پروفسور زهتابینین، ناظیم حیکمتله باغلی بیر خاطیره و شعری ••• | ibrahim savalan
پروفسور زهتابینین، ناظیم حیکمتله باغلی بیر خاطیره و شعری ••• استالین دیکتاتورلوغو دؤورو آذربایجاندا 60 نفر شاعیر و یازیچی، گوناهسیز اولاراق، خالق دوشمنی آدی ایله تسویه ائدیلمیشدیر. اونلار یا میکاییل موشفوق کیمی باکینین چکاسی سئللوللاریندا، ائرمنی یئمیلیانوفون گوللهسی ایله محو ائدیلمیش، یادا حسین جاوید کیمی اوزون مدتلی زیندانلارا محکوم اولاراق، سیبیریادا آدسیز و ایزسیز شکیلده اؤلوب و یا اؤلدورولوب آرادان گئتمیشلر.
استالین اؤلندن 4 ایل سونرا، 1957 ده حسین جاویده برائت قازاندیریلدی و او مناسیبتله باکی اونیورسیتهسینده حسین جاویدین عاییلهسیندن قالان تکجه قیزینین حضورو ایله، رسمی ییغینجاق کئچیریلمیشدی. دونیا شهرتلی تورکییه شاعیری ناظیم حیکمت ده او مراسیمه قاتیلمیشدی. ناظیم حیکمت تریبون آرخاسیندا اورک یانغیسی ایله بئله دئمیشدی: «یازیق و زاواللی بو کیچیک خالق کی، اونون اونلارجا ادیب و دراماتورق، اوستاد و عالیملرینی هئچدن آرادان آپارمیشلار، آمما بونا باخمایاراق آذربایجان خالقی یاشامیش و یاشایاجاقدیر. خالقلار، میللتلر و عموم بشریت تاریخ بویو ییخیلیب- دوراراق ایرهلیلهمیشدیر.» ناظیم حیکمت دانیشیغینین سونوندا ائله همن موناسیبتله قلمه آلدیغی «اینییور کاییک چیکییور کاییک» شعرینی اوخوموشدو.
او مراسیمه قاتیلانلاردان بیری ده، او گونلرین طلبهسی، سونرالارین پروفسور محمدتقی زهتابیسی ایدی. زهتابی ناظیمین او گلیشینه گؤره بو شعری سؤیلهمیشدی:
کؤنول سوسما، میضرابینی آل گؤرک ندن دورموسان، سازینی چال گؤرک بیز تورک اوستادی مهمان گلیب؛ بو گلمکله چون بیزلره جان گلیب.
او دردلهشمهیه همزبان آختاریر، وطندن اوزاق قلبی قان آختاریر. گل ای شاعیریم دردلهشک بیز زامان، بو ایمکانی هر وقت وئرمز جهان.
بوتون عؤمرونو خلقیمه حصر ائدن، همیشه ائلیمله برابر گئدن، یولوندا عؤمور قویدوغون اؤلکهنین، گؤزل یوردونون، داغلی تورکییهنین، داغیندان، داشیندان سؤز آچدیقدا سن، گؤزوم قارشیسیندا دایاندی وطن.
اؤز ایستانبولوندان سؤز آچدیقدا سن، زورا، ظولمه هئچ وقت باش اَیمهین. حایات عاشیقی چارپیشان تبریزیم، ووقارلی، قوجا، قهرمان تبریزیم، او ایلکین بئشیک، هم ده سون مسکنیم، گلیب کئچدی بیردن گؤزومدن منیم.
سن ایستانبولون کئچمیشیندن دئدین کئچن صنعتیندن، ایشیندن دئدین، هوسله سنی دینلهدیم گرچی من، غرور ایله خاطیرلادیم ارکی من. بیز ایستانبولا تارلا مهمان سیزه، سیز اؤز شارکینیزلا قوجا تبریزه. ---------- @ibrahimsavalan