2022-07-05 20:28:11
شوفوا الطالب إذا صحى بنص وقت الدراسة على نفسه وعرف إنو مقصر ودرجاته كلها قليلة ورسوب
راح يلحگ يتدارك نفسه
ويعدّل هالدرجات
يشد حيله ببقية الامتحانات الشهرية واليومية وينجح ويعوض الشهريات اللي رسب بيهن بسبب تهاونه
بالعكس حتى الأساتذة راح يساعدونه ويوگفون وياه من يشوفون مستواه تحسّن راح يضلون يعيدوله امتحانات
وتنحسب له مثلاً الدرجة الأعلى
أو الدرجة العالية مال شهرين وووو
إلا أن يحقق النجاح بالنهاية بإجتيازه المرحلة اللي هو بيها
وهنا يكون هو الرابح
لأن گلنا تدارك نفسه وأدّى تكليفه وعوّض .
بينما إذا چان ندمه بالنهاية فما راح يفيده بشيء مطلقاً لأن فات الأوان للتعويض والتدارك.
بالضبط نفس الشيء الإنسان بالدنيا
إذا صحى على نفسه بهالدنيا
وشاف نفسه إنو بعيد عن طريق رب العالمين رأساً تندم وذرف الدموع وتاب وعوّض كل سنين التقصير (اللي اقترف بيها الذنوب)
مثلاً مطلوب صلاة ..قضاها
صيام..قضاه.
خمس ..أخرجه
حقوق للناس..رجّعهن
تقصير وي الأهل ..أحسن معاملتهم.
ابتعاد عن القرآن..رجع يقراه وخصصله وِرد اله
مقصر بمعرفة عن أهل البيت والبحث عن علومهم وتعلّمها ..راح تعلّم وبحث وزاد ارتباطه بالعترة الطاهرة ع.
فقطعاً إذا هيجي سوّا راح يكون من الرابحين مثل الطالب الحجينه عنه
ورب العالمين هو اللي راح يساعده ويتقبّله بحب لأن شاف مستواه بطاعة الله وأهل البيت تحسّن فراح يكون من المحبوبين والمقربين لله التائبين المتطهرين ..
بينما إذا لا بالموت تندم
ماراح يستفاد
ويكون من الخاسرين
{ حَتَّى إِذَا جَاءَ أَحَدَهُمُ الْمَوْتُ قَالَ رَبِّ ارْجِعُونِ * لَعَلِّي أَعْمَلُ صَالِحًا فِيمَا تَرَكْتُ كَلا إِنَّهَا كَلِمَةٌ هُوَ قَائِلُهَا وَمِنْ وَرَائِهِمْ بَرْزَخٌ إِلَى يَوْمِ يُبْعَثُونَ } [المؤمنون 99 - 100] .
120 viewsنرجس مازن الميالي, 17:28