ကမ်းခြေ နဲ့ သဲဖြူတန်ဖိုး ================= ကျနော် | Thurein
ကမ်းခြေ နဲ့ သဲဖြူတန်ဖိုး
=================
ကျနော်က အညာသားစစ်စစ် ဖြစ်ပြီး ဧရာဝတီမြစ်ဘေး ကျင်လည်ခဲ့သူတယောက်ဖြစ်ပါတယ် ။ ရေကျချိန် နွေ နဲ့ ဆောင်းမှာ မြစ်ဘေးက ဖြူဖွေးနေတဲ့ သဲသောင်ပြင်ကြီးကို တပင်တပန်း ဖြတ်သန်းပြီးမှ ရေရှိတဲ့ မြစ်ထဲ အရောက်သွားကြရတာ မှတ်မိပါတယ် ။
ဒီတော့ ကျနော့်စိတ်ထဲမှာ သဲဖြူဆိုတာ ရေစပ်စပ် ရှိတိုင်း ပေါများစွာ ရနိုင်တဲ့ အရာလို့ မှတ်ယူပြီး တန်ဖိုးမထားခဲ့ပါဘူး ။
ရပ်ကွက်ထဲက ချောင်းထဲမှာလည်း သဲဖြူဆိုတာ ဖောချင်း သောချင်းကိုးဗျ ။ ကိုယ့်အိမ်မှာ အိမ်သာကျင်းတူးရင်ကိုပဲ သဲဖြူထွက်တဲ့ နေရာက ချက်မြှပ်ဖြစ်နေတော့ကား တန်ဖိုးမထားမိခဲ့တာ မဆန်းပါဘူး ။
ရုပ်ရှင် video တွေ ကြည့်တော့လည်း ပင်လယ်ကမ်းစပ်မှန်သမျှ သဲဖြူတွေ ဖွေးနေတော့ကား သြော် ပင်လယ်ကမ်းခြေ ဆိုတာလည်း ဖြူဖွေးနေတဲ့ သဲတွေချည်းပါလားလို့ ထင်မှတ်ခဲ့ပါတယ် ။
တနှစ်သားဆီက ကျနော် အလုပ်ကိစ္စနဲ့ ချောင်းသာ နဲ့ ဂေါ်ရင်ဂျီ ကျွန်းကြားက ပင်လယ်ကမ်းစပ်တလျှောက်ရှိ ကျေးရွာတွေဆီကို ရက်အတော်ကြာကြာ ရောက်ခဲ့ရပါတယ် ။
အုန်းခြံတွေ လိုက်ကြည့်ပြီး စျေးနှုံးတွေ မေးကြည့်တော့ အုန်းသီး အထွက်ကောင်းဖို့ထက် ခြံရှေ့က ဖြူဖွေးနေတဲ့ သဲသောင်ပြင် နဲ့ ကျယ်ဝန်းမှု အပေါ် မူတည်ပြီး စျေးကွာသွာတာ တွေ့ရပါတယ် ။ ဘယ်လောက် ကွာသလဲဆိုရင် တဧက သိန်း ၇၀၀ ကနေ သိန်း ၁၅၀၀ အထိ ရှိလေတော့ နှစ်ဆကျော် ကွာဟနေပါပြီ ။
ကျနော့်စိတ်ထဲ တန်ဖိုးမထားခဲ့တဲ့ ပေါများစွာ ရှိနေတဲ့ သဲဖြူဟာ သူ့နေရာနဲ့သူ အရေးပါနေတာ သတိထားမိလာပြန်ပါတယ် ။
နောက် မနှစ်က ကျနော် ဆယ်မိုင်ကမ်းခြေ နဲ့ ခရုကျွန်းကို ရောက်ခဲ့ပါတယ် ။ အင်မတန်သာယာပြီး ကျယ်ပြန့်တဲ့ သဲသောင်ခုံတွေ နဲ့ ကမ်းခြေတွေပဲ ဖြစ်ပါတယ် ။
စားသောက်ဆိုင် များစွာ တွေ့ရပေမယ့် ကိုဗစ်ကာလမို့ စည်ကားမှုတော့ မရှိပါဘူး ။ ထူးခြားတာက သဲသောင်ခုံတွေ လှပစွာ ရှိနေပေမယ့် ပင်လယ်ရေက နောက်ကျိနေတာ တွေ့ရပါတယ် ။
ကမ်းစပ်မှာက နှုံးတွေ နွံတွေ နဲ့ ဆိုတော့ ရေဆော့ဖို့ အဆင်မပြေတာ တွေ့ရပြန်ပါတယ် ။ ဒီတော့မှ သြော် ပင်လယ်ကမ်းစပ်ဆိုတာ ငါထင်သလို အမြဲတမ်း ဖြူဖွေးနေတဲ့ သဲသောင်တွေ နဲ့ ကြည်လင်နေတဲ့ ရေတွေချည်း တည်ရှိနေတာ မဟုတ်ပါလားလို့ အညာသားကျနော် သိလိုက်ရပါတယ် ။
မြန်မာပြည် မြေပုံကို ပြန်ကြည့်လိုက်ပါက မြေပြင် ဧရိယာ တဝက်နီးပါး ဟာ ပင်လယ်နဲ့ ထိစပ်နေတဲ့ ရှည်လျှားသော အဖိုးတန် ကမ်းရိုးတန်းဒေသဖြစ်ကြောင်း ထင်ရှားစွာ တွေ့မြင်ရပါမယ် ။
သို့သော် စီးပွားဖြစ် လည်ပတ်နိုင်ရန် အဆင်ပြေသော
(လမ်းပန်းဆက်သွယ်ရေး ၊ လုံခြုံရေး ၊ သဲသောင် နဲ့ ကြည်လင်သောကမ်းစပ်) အပန်းဖြေကမ်းခြေ ဘယ်လောက်များများ ရှိနေပြီလဲဆိုတာ စိတ်ဝင်စားစရာပါပဲ ။
ယခုလက်ရှိအချိန်ထိ အင်မတန် နည်းနေသေးတာ တွေ့ရပါတယ် ။ ဒါတွေက ကျနော်မြင်တွေ့ခဲ့ရတဲ့ အမြင်တွေပဲ ဖြစ်ပါတယ် ။
သို့သော် ခေတ်ကာလ ပြောင်းလာတာနဲ့ အမျှ ကျနော်တို့ ငယ်စဥ်က ပေါများစွာ မကုန်နိုင် မခမ်းနိုင် တည်ရှိခဲ့ပါသော ပြောင်းပြာချောင်း နဲ့ စွန်းလွန်းချောင်း ရှိ သဲဖြူများဟာ ဆောက်လုပ်ရေးလုပ်ငန်းသုံးစွဲမှုကြောင့် မယုံနိုင်ဖွယ် ကုန်ခမ်းသွားရချေပါပြီ ။
ရာသီသုံးပါးလုံး ရေမပြတ်ခဲ့တဲ့ ချောင်းကြီးတွေဟာ မိုးရာသီမှာ ရက်အနည်းငယ်သာ စီဆင်းနိုင်တော့တဲ့ မြောင်းသာသာဘဝ ရောက်သွားရပါပြီ ။
ဧရာဝတီဘေးမှာတော့ သဲသောင်တွေ ရှိနေဆဲပါပဲ ။ သူကတော့ တနှစ်ကို နှစ်ကြိမ် ပုံမှန် ရေကြီးမယ် အနယ်ချမယ် ၊ မြစ်ညှာက သဲတွေ သယ်လာမယ် ဆိုတဲ့ သံသရာလည်တဲ့ စက်ဝန်းရှိနေတာကိုး ။
မြစ် ချောင်း အင်းအိုင် နဲ့ ပင်လယ်ကမ်းစပ် ရှိ ဖြူဖွေးနေတဲ့ သဲတွေနဲ့ ပတ်သက်ပြီး သံဝေဂရမိတာကတော့......
၁ ။ အကာအကွယ်မရှိ ၊ ဖြည့်ဆီးမှု မရှိ ဖြစ်ခဲ့ရင် အတိတ်က မကုန်ခမ်းနိုင်ဖူးလို့ ယူဆခဲ့တဲ့ သဲထုကြီးလည်း ပြောင်းပြာချောင်း နဲ့ စွန်းလွန်းချောင်းလို့ ကုန်ခမ်းပျက်စီးသွားနိုင်ပါတယ် ။
၂ ။ ဧရာဝတီကတော့ သူ့ခွန် သူ့အား နဲ့ ရာသီစက်ဝန်းအတိုင်း အထက်မြစ်ညှာကနေ သဲဖြူတွေ အဆက်မပျက် ပို့ချပေးနိုင်လို့ ဥပတိရုပ် မပျက်နေနိုင်သေးကြောင်း သိရပါတယ် ။
၃ ။ ပင်လယ်ကမ်းစပ်ကြီး ဘာ်လောက်ကြီးမားရှည်လျှားနေပါစေ ဖြူဖွေးတဲ့သဲသောင် နဲ့ ကြည်လင်တဲ့ ကမ်းစပ် နည်းနည်းပဲ အသုံးချနိုင်သေးတာကြောင့် ထပ်မံရှာဖွေ မြှောက်စားပေးဖို့ လိုနေသေးကြောင်း သိရပါတယ် ။
မကုန်ခမ်းနိုင်ဖူးလို့ ယူဆခဲ့ဖူးတဲ့ သဲဖြူဖြူရဲ့ နေရာမှာ ကျနော်တို့ နိုင်ငံရဲ့သားကောင်းလေးတွေကို အစားထိုးကြည့်မိရင်ဖြင့်.........
ကိုရွှေမျိုးဝင်း
