكي ونتصالح ويمكن نتعاقب بس أهم حاجه ممنوع إننا نتفارق أو نبعد بالأيام"
"جبت معايا قلم أبيض ، دا اللي هنتعاتب بيه ، عارفه إختارته أبيض ليه ، عشان مهما يكون العتاب قاسي هنصفي في الاخر ومهما الخصام يطول هنرجع من تاني"
قلب الصفحة وكتب "القلم التاني لونه دهبي ، اختارته دهبي عشان كلنا بنجري ورا الحاجة الغالية ، وأنا جريت وراكي ، لأنك مكسبي الوحيد وغِنايا عن أي حاجة"
كتب في أخر صفحة في النوتة
"دي مش النهاية ، دي بدايه قصة جديدة هتبدأ في بيتي ، أظن إن مهما هديتك ليا هتكون غالية مش هتبقي أصدق إحساساً من كلامي ليكي"
"إحنا مش محتاجين هدايا مادية ، يكفي إنها تكون من القلب"
my sense ︎
251 views18:31
ᗰ
