2021-07-24 19:18:48
“စစ်အုပ်ချုပ်ရေးကာလများအတွင်း မြန်မာ့သဘာဝသယံဇာတများ ပျက်စီးဆုံးရှုံးမှုအား ဆန်းစစ်လေ့လာခြင်း” အစီရင်ခံစာ
+++++++++++++++++++++++++++++++
အနှစ်ချုပ်
မြန်မာနိုင်ငံသည် သယံဇာတပေါကြွယ်ဝသည့်နိုင်ငံတစ်နိုင်ငံဖြစ်သော်လည်း ဖွံ့ဖြိုးမှုအနည်းဆုံး၊ အဆင်းရဲဆုံးနိုင်ငံများစာရင်းတွင် ပါဝင်နေပေသည်။ ၂၀၂၁-ခုနှစ်၊ ဖေဖော်ဝါရီလ (၁)ရက်နေ့တွင် နိုင်ငံတော် ကာကွယ်ရန်အတွက် တာဝန်ရှိသည့် စစ်တပ်သည် ပြည်သူလူထုက ရွေးကောက် တင်မြောက်ထားသည့် နိုင်ငံ့ခေါင်းဆောင်များအား မတရားဖမ်းဆီးခဲ့ပြီး နိုင်ငံတော်အာဏာကို အဓမ္မ သိမ်းယူခဲ့ပြန်သည်။ အာဏာသိမ်းမှု နောက်ဆက်တွဲအနေဖြင့် ပေါကြွယ်ဝသည့် မြန်မာ့ သယံဇာတများ ထပ်မံဆုံးရှုံးမှု ဖြစ်ပေါ်လာမည့် အနေအထားများ ရှိလာနိုင်သဖြင့် သယံဇာတ ကာကွယ်ရေးတွင် ပြည်သူများ၏ ပူးပေါင်းပါဝင်ဆောင်ရွက်မှုများသည် အလွန်အရေးပါသည့် အခန်းကဏ္ဍတွင် ရှိလာသည်ကို ပြည်သူများ သိရှိနိုးကြားလာကြစေရန် ရည်ရွယ်၍ ဤစာတမ်း အား ပြုစုရခြင်း ဖြစ်ပါသည်။ စစ်အုပ်ချုပ်ရေး ကာလများတွင် သယံဇာတပျက်စီး ဆုံးရှုံးမှုများ၊ အခွင့်အာဏာများအား အလွဲသုံးစားပြု၍ လုပ်ဆောင်ခဲ့မှုများကို နည်းလမ်းမျိုးစုံဖြင့် ဆန်းစစ် ဖော်ထုတ်ထားပါသည်။
ဤစာတမ်းတွင် သယံဇာတနှင့် ပတ်ဝန်းကျင်ထိန်းသိမ်းရေးဝန်ကြီးဌာနမှ စီမံခန့်ခွဲလျှက်ရှိ သည့် သဘာဝသယံဇာတများဖြစ်သည့် သစ်တော/သစ်သယံဇာတ၊ မြေသယံဇာတ၊ သတ္တုသယံ ဇာတနှင့် အခြားသယံဇာတများအား ယခင်စစ်အုပ်ချုပ်ရေးကာလ၊ စစ်အုပ်ချုပ်ရေး အသွင် ပြောင်း ဒီမိုကရေစီအုပ်ချုပ်ရေးကာလ၊ အရပ်သားတပိုင်း ဒီမိုကရေစီအုပ်ချုပ်ရေးကာလနှင့် စစ်အာဏာသိမ်းကာလဟူ၍ ကာလအပိုင်းအခြား (၄)မျိုးဖြင့် လေ့လာဆန်းစစ် ဖော်ထုတ်ထား ပါသည်။
ဤစာတမ်းအပိုင်းတွင် သစ်တော/သစ်သယံဇာတနှင့် မြေသယံဇာတ စီမံအုပ်ချုပ်မှု ဆိုင်ရာ မူဝါဒအမှားများ၊ အုပ်ချုပ်မှုအမှားများနှင့် ပြည်သူတို့၏ ထိခိုက်နစ်နာမှုများကို သိသာ ထင်ရှားသည့် ဖြစ်ရပ်များစွာဖြင့် ဖော်ပြထားပါသည်။ ယခင်စစ်အုပ်ချုပ်ရေးကာလ ထိခိုက် နစ်နာမှုများမှ သင်ခန်းစာရယူ၍ စစ်အာဏာသိမ်းကာလ လတ်တလော ဆောင်ရွက်နိုင်မည့် နည်းလမ်းများနှင့် ရေရှည် သယံဇာတ စီမံအုပ်ချုပ်မှုများအတွက် ပြည်သူပြည်သားများအနေဖြင့် မည်သို့ ဆောင်ရွက်နိုင်မည်ကို ဖော်ထုတ်တင်ပြထားပါသည်။
အစီရင်ခံစာအပြည့်အစုံရယူဖတ်လိုပါက- https://assets-monrec.nugmyanmar.org/images/2021/07/Status-of-Natural-Resources-Depletion-During-the-Military-Regime_Version-7.0.pdf
သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာန၊ အမျိုးသားညီညွတ်ရေးအစိုးရ
2.1K views16:18