پروفسور زهتابینین بوتون قوهوملاری او اینسانی اورکدن سئویب اون | ibrahim savalan
پروفسور زهتابینین بوتون قوهوملاری او اینسانی اورکدن سئویب اونونلا غرور دویورلار. اونلار زهتابینی قبرستاندا دا بئله تک قویماییبلار و زهتابینین مزارینین کناریندا اولان مزارلارین هامیسی، پروفسورون یاخین قوهوملاری حئساب اولان زهتابی، اقدسی و رستمزاده عاییلهلرینه عاییدیر. بو ایش او سببدن اؤنملیدیر کی بیر زامانلار زهتابینین مزارینا بینا تیکمک مومکون اولسا، او مزارین اطرافیندا باشقا ایسنانلارا عایید مزار اولماز و کیمسه مانع اولمادان، او دیل و تاریخ قایناغینا مزار بیناسی تیکمک مومکون اولار.
اؤنجهلر یازمیشدیق کی زهتابی عاییلهسی، زهتاب یا همن کیریشچی ایمیشلر و محض بونا گؤره، پروفسور زهتابی یازیلارینی «کیریشچی» ایمضاسیله یازمیشدی. کئچن نئچه ایلده، او مرحومون قوهوملاری، او عاییلهنین یاشادیغی کوچهنین آدینی «کیریشچیلر کوچهسی» آدلاندیریبلار. و بیز بو بهانه ایله، پروفسور زهتابینین قوهوملاری، او جوملهدن زهتابی، اقدسی، رستمزاده، روزبه و باشقا عاییلهلره، او داهی اینسانین میراثینی دوام ائتدیردیکلرینه گؤره، ساغول دئییب شوکرانلاریمیزی بیلدیریریک.