2021-06-17 15:55:24
للمهتمين بالسياسة:
وثائقي جديد من vice news يحجي عن إيران ودورها بحرب الوكالة الي دتصير بالشرق الاوسط وتأثيراتها على العراق ب٤٥ دقيقة
هذا الوثائقي الي واضح صارله فترة طويلة ديتصور، عبارة عن محاولة لمعرفة طريقة رعاية ايران لمصالحها ونفوذها بالدول العربية الي مسيطرة عليها خصوصا بعد مقتل مهندس النفوذ: قاسم سليماني والمسؤل الابرز عن سلاح ايران الفتاك: محسن فخري زاده
بالبداية صار حديث عن اغتيال فخري زادة ومحاولات ثانية لإستهداف علماء آخرين وصار لقاء مع احد الناجين من وحدة من العمليات وانطى رأيه باللي جاي يصير
بعدين صار الحديث عن الحرب ضد داعش والدور الايراني بيها وتدخلهم بسوريا والعراق ورأي مقربين من الحكومة بالدور الامريكي الي يعتبرون وجودهم عبثي وانهم غير جادين بالقضاء على داعش.. ايضا يلتقون بمقاتل داعشي ايراني تدرب بسوريا وحاول يتسلل لإيران وينفذ عمليات ارهابية بطهران لكن انلزم وانحكم بالإعدام ب٢٠١٣
النصف الثاني من التقرير راح يكون مخصص للعراق وتبيان مدى نفوذ إيران وتأثيرهم على الحشد الشعبي وقادته..
فيلتقون بالمتحدث بإسم الحشد مهند العقابي (الي انصح تشوفون بيته وشنو هواياته وشنو من حيوانات يمتلك) ويسألوه عن تأثير قاسم وابو مهدي عليه فيجاوب كانوا كالمعلمين بالنسبة الي..
وراها المراسل يلتقي بهادي العامري قائد فيلق بدر الي طبعا هو ass kisser مال ايران.. حتى المذيع يبسمره يكله اني بحياتي مشايف احد مولود بالعراق ويروح لإيران يقاتل ضد بلده.. فيكعد الحجي يلوص..
المهم يخلص اللقاء واني ماخذ فكرتين:
إن النفوذ الايراني بالخارج ما يتعلق بشخص قدر ما هو خطة واضحة منظمة مكتوبة ومدروسة من زمان.. فحتى وان مات خامنئي تصدير الثورة يبقى موجود واذرعهم منتعشين دائماً الى ان يسقط الحكم الثيوقراطي بإيران وراها يمكن يتغير الوضع..
الذيول العراقيين حافظين ما فاهمين.. بحيث الاب المؤسس للخيانة والعمالة في العراق من ١٩٧٩، هادي العامري، ما تكدر تفهم شي من حجيه غير إن هو يحب ايران وهاهية بدون شروط وتبريرات..
وبصورة عامة هو والعقابي وكل افراد الحشد ومحبيهم الي التقى بيهم حجيهم عبارة عن خرط غير مفهوم.. عكس الايرانيين متحدثين واصحاب فكرة واسلوب حواري قد يكون مقنع احيانا!
عموما الوثائقي مثير للاهتمام وانصح بيه مثل كل وثائقيات vice الي الها مكان خاص بقلبي من ناحية المواضيع الي يتناولوها وحساسيتها.. وحتى نوعية الناس الي يتلقون بيهم ما موجودة هواي بالاعلام الغربي
41 views12:55
𝐅
