2022-05-25 13:17:32
နေ့တိုင်း တော်လှန်စိတ်ကို နှလုံးသွင်းပြီး
လောင်မြိုက် မနေနိုင်လို့
ကိုယ့်ဘာသာ မကျေမချမ်း ဖြစ်ရပါတယ်။
ဘာလို့လဲဆိုရင် စစ်အုပ်စုကို ထောက်ခံသူတွေနဲ့ စစ်အုပ်စု နောက်လိုက်တွေဟာ သူတို့ ကျင်လည်ရာ နေရာတွေမှာတော့ ပီဒီအက်ဖ်ကို ထောက်ခံသူတွေ၊ စစ်ဘေးဒုက္ခသည်တွေကို ကူညီထောက်ပံ့သူတွေနဲ့အတူ ဒေါ်အောင်ဆန်းစုကြည် (သို့မဟုတ်) NLD ကို ထောက်ခံသူတွေရဲ့ နေရပ်လိပ်စာတွေ၊ ဖုန်းနံပါတ်တွေ နေ့စဉ်နဲ့မပြတ် ဖော်နေတာ တွေ့ရတာကြောင့်ပါပဲ။
လေ့လာကြည့်တော့ အရင်က ပြည်ထဲရေး ရဲသတင်းပေးတွေဆီက လာတာမျိုးတွေ မဟုတ်ဘဲ စစ်တပ်ကို ထောက်ခံသူ၊ စစ်တပ်အကျိုးစီးပွားနဲ့ တိုက်ရိုက် ဆက်စပ်နေသူတွေက ဒီအချက်အလက်တွေကို ဖော်နေတယ်ဆိုတာကို တွေ့ရပါတယ်။
ဒါပေမယ့် တော်လှန်ရေးအင်အားစုတွေဘက်မှာ သတင်းရရှိမှု အတော် အားနည်းလာပါတယ်။ အရင်ကတော့ စစ်တပ်နဲ့ပတ်သက်ပြီး မြင်မြင်သမျှကို သတင်းပေးကြပေမယ့် ခုနောက်ပိုင်းမှာ သတင်းရရှိမှု အားနည်းတော့ ကွင်းဆက်တချို့ကို ဆက်မရဘဲ ပြတ်တောင်း ပြတ်တောင်းတွေ ဖြစ်နေတယ်လို့ မြို့ပြ၊ မြေအောက်အပြင် NUG လက်အောက်က မိတ်ဖက်အဖွဲ့တွေက ဆိုကြပါတယ်။
ဒါ့အပြင် မီးပြတ်တာ၊ နေ့စဉ်စားဝတ်နေရေး၊ အင်တာနက်အသုံးပြုခ၊ ဖုန်းဘေ၊ ပူလောင်တဲ့ ရာသီဥတု အပါအဝင် နေ့စဉ်အခက်အခဲတွေကြောင့် ပတ်ဝန်းကျင်ကို ဟိုးအရင်ကလောက် သတိမပြုမိတော့ဘဲ အသက်ရှင်ရပ်တည်ရေးအတွက် လုံးပမ်းရတာတွေကြောင့် ပါပါတယ်။
တချိန်တည်းမှာပဲ အညာဒေသမှာတော့ တစ်ရက်တစ်ရက် မီးရှို့ခံရတဲ့ ရွာအရေအတွက် တိုးလာနေသလို သတ်ဖြတ်ခံရသူ ဦးရေဟာလည်း တဖြည်းဖြည်း မြင့်လာနေပါတယ်။ ခုဆိုရင် အညာဒေသက သတင်းတွေဟာ ပြတ်သလောက် ဖြစ်နေပါပြီ။ ဒါကြောင့် ဖုန်းလိုင်းရသေးတယ်၊ အင်တာနက် သုံးလို့ရနေသေးတယ်ဆိုရင် သတင်းပေးပို့မှုကို အနည်းငယ် အာရုံစိုက်ဖို့ လိုမယ်ထင်ပါတယ်။
တော်လှန်ရေးထဲ ထဲထဲဝင်ဝင်ပါနေပြီး သတင်းစုဆောင်းပေးနေကြသူတွေ ရှိပေမယ့်လို့ နေ့စဉ် လှုပ်ရှားသွားလာနေကြတဲ့ သာမန်အရပ်သူ အရပ်သားတွေရဲ့ သတင်းပေးပို့မှုက အဓိက ကျတဲ့နေရာမှာ ရှိပါတယ်။
တချို့ကတော့ ထင်နိုင်ပါတယ်။ စစ်တပ်အရွှေ့အပြောင်း သို့မဟုတ် စစ်ကား ၃ စီးလောက် ကိုယ့်ဘေးနားက ဖြတ်သွားတာ ကိုယ့်အိမ်ရှေ့ကို ဖြတ်သွားတာ ဘာအရေးကြီးမှာလဲလို့ မေးနိုင်ပါတယ်။ အင်မတန် အရေးကြီးပါတယ်။ ဥပမာ တစ်ခု ပြပါ့မယ်။
ကလောမှာ အပန်းဖြေနေတဲ့ လူတစ်ယောက်က စစ်ကား ၆ စီးမြင်လိုက်တာကို ဒီအတိုင်းပဲ ဘာမှ မဟုတ်ဘူးလို့ ထင်နိုင်ပါတယ်။ ဒါပေမယ့် နောက်ကွယ်မှာရထားတဲ့ သတင်းတွေကို ဆက်လိုက်ရင် အဲ့ဒီ ကလောမှာ မြင်လိုက်တဲ့ ကား ၆ စီးက အင်မတန် တန်ဖိုးကြီးသွားနိုင်ပါတယ်။
ဘာလို့ဆိုရင် အဲ့ဒီမတိုင်ခင်က မိတ္ထီလာကနေ စစ်ကား ၆ စီးထွက်သွားပြီး ကလောမှာ သတင်းပေးသူမရှိတော့ ပြတ်သွားပါတယ်။ အဲ့ဒီကနေ အောင်ပန်းမှာလည်း မြင်လိုက်ကြပေမယ့် သတင်းမရတော့ မဆက်စပ်နိုင်တော့ဘဲ သိပ်မကြာခင် တောင်ကြီးမှာ စစ်ကား ၆ စီးတွေ့တယ်ဆိုရင် ဘယ်ကလာတဲ့ကားဆိုတာကို ဒေသခံ ပီဒီအက်ဖ်တွေ မြေအောက်အဖွဲ့တွေတောင် လက်လှမ်းမမီဘဲ မသိတော့ပါဘူး။
ဒီနေရာမှာ စစ်ကား အစီးရေကိုတင် မြင်လိုက်တာ မဟုတ်ဘဲ တပ်သားအရေအတွက်ကို မြင်လိုက်ရင် ပိုပြီး အကျိုးများနိုင်ပါတယ်။ မိတ္ထီလာမှာ ရှိနေတဲ့ တပ်ကထွက်လာတဲ့ ကား ၆ စီးမှာပါလာတဲ့ ပမာဏ (စစ်ထွက်အင်အား) ကို တွက်နိုင်ရင် တပ်ရင်းတပ်မထဲမှာ ကျန်ခဲ့တဲ့ (နောက်ချန်အင်အား) ကိုပါ ခန့်မှန်းနိုင်သလို ထပ်ပြီးတော့ တပ်ရင်းတပ်မ တပ်တွင်းထဲကနေ သတင်းတွေ ရရှိမယ်ဆိုရင်လည်း ကိုင်သွားတဲ့လက်နက်၊ သုံးတဲ့ကျည်ဆန် အမျိုးအစားကအစ တိတိကျကျ သိရှိနိုင်မှာ ဖြစ်ပါတယ်။ (အောက်က ဓာတ်ပုံကို ကြည့်ပါ)
14.0K views10:17
M
