2022-01-20 12:27:14
တာမွေမြို့နယ်တွင် ငွေကျပ်သိန်း ၂၃၀၀ တန်ဖိုးရှိ စိတ်ကြွရူးသွပ်ဆေးပြားများ ဖမ်းဆီးရမိ
ဇန်နဝါရီ ၂၀၊ ၂၀၂၂ (TRN)
ရန်ကုန်တိုင်းဒေသကြီး ၊ တာမွေမြို့နယ်တွင် ငွေကျပ်သိန်း ၂၃၀၀ တန်ဖိုးရှိ စိတ်ကြွရူးသွပ်ဆေးပြားများ ဖမ်းမိကြောင်း မူးယစ်ဆေးဝါးတားဆီးကာကွယ်နှိပ်နှင်းရေး ရဲတပ်ဖွဲ့မှ သတင်းထုတ်ပြန်ထားသည်။
ဇန်နဝါရီလ ၁၉ ရက်နေ့ မွန်းလွဲ ၁ နာရီ ၃၀ မိနစ် အချိန်ခန့်တွင် လုံခြုံရေးတပ်ဖွဲ့၀င်များပါ၀င်သောပူးပေါင်းအဖွဲ့သည် သက်သေများနှင့်အတူ တာမွေမြို့နယ်၊ မအူကုန်းရပ်ကွက်၊ မအူကုန်းလမ်းကျယ်ထိပ်တွင် မော်တော်ယာဉ်များအား ရှာဖွေစစ်ဆေးနေစဉ် စက်ရုံလမ်းဘက်မှ ဗညားဒလလမ်းဘက်သို့ ကျော်စိုးလှိုင် မောင်းနှင်ပြီး ဖြိုးမင်းကျော်(ခ)ကိုဖြိုး လိုက်ပါလာသည့် TOYOTA CROWN အမျိုးအစား မော်တော်ယာဉ်အား ရပ်တန့်စစ်ဆေးရှာဖွေရာ မော်တော်ယာဉ်အတွင်း သိုဝှက်သယ်ဆောင်လာသော စိတ်ကြွရူးသွပ်ဆေးပြား ၂၃၀,၀၀၀ ပြား(ဒေသကာလပေါက်စျေးတန်ဖိုးငွေကျပ်သိန်း ၂၃၀၀)နှင့် လက်ကိုင်ဖုန်း ၂ လုံးတို့အား တွေ့ရှိသိမ်းဆည်းရမိခဲ့သဖြင့် ကျော်စိုးလှိုင်(၄၄)နှစ် နှင့် ဖြိုးမင်းကျော်(ခ) ကိုဖြိုး(၃၆)နှစ် တို့အား ဖမ်းဆီးရမိခဲ့ခြင်းဖြစ်ကြောင်းသိရသည်။
အထက်ပါဖြစ်စဥ်တွင် ဖမ်းဆိးရမိသည့် အမျိုးသား ၂ ဦးအား တာမွေမြို့မရဲစခန်းတွင် မူးယစ်ဆေးဝါးနှင့်စိတ်ကိုပြောင်းလဲစေသောဆေးဝါးများဆိုင်ရာ ဥပဒေအရ အမှုဖွင့်အရေးယူထားရှိပြီး ကွင်းဆက်များ ဖော်ထုတ်လျက်ရှိကြောင်း မူးယစ်ဆေးဝါးတားဆီးကာကွယ်နှိပ်နှင်းရေး ရဲတပ်ဖွဲ့မှ သတင်းထုတ်ပြန်ထားသည်။
455 viewsZaw Yu Htoon, 09:27