هذا الصباح .. عشان تمشي قدام .. مرات بتحتاج ترجع لي ورا .! | Un monde différent💛✨
هذا الصباح ..
عشان تمشي قدام .. مرات بتحتاج ترجع لي ورا .!
الطريق ما ممهد دائما .. بل بشكل أصح .. الطريق غالبا ما ممهد ..
في مطبات .. في عوائق ..في سلك شايك .. في أسرة بتقيدك و تخنقك .. في زملاء بضايقوك ساي كدة .. في ظرف اقتصادي عالمي.. لا و الجديدة كرت .. في كورونا ..!
الناس بقت بتكبر بي سرعة.. و دة ما لأنه الوقت ماشي أسرع .. بس لأنه تواتر الأحداث بقا الإيقاع بتاعه أسرع ..
اللي عمره ٢٧ سنة الليلة ما زي الزول اللي في التلاتينات و عمرو ٢٧ قبل عشرة سنين
اللي بيمر بيه دة .. داك ما مر بيه ..!
نقوم نجي كلنا و نصطك في حتة ..
أيا كانت الحتة شنو .. علاقة عاطفية .. تطور أكاديمي .. علاقة اجتماعية .. مشروع أو بيزنيس .. حياتك مع ناس البيت
بتلقى نفسك بتمشي بس و دافر عجلة الدنيا دي لي قدام .. بس شغال بتضغط و تمشي ..
في مواقف كتيرة شديد .. حتلقى انه .. what if we can go back in time
ماذا لو كان بإمكاننا نرجع بالزمن لي وراء..؟
هو فعليا ما ممكن و في نفس الوقت ممكن ..!
مرات لما تجي طالع بي عربيتك من مكان .. بتلقى انه انت لي حتة ضيقة ما هينفع الا ترجع خلف و تستعدل و خت لي خطين تحت تستعدل دي .. عشان يبقى المجال اوسع و تمشي لي قدام..!
اهو في الحياة دي .. محتاجين مرات نرجع لي ورا و نستعدل ..
يعني انت الآن في علاقة .. مثلا يعني .. العلاقة دي وصلت نقطة و ما ماشة .. افتكر حبة رجعة لي ورا .. و الرجعة هنا بمعنى التفكير خارج العلاقة .. طلع نفسك من المشهد و عاين ليه من فوق و عاين لي نفسك واقف جوة ..
هل انت في مكانك الصحيح ؟ هل تصرفاتك كلها صح ؟ طيب أخفقت وين ..!
شغال في مشروع و المشروع ما ماشي او ماشي بي بطء ..
ارجع لي قواعدك شوف انت ختيت قروش قدر كم .. الجهد المبذول .. دراسة الجدوى .. هل اخترت الشركاء الصح ؟
حتى اصحابك لما تختلف معاهم و تصلو لي نقطة في علاقتكم ما ياها .. ارجع لي الوراء و شوف انت غضيت البصر كم مرة و سامحت كم مرة و وهبت بلا تردد كم مرة .. و كم مرة انت اخدت و كم مرة استحقيت تاخد و ما ادوك ..
الزمن ما برجع بس تفكيرنا فيه ممكن يرجع .. ما من باب جلد الذات و لا تقعد تقول انا اسف و انا ندمان و انا خسران و انا يا ريتني !!
اطلاقا !!
كل تجربة درس .. كل مشهد درس .. كل يوم فيه درس !!
الدرس ليوم الليلة .. زمان في الرياضيات .. لما تحل المسألة و تلقى في النهاية الجواب ما ياهو .. بترجع لي مسألتك من الاول و تخت المعطيات و المطلوب و تغير طريقة الحل عشان تصل للجواب المفروض و المطلوب ..!
بالبلدي كدة بتستعدل للخلف عشان تمشي قدام !
الرجوع لي الوراء ما غلط .. غلط الماشي قدام و ما عارف ماشي لي وين !
