ရန်ကုန်တွင် "ပြန်ဆုံနိမိတ်နဲ့ ရန်ကုန်သပိတ်" ကြွေးကြော်ပြီး ဆန္ဒပြ ================== ဂန္ဒမာ (မဇ္ဈိမ) ။ ။ ရန်ကုန်မြို့ တစ်နေရာ၌ မြေပြင်သပိတ်အင်အားစုများက ယနေ့ ဇွန်လ ၅ ရက်နေ့တွင် "ပြန်ဆုံနိမိတ်နဲ့ ရန်ကုန်သပိတ်" ဗီနိုင်းကို ကိုင်စွဲပြီး ပြောက်ကျားသပိတ် ဆင်နွှဲခဲ့ကြောင်း သိရသည်။ "ရန်ကုန်ကနေ ထွက်ခွာသွားတဲ့ တော်လှန်ပြည်သူတွေနဲ့ ချစ်ရတဲ့မိသားစုတွေ ရန်ကုန်မှာ ပြန်ဆုံမယ့်နိမိတ်၊ အကျဥ်းထောင်ထဲက ရဲဘော်တွေနဲ့ မြို့ပြက လမ်းတွေဟာ ပြန်ဆုံမယ့်နိမိတ်၊ မြေပေါ်မြေအောက်အင်အားစုတွေ ပြန်ဆုံစည်းမယ့် နိမိတ်ကို ယူဆောင်လာမယ့် ရန်ကုန်သပိတ်တွေအဖြစ် ရည်ရွယ်ပြီး အကြမ်းမဖက်စစ်အာဏာရှင်ဆန့်ကျင်ရေး ရန်ကုန်သပိတ်တိုက်ပွဲတွေ ဆင်နွှဲလျက်ရှိပါတယ်" ဟု ရေဘဝဲ ပြည်သူ့အကျိုးပြုလူငယ်အဖွဲ့အစည်း ဥက္ကဋ္ဌက မဇ္ဈိမကို ပြောသည်။ သပိတ်ထွက်ရန်အတွက် လုံခြုံရေးအရ အခက်အခဲများရှိသော်လည်း တော်လှန်ရေးယုံကြည်ချက်၊ နိုင်ငံရေးခံယူချက်များကြောင့် အကြမ်းဖက်စစ်ကောင်စီ၏ နားရွက်အား ပြန်ဆုံနိမိတ်နဲ့ ရန်ကုန်သပိတ်၏ အင်အားဖြင့် အကြိမ်ကြိမ်အောင်မြင်စွာ တံတွေးစွတ်နိုင်ခဲ့ကြောင်းလည်း ရေဘဝဲ ဥက္ကဋ္ဌက ပြောသည်။ အဆိုပါ သပိတ်အား ရေဘဝဲ ပြည်သူ့အကျိုးပြုလူငယ်အဖွဲ့အစည်းနှင့် မဟာမိတ်အဖွဲ့အစည်းများ ဖြစ်သော အခြေခံပညာကျောင်းသားလူငယ်များအစည်းအရုံး(အကလ-မြေပြင်) ၊ Labour Alliance အဖွဲ့ဝင် (CTUM) ၊ စမ်းချောင်းပင်မ သပိတ်စစ်ကြောင်းတို့ ပူးပေါင်းကာ စစ်အာဏာရှင် ဆန့်ကျင်သည့် လှုပ်ရှားမှု ပြုလုပ်ခဲ့ခြင်း ဖြစ်သည်။ အကြမ်းဖက်စစ်ကောင်စီ၏ လုံခြုံရေးတင်းကျပ်မှုများအကြားတွင် ရေဘဝဲနှင့် မဟာမိတ်အဖွဲ့အစည်းများ၏ ပြန်ဆုံနိမိတ်နဲ့ ရန်ကုန်သပိတ်ကို ကိုးကြိမ်မြောက် ဆောင်ရွက်နိုင်ခဲ့ပြီဖြစ်ကြောင်းလည်း ဆိုသည်။ အာဏာသိမ်း စစ်ကောင်စီတပ်၏ လက်နက်ကိုင် အစောင့်စစ်သားများ စောင့်ကြည့်နေသည့်ကြားက ရန်ကုန်တွင် ယခုကဲ့သို့ ပြောက်ကျားသပိတ်ထွက်နိုင်ရန် Youth Scout for Democracy (Y.S.D) မှ မြေပြင်ကင်းထောက်ပံ့ပိုးမှုပေးခဲ့ကြောင်း သိရသည်။ စာတည်း။ ။ နောင်နောင် #ရေဘဝဲ #ရန်ကုန် #စစ်အာဏာရှင်ဆန္ဒပြ #Mizzima ------------------------ လွတ်လပ်တဲ့ မီဒီယာအဖြစ် ရပ်တည်နိုင်ရေး မဇ္ဈိမကို ဝိုင်းဝန်းကူညီပေးဖို့ ဖိတ်ခေါ်ပါတယ်။ သင်ရဲ့ ကူညီမှုကို အောက်ပါလင့်ကို နှိပ်ပြီး လုပ်ဆောင်နိုင်ပါတယ်။ https://bit.ly/2VhJ12U 721 views13:46
