ဗဟိုဘဏ်၏ နိုင်ငံခြားငွေ စည်းမျဉ်းသစ်ကြောင့် စက်သုံးဆီဈေး ကျပ် | Myanmar Ebooks

ဗဟိုဘဏ်၏ နိုင်ငံခြားငွေ စည်းမျဉ်းသစ်ကြောင့် စက်သုံးဆီဈေး ကျပ် ၂၀၀ နီးပါး ရုတ်တရက်ကျဆင်း

ဧပြီလ ၃ ရက်နေ့ ရက်စွဲနဲ့ ဗဟိုဘဏ် ထုတ်ပြန်ခဲ့တဲ့ ၁၂ /၂၀၂၂ အမိန့်ကြော်ငြာစာပါ စည်းမျဉ်းအသစ်က စက်သုံးဆီဈေးကွက်ကို ရိုက်ခက်ခဲ့ပြီး နှစ်ရက်အတွင်း တစ်လီတာ ကျပ် ၂၀၀ ခန့် ဈေးပြုတ်ကျသွားပါတယ်။

လွန်ခဲ့တဲ့ နှစ်ရက်က ပြည်တွင်းစက်သုံးဆီဈေးကွက်အတွင်း အမျိုးအစားအလိုက် တစ်လီတာကို ကျပ် ၁၉၂၅ မှ ၂၁၆၅ ကျပ် ရှိခဲ့ပေမယ့် ယနေ့မှာတော့ ၁၇၃၀ ကျပ်မှ ၁၉၇၀ အတွင်းသာ ဖြစ်ပေါ်လျက်ရှိနေပါတယ်။

ဗဟိုဘဏ်ရဲ့ ပြည်ပက နိုင်ငံခြားသုံးငွေဖြင့် ရရှိတဲ့ ဝင်ငွေတွေကို မြန်မာကျပ်ငွေအဖြစ် လဲလှယ်ရောင်းချပေးရမယ်ဆိုတဲ့ သတ်မှတ်ချက်က ပို့ကုန်လုပ်ငန်းရှင်တွေအပေါ် သက်ရောက်မှုရှိခဲ့ပေမယ့် ကုန်ပစ္စည်းတင်သွင်းသူတွေအနေနဲ့တော့ အသက်ရှုချောင်စေခဲ့ပါတယ်။

သွင်းကုန်လုပ်ငန်းရှင်တွေအနေနဲ့ အရေးကြီးကုန်စည်အလိုက် ဘဏ်တွေထံက ကန်တစ်ဒေါ်လာကို ကျပ် ၁၈၅၀ ဖြင့် ဝယ်ယူနိုင်မှာဖြစ်တာကြောင့် နိုင်ငံခြားငွေ အလုံအလောက်သာ ရောင်းချပေးနိုင်လျှင် ဒေါ်လာဖြင့် ဝယ်ယူနေရတဲ့ စက်သုံးဆီအပါအဝင် စားသုံးဆီ၊ ဆေးဝါး၊ ဆောက်လုပ်ရေးသုံး၊ လူသုံးကုန်ပစ္စည်းဈေးနှုန်းတွေ ကျဆင်းလာနိုင်တယ်လို့ သုံးသပ်မှုတွေ ရှိနေပါတယ်။

ပြည်ပပို့ကုန်အမယ်တွေရဲ့ FOB & CFR ဈေးနှုန်းတွေက ပြောင်းလဲမှုမရှိဘဲ နိုင်ငံခြားငွေလဲနှုန်းက ၁၀.၈ ရာခိုင်နှုန်း လျော့ကျသွားတာကြောင့် ကုန်ကြမ်းဝယ်ယူတဲ့အခါ တွက်ချေကိုက်အောင် ဝယ်ယူရမှာဖြစ်ပြီး အဆိုပါ ကုန်ပစ္စည်းတွေ ဈေးနှုန်းကျဆင်းမှု ဖြစ်ပေါ်နိုင်တယ်လို့ သိရှိရပါတယ်။

ပြည်ပသို့ နိုင်ငံခြားငွေ အသုံးပြုပြီး သွင်းကုန်အတွက် ပေးချေခြင်း၊ ဝန်ဆောင်မှုနှင့် အခြားစရိတ်များအတွက် ပေးချေခြင်း၊ ပြည်ပရင်းနှီးမြှုပ်နှံမှုအတွက် အမြတ်ဝေစုပေးပို့ခြင်းနှင့် ရင်းနှီးငွေပြန်လည်ပေးပို့ခြင်း၊ ပြည်ပတွင် ရင်းနှီးမြှုပ်နှံမှုအတွက် လွှဲပြောင်းခြင်း၊ ပြည်ပချေးငွေနှင့် အတိုးများ ပြန်လည်ပေးဆပ်ခြင်း၊ အသုံးစရိတ်တွေ လွှဲပို့ခြင်းများအတွက် နိုင်ငံခြားသုံးငွေကြီးကြပ်မှုကော်မတီရဲ့ ခွင့်ပြုချက်ယူရမယ်ဆို့ ညွှန်ကြားထားပါတယ်။

ကော်မတီရဲ့ ခွင့်ပြုချက်ရမယ်ဆိုရင် AD လိုင်စင်ရ ဘဏ်တွေအနေနဲ့ တစ်ဒေါ်လာကို ၁၈၅၀ ကျပ်ဖြင့် ရောင်းချပေးရမှာဖြစ်ပြီး ဝန်ဆောင်စရိတ်အဖြစ် AD ဘဏ်တွေကို တစ်ဒေါ်လာအတွက် ၃ ကျပ် ထပ်ဆောင်းပေးရမယ်လို့ သတ်မှတ်ထားပါတယ်။

BETV Business