ရခိုင်လူထု ဒုက္ခမရောက်ရေး စိတ်ရှည်သည်းခံကာ ထိန်းသိမ်းနေ ခြင်း | ZYH News

ရခိုင်လူထု ဒုက္ခမရောက်ရေး
စိတ်ရှည်သည်းခံကာ ထိန်းသိမ်းနေ
ခြင်းဖြစ်ပြီး ပြဿနာဖြစ်လာပါက
တပ်မတော်ကို အဆိုးမဆိုရန် ဗိုလ်
ချုပ်ဇော်မင်းထွန်း သတိပေး

မျိုးကြီး (NP News) - မေ ၁၉

ရခိုင်ပြည်သူလူထု ဒုက္ခမရောက်စေရေးအတွက် စိတ်ရှည်သည်းခံကာ ထိန်းသိမ်းနေခြင်းဖြစ်ပြီး ပြဿနာဖြစ်လာပါက တပ်မတော်ကို အဆိုးမဆိုရန် ဗိုလ်ချုပ်ဇော်မင်းထွန်းက သတိပေးပြောဆိုလိုက်သည်။

နစက၏သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ယနေ့ (မေလ ၁၉ ရက်)၌ ပြုလုပ်သော သတင်းစာရှင်းလင်းပွဲတွင် အထက်ပါကဲ့သို့ ထည့်သွင်းပြောဆိုခဲ့ခြင်းဖြစ်သည်။

လက်ရှိတွင် ရက္ခိုင်အမျိုးသားအဖွဲ့ချုပ်(ULA/AA)၏ ပြောဆိုသောစကားများထဲတွင်တိုက်ပွဲခေါ်နေသည့် ပုံစံမျိုး၊ လက်နက်ကိုင်ပဋိပက္ခကို ဖိတ်ခေါ်နေသည့် ပုံစံမျိုးကိုတွေ့လာရကြောင်း ဗိုလ်ချုပ်ဇော်မင်းထွန်းက ဆိုသည်။

ထို့ပြင် AA အနေဖြင့် ရခိုင်ပြည်နယ်အတွင်းရှိ စစ်ဌာနချုပ်ကို ခြိမ်း ခြောက်သောပုံစံမျိုးပါ တွေ့နေရကြောင်း ၎င်းက ထည့်သွင်းပြောဆိုခဲ့သည်။

“သို့သော် ဘယ်လိုပဲဖြစ်ဖြစ် ဒီအချိန်မှာ ကျွန်တော်တို့လုပ်နေတာက ထိန်းသိမ်းနေတာက ရခိုင်ပြည်သူလူထု ဒုက္ခမရောက်စေချင်လို့ ထိန်း သိမ်းနေတာဖြစ်ပါတယ်။ ထပ်ပြောပါမယ် ရခိုင်ပြည်သူလူထု ဒုက္ခမရောက်စေချင်လို့ ထိန်းသိမ်းနေတာဖြစ်ပါတယ်။ စိတ်ရှည်သည်းခံပြီးတော့ ပြည်ထောင်စုရဲ့ငြိမ်းချမ်းရေးအတွက် လုပ်နေတာဖြစ်ပါတယ်။ အဲဒီအတွက် အခုဖြစ်နေတဲ့ဟာတွေနဲ့ ပတ်သက်ပြီးတော့ ပြဿနာဖြစ် လာရင်တော့ တပ်မတော်ကို အဆိုးမဆိုပါနဲ့လို့ပဲ ကျွန်တော်ပြောချင်ပါ တယ်” ဟု ဗိုလ်ချုပ်ဇော်မင်းထွန်းက ထည့်သွင်းသတိပေးခဲ့သည်။

ယခင်က လက်နက်ကိုင်ပဋိပက္ခများခဲ့သော ရခိုင်ပြည်နယ်တွင် ပြန် လည်ငြိမ်းချမ်းလာသည်ကိုတွေ့ရပြီး ယခုနောက်ပိုင်းတွင် AA အနေဖြင့် အစိုးရ၏ အုပ်ချုပ်ရေးယန္တရားများကို ဝင်ရောက်နှောက်ယှက်လုပ် ဆောင်ခြင်းမျိုးတွေ့ရပြီး အတော်ကိုသည်းငြီးခံနေရကြောင်း ၎င်းက ဆက်လက်ပြောသည်။

ထို့ပြင် ယနေ့ပြုလုပ်သောသတင်းစာရှင်းလင်းပွဲတွင် ဗိုလ်ချုပ်ဇော်မင်းထွန်းက AA အဖွဲ့၏ ခေါင်းဆောင် ဗိုလ်ချုပ်ထွန်းမြတ်နိုင်၏ ပုဂ္ဂိုလ်ရေးအချက်အလက်အချို့ကိုလည်း ထည့်သွင်းပြောဆိုခဲ့သည်။

“ပုဂ္ဂလိကပိုင်းဆိုင်ရာတစ်ခုပြောချင်ပါတယ်။ နိုင်ငံတော်အကြီးအကဲတွေရဲ့ သဘောထားပေါ့လေ ကျွန်တော်ပြောလိုပါတယ်။ ဒီ AA ရဲ့ခေါင်း ဆောင်ဖြစ်တဲ့ ထွန်းမြတ်နိုင်ရဲ့ မိန်းမနဲ့ကလေးတွေ ဆွစ်ဇာလန်မှာရှိပါတယ်။ သူ့ရဲ့အဖေပေါ့နော် ထွန်းမြတ်နိုင်ရဲ့ ယောက္ခမ ဦးစံလှကျော်၊ ယခင်က ရခိုင်လွှတ်တော်ဥက္ကဋ္ဌ၊ ဦးစံလှကျော်က ၂ဝ၂၁ ခုနှစ် နိုဝင်ဘာ လလောက်မှာ သူ့သမီးနဲ့မြေးဆီလိုက်သွားလိုကြောင်း နိုင်ငံတော်စီမံအုပ်ချုပ်ရေးကောင်စီဥက္ကဋ္ဌကို တင်ပြပါတယ်။ ဒါနဲ့ပတ်သက်ပြီး လူသားချင်စာနာထောက်ထားမှု၊ ငြိမ်းချမ်းရေးအကျိုးရှေ့ရှု့ပြီး လွှတ်ပေးလိုက် ပါတယ်။ လွတ်လွတ်လပ်လပ်ပဲ သွားခိုင်းလိုက်ပါတယ်။ ဒါကျွန်တော်တို့ရဲ့ သဘောထားပါ” ဟု ထည့်သွင်းပြောဆိုခဲ့သည်။

AA အဖွဲ့အနေဖြင့် ရခိုင်ပြည်နယ်ရှိ ဘင်္ဂါလီလူမျိုးများနှင့်ပတ်သက်၍ လိုက်လံစည်းရုံးမှုများရှိနေပြီး မည်သည့်အကြောင်းအရာများစည်းရုံးနေသည်ကိုလည်း သိနေကြောင်း ဗိုလ်ချုပ်ဇော်မင်းထွန်းက ဆိုသည်။

တပ်မတော်နှင့် AA လက်နက်ကိုင်အဖွဲ့တို့သည် ပြီးခဲ့သော ၂ဝ၂ဝ ပြည့်နှစ် ရွေးကောက်ပွဲမတိုင်မီအချိန်က ဂျပန်နိုင်ငံ နီပွန်ဖေါင်ဒေးရှင်းဥက္ကဋ္ဌ မစ္စတာဆာဆာကာဝါ၏ စေ့စပ်ညှိနှိုင်းပေးမှုဖြင့် ပစ်ခတ်တိုက်ခိုက်မှုရပ်စဲထားခြင်းဖြစ်ကြောင်း သိရသည်။
#TFM