2022-10-24 23:22:18
السلام عليكم ورحمة الله وبركاته
طلبتي الاعزاء طلبة ثالثة بشري الدفعة 47 كلية الطب البشري - بنغازي
اولاً الف الف الف الف مبرووووووووك لكل الطلبة الناجحين تستاهلوا الفرحة بالنجاح علي مجهودكم الكبير المبذول خلال سنة ثالثة بشري الي تعتبر اكثر سنة محتاجه مجهود لاجتيازها ودابنك طلعت من ثالثة معناها انت تخرجت لأنك اجتزت اصعب اختبار الي هو سنة ثالثة الي بعدها كله ساهل مقارنةً بثالثة وان شاءالله نتلاقوا في مواد ثانية خلال السنوات القادمة يا رب العالمين
ثاني شي بخصوص الطلبة الي عندهم فرصة ثانية ياريت ياريت اتمسكو بفرصتكم وتبذلو مجهود في الدراسة على أكمل وجه لكي تلتحقوا بزملائكم وتخشو كلكم سنة رابعة باذن الله تعالى الموضوع بسيط بس يبي شوية همة وتحط عقلك في راسك وتبطل تشغل وقتك بأشياء مُلهية وتخلي تركيزك كله على دراستك واجتيازك للامتحانات باذن الله تعالى
نحب نعتذر للجميع على قلة التواصل والتأخر في الرد على المسجات بس بعد روحنا من تونس صارن ظروف اجتماعية جديدة في اسرتنا مما صعب عليا التواصل ووقفت شغلي كله من شهر حوالي بسبب هذه الظروف ونسأل الله ان تكمل سنة 2022 م علي خير لانها اكثر سنة مريت فيها بظروف صعبة ..
بخصوص الباثولوجي نحب نشكر كل طلبتي الي حضرو معايا باثولوجي خلال السنة الدراسية او حتى الي سمع محاضراتي وشكرني او دعالي بالخير (الشكر موصول للجميع) ونعتذر على عدم تكملة كل الكورسات ولكن الحمدلله كل طلبتي في الباثولوجي صفوا ومن الدور الأول ونسبة نجاح الباثولوجي كانت 50% وان شاءالله مستمرين في المادة للسنة الجاية وحنبدا فيها من بداية السنة من اول كورس في الجنرال باذن الله تعالى
بخصوص الباراسيتولوجي فنحب نشكر كل طلبتي الي حضرو معايا خلال السنة سواء في المعهد الدولي او في معهد التدارك واستفادوا من محاضراتي وشيتاتي وصفو البارا وانا فخور بيكم فعلاً خصوصاً ان عندي طلبة في الاوائل والحمدلله كل سنة عندي طلبة في الاوائل بفضل الله بالنسبة للباراسيتولوجي نسبة النجاح فيها كانت 40% ونسبة نجاح المايكرو كانت 46% بس الغريب والي ما لقتلش تفسير ان كل الدوة والشو والقطاف واخذته البارا وكأن نسبة نجاح المايكرو عالية بكل بصراحة شي غريب ومالقتلش تفسير .
744 viewsAhmed El Zalitni, 20:22