#အသားချောင်းဝယ်စားမိသူ လူ(၅၀)ကျော် အစာအဆိပ်သင့် -------------- | ZYH News
#အသားချောင်းဝယ်စားမိသူ လူ(၅၀)ကျော် အစာအဆိပ်သင့်
-------------------------------
ရန်ကုန်တိုင်း၊ ဒဂုံအရှေ့မြို့နယ်၊ ရွာသာကြီးဘူတာအနီး ရပ်ကွက်မှာ ဈေးသက်သက်သာသာနဲ့ လာရောက်ရောင်းချတဲ့ အသားချောင်းတွေ ဝယ်စားမိရာမှ လူကြီး နဲ့ ကလေး အယောက် (၅၀) ကျော် အစာအဆိပ်သင့်မှု ဖြစ်ပွားခဲ့တယ်လို့ ဒဂုံအရှေ့အခြေစိုက် မေတ္တာသင်္ဂဟ နာရေးကူညီမှုအသင်း၊ တာဝန်ခံ ကိုမင်းဒင်က ပြောပါတယ်။
ဒဂုံအရှေ့မြို့နယ်၊ ရွာသားကြီး ရပ်ကွက်၊ ရွာသာကြီးဘူတာ အောက်ချိူင့်နေသူ နှစ်ယောက်က မေလ (၉) ရက်၊ ညနေ (၅) နာရီခန့်က တစ်ရပ်ကွက်တည်းက နေအိမ်တွေကို အသားကင်ထုပ် တစ်ထုပ်ကို ကျပ် (၂၀၀၀) ခန့်နဲ့ ပြန်လည် ရောင်းချခဲ့တယ်လို့ ဆိုပါတယ်။
အဲဒီနောက် ဝယ်ယူသူ မိသားစုတွေက ကိုရီးယားအကင်တွေကို စားသောက်ကြရင်း ညနေ (၆) နာရီခန့်က စတင်ပြီး စားသုံးမိသူ အသက် ငါးနှစ်အရွယ်မှ အသက် (၃၀) အတွင်း အမျိုးသား (၂၀) ကျော် နဲ့ အမျိုးသမီး (၃၀) ခန့်တို့မှာ နှုတ်ခမ်းပြာ အသားတွေ ပြာပြီး မူးဝေအော့အန်တာတွေ ဖြစ်ခဲ့တယ်လို့ သိရပါတယ်။
အဲဒီလို အစာအဆိပ်သင့်မှုဖြစ်တဲ့ လူနာတွေကို သင်္ဃန်းကျွန်း စံပြဆေးရုံ နဲ့ ရန်ကင်း ကလေးဆေးရုံကို ရွာသာကြီး လူမှုကူညီရေး အသင်းယာဉ်တွေနဲ့ ပို့ဆောင် ဆေးကုသမှု ခံယူစေတယ်လို့ ဒဂုံအရှေ့မြို့နယ် အုပ်ချုပ်ရေး အဖွဲ့ဆီက သိရပါတယ်။
လတ်တလော မေလ (၁၀) ရက် ၊မနက်ပိုင်းထိ ဆေးရုံမှ သိရှိထားချက်အရ အစာအဆိပ်သင့်သူ လူနာတွေအနက် သေဆုံးသူ မရှိသေးဘဲ လူနာအယောက် (၃၀) ကျော်ကတော့ စိုးရိမ်ရ အခြေအနေရှိနေတယ်လို့ ကိုမင်းဒင်က ပြောပါတယ်။
လာရောက်ရောင်းချခဲ့တဲ့ အသားချောင်းတွေဟာ FDA ထောက်ခံချက် မရှိတဲ့ နယ်စပ်မှ တရားမဝင် ဝင်ရောက်လာတဲ့ အသားချောင်းတွေ ဖြစ်တဲ့အတွက် မစားသုံးဖို့ အစားအသောက် နှင့် ဆေးဝါးကွပ်ကဲရေး ဦးစီး ဌာနက သတိပေး ကြေညာထားပြီး ဖြစ်ပါတယ်။
အစာအဆိပ်သင့်မှု ဖြစ်တဲ့ မိသားစုဝင်တွေဟာ ကျူးရပ်ကွက်မှာ နေထိုင်သူတွေ ဖြစ်တဲ့အတွက် စားရေး သောက်ရေး အဆင်ပြေအောင် ကူညီထောက်ပံ့မှုတွေ ဆောင်ရွက်ပေးနေတယ်လို့လည်း ရွှေမြင့်မိုရ် မဟာစည် သာသနာ့ရိပ်သာမှ ဆရာတော် အရှင် ကောဝိဒက မိန့်ကြားပါတယ်။
လက်ရှိမှာတော့ ခွင့်ပြုချက် မရှိတဲ့ အသားချောင်းတွေ ရောင်းချသူ နှစ်ယောက်ကို သက်ဆိုင်ရာက စုံစမ်း ဖော်ထုတ် နေတယ်လို့လည်း သိရပါတယ်။
One News Myanmar
