تجمع أحباب الزهراء ع ( 1 )

2022-06-24 21:09:57 هوسات لاولاد مسلم( ع)



اولادك يمسلم ضاعو ام ايدي وگمت اصفگ الراح ابراح
مليت انا دور وین؟ بس اصرخ ونادی وگلبی مامرتاح
طاهر والزغیر وکت الذبح خافن علیه صاح

( ذبحونی یاریت اویاهم )

یاطاهر ییمه وین رحتو وین ضلیت ابمتاهه وگلبی ماله امعین
اصیح ابصوت اگعدو یهلی الطیبن ضاعولی جهال اثنین
شو محد سمعنی ویفزع البلوای لا عباس اجانی ولا الشفیه احسین


( عافونی اولادی واهلی)


یخایب لزغیر ارجوک لاتذبحه ماتدری وحیده وهم یتیمه امه
ترد روحی امن اشوفن طوله طاهر لو گرب واشتمه
طاهر نور عینی والزغیر فرحتی اخافن بلذبح ایصیح یایمه


(اذبحنی وبس عوف اولادی)

(عازونی بمصاب اولادی)

ماخلونی ادورکم ییمه یوم هجیتو
من نار الخیم یجهالی فریتو
شمس الصیف تکتل خاف عطشیتو
ما ادری ییمه مای شربیتو؟

( لاتذبح عطشان اولیدی)


خاف امن المشی رجلیکم امورمه
عینی الماتشوک یلزغیر ریتها تعمه
یاریح العذیبی لوردت اشتمه
تمنیت انا طاهر یرجع الامه

( مایرجع وسفه وبچانی

یایمه ایخاف ونادانی)



تمت وبعون الله وبقلمی المتواضع ام عدنان سیاحی ونسالکم الدعا لایجیز حذف الاسم او تغییره
https://t.me/joinchat/AAAAAEXfC0WTgXR6jaIf6w


قناة تهتم بنشر القصائد و الألحان


@Ahbabalzahrae1

#خدمتكم شرف لنا Open / Comment

2022-06-24 21:09:09 لطمیه لاولاد مسلم (ع) محرم الحرام سنة 1441

شبو النار ابخيمنه وشردت اولادي
ضاعت اوجوه الصبايه وحرگت افادی
اه يا طاهر اه يا طاهر اه ياطاهر

شبت النار ابمخیم بیت ضنوة حيدرا
شنت الغاره عليهم وسفه جدهم مادرا
اه واويلي يجدهم اگعد وشوف الجرا
شردت اطفال وحراير يامحمد بلعرا
اه یاطاهر اه یا طاهر اه یا طاهر

من فگدنه اولاد مسلم مانوجد الهم اثر
اثنین ضاعو بلبراری واحنه کاتلنه القهر
شفنه لوعات ومصایب اه من جور القدر
شفنه دم اولاد مسلم بلمسیب انحدر
اه یا طاهر اه یا طاهر اه یا طاهر

امهم ادگول احترگنه ومادره بینه الگمر
وانا مسبیه خذونی وحملی علغربه اشتمر
گلبی مکسور اعله وولدی ابد مایوم انجبر
ماشفت راحه ابزمانی عمری خلصته ابکدر
اه یا طاهر اه یاطاهر اه یاطاهر

ضاگت ابعینی الوسیعه من خذونی امیسره
نار بضلوعی سریه وعله اولادی اموجره
من عفت اجساد اخوتی بلتراب امعفره
بلصدر اهات عندی والي عبره امکسره
اه یاطاهر اه یا طاهر اه یاطاهر

مانمت ليلي عليهم وين اشكي وين اروح
مابقت وليان عندي روحي مليانه جروح
يمه اضلن طول عمری بس علیکم انا انوح
یمه بحلامی شبگتک والعطر عنبر یفوح
اه یا طاهر اه یا طاهر اه یا طاهر

سلهمت عینه الوسیعه ابنی نام وماگعد
ابنی گبل الذبح صله وراح للباری وصعد
مثل طاهر الله شاهد بلدنیه مانوجد
والزغیر الراح منی ما شفت مثله بعد
اه یاطاهر اه یاطاهر اه یاطاهر

تمت وبعون الله وبقلمی المتواضع ام عدنان سیاحی ونسالکم الدعا لایجیز حذف الاسم او تغییره

https://t.me/joinchat/AAAAAEXfC0WTgXR6jaIf6w


قناة تهتم بنشر القصائد و الألحان


@Ahbabalzahrae1

#خدمتكم شرف لنا Open / Comment

2022-06-24 21:08:37 قصيده لاولاد مسلم ع

اولادك يمسلم ضاعو من امهم
لاضل خال لاعم اليدورهم

ضاعو بالفلا وامهم الحيرانه
ماتدري انذبحو لو بزنزانه
عليهم روحها تبجي وحزنانه
تكول صغار والسجان يضربهم....
اولادك يمسلم ضاعو من امهم

امهم خايفه وتدور بهومه
على الويلاد راحت طبت الحومه
لكت كل الشباب مطرحه و نومه
وعباس البطل عل مشرعه يمهم ....
اولادك يمسلم ضاعو من امهم

بعد وين الكه انه طاهر ومطهر
جلجل ليلنه وانه انتظر وانطر
بلكت لو خبر منهم عليه يمر
دعوت والده من الله اليرجعهم...
اولادك يمسلم ضاعو من امهم

عساني لاعشت من بعد اولادي
ولا مسبيه اروحن والشمر حادي
رحتو صار فارغ صدري وافادي
مشيت وعيني تربي بلكي اشوفنهم....
اولادك يمسلم ضاعو من امهم

تعبت وضاع تعبي وراحت سنيني
وراح الي كفل وانوب لحسيني
اخذونه سبايا وراحو بنيني
ايتام وحرم زينب التكفلهم.....
اولادك يمسلم ضاعو من امهم

بقلم شاعرة اهل البيت عليهم السلام
ام فراس الساعدي

https://t.me/joinchat/AAAAAEXfC0WTgXR6jaIf6w


قناة تهتم بنشر القصائد و الألحان


@Ahbabalzahrae1

#خدمتكم شرف لنا Open / Comment

2022-06-24 21:08:12 قصيده لاولاد مسلم ع

عزانه اليوم لاولادك يمسلم
وزينب حايره بيهم تلملم

زينب حايره بايتام وبعيله
حملها من ثكل ماتكدر تشيله
تكلهم عمه ردو لمكم الليله
من ضعتو لفاني القهر والهم ....
عزانه اليوم لاولادك يمسلم

مشيتو بيادرب والله شدهتوني
ايتام وحرم والضرب بمتوني
من اصرخ عليهم مايخلوني
وينه كافلي ليه يردهم....
عزانه اليوم لاولادك يمسلم

ركبوني ييمه وعيني ربيه
عافوني اطفالي ومادرو بيه
ضاعو بالدروب بوكت حربيه
سوده تصير دنياتي بعدهم....
عزانه اليوم لاولادك يمسلم

اخذوني يسيره حبال مجتوفه
من ارض المعركه وانوب للكوفه
من ضعتو صرت للناس سالوفه
غصبا ماشيه انه وعفتهم....
عزانه اليوم لاولادك يمسلم

افرن شايطه لو شفت ويلاد
اروح اركض وراهم ولعطش زاد
والله القهر طر كلبي واللفاد
ياسجان دليني بدربهم....
عزانه اليوم لاولادك يمسلم

بقلم شاعرة اهل البيت عليهم السلام
ام فراس الساعدي

https://t.me/joinchat/AAAAAEXfC0WTgXR6jaIf6w


قناة تهتم بنشر القصائد و الألحان


@Ahbabalzahrae1

#خدمتكم شرف لنا Open / Comment

2022-06-24 21:07:40 قصيده لاولاد مسلم ع

هذول اولاد مسلم ولدهر مال
ابوهم بلحرب سموه زلزال

صحت وين النشامه وذيج السباع
تعالو دورولي اولادي بساع
جماله فوك ابوهم نايمه الكاع
مسلم هذا صيته بعلو الجبال.....
هذول اولاد مسلم ولدهر مال

بنص الليل راحو مني الاولاد
صحت هنا ييمه صياحي مافاد
خذوهم مني ودوهم ابن زياد
ومايدرون بامهم بخس كل حال....
هذول اولاد مسلم ولدهر مال

صرت امشي واصيح الله واكبر
ولدي زغار طاهر ويه مطهر
وين الكاهم بهل الشمس والحر
عليهم كلبي ذايب والدمع سال.....
هذول اولاد مسلم ولدهر مال

مطهر يمه طاهر وين رحتو
عميتو عيوني وكليبي شلعتو
امكم يسروها و مادريتو
واعله الراس يضربني الجمال....
هذول اولاد مسلم ولدهر مال

حالي صار يمه حال زينب
من حركو خيمنه النار تلهب
جر سكنه من اديها والشمر طب
يكلها ذبحت بيدي هلرجال....
هذول اولاد مسلم ولدهر مال


بقلم شاعرة اهل البيت عليهم السلام
ام فراس الساعدي
https://t.me/joinchat/AAAAAEXfC0WTgXR6jaIf6w


قناة تهتم بنشر القصائد و الألحان


@Ahbabalzahrae1

#خدمتكم شرف لنا Open / Comment

2022-06-24 21:06:48
▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁


بعد حرك الخيم من جور العده

هامت الاطفال بالبــــــرشارده

----------------- 

الجريمه تمت بطف كربلـــــــــــــه \\ واليتيم ينوح ينشــــــد عــــن هله

حسين وينه وعمنه راعي المرجله \\ الامر محتـــوم يــــوم الطف سده

----------------- 

منهم الداسته الخيل بلا رحــــــــــم \\ ومنهم الودَّع الدنيـــــــــه بالسهم 

ومنهم المحترك مابين الخيــــــــــم \\ والمرار بظيمـــــــــــه ويّاهم بده 

----------------- 

أثنيــــــــــن من أولاد مسلم الشهيد \\ عن نظـــــرزينب جفوا عنَّه بعيد 

خاف منهم ينكطع حبـــــــل الوريد \\ مثل عبــــد الله أبسهم لوعــه هده

---------------- 

بليـــل ممشاهم وخوف من الطريج \\ الكمـــــــــرونجومه ويّاهم رفيج 

واحد الواحـــد يكلَّه بصدري ضيج \\ شلون بينه الصبح لوباجــــرغِده

----------------- 

ليل ياخذهم الليــــــــــــــل بلا منام \\ وعن عيون الغدر خيمتهم ظلام 

الخوف من باجـــــر وأولاد الحرام \\ جائزه من الظالم الكــــــل رايده

----------------- 

التعب بيَّن علــــــــــــــه وجوه البدور\\ بدت البسمه وحــذر جنهم طيور

لجن رمش العين غطّـــــــــا للسرور\\ والنظــــــرهم جثث شاف أمدّده

---------------- 

من القصر خادمه طلعت عالنهـــــر\\ عجبه شافت الشمس ويَّه الكمـر 

للقصر ردّت وشاعت الخبـــــــــــر \\ وصارت أم الدار ألهم ســـــانده

--------------- 

أخبروهه بكربلــــــه أشصار وجره \\ شلون عافوهه الجثث فوك الثره 

وحال كلب أم الحـــــــــزن لمخدّره \\ أيعين الله حال كــــــــل أم فاكده

--------------- 

لفه راعي الدار وعليـــــــــــه التعب\\ الحقــد ماليـــه وبوجهه الغضب 

أيكلهه راح أيروح من عندي الذهب \\ مثل أبن طوعـــه يحب المفسَده

--------------- 

من حجيهه وخوفهه حس النـــــــذل \\ دوم خلَّـــــــــــك بالمودّه متصل 

بيا شــــرع يادين طفل وينجتـــــــل \\ أيكلها لبن زيــــــاد أبد ماعانده

-------------- 

كام جتَّفهم وذبهـــــــــــــم بالسجن \\ مَنكِسر كلبـــــــه عليهم الرعن 

باجـــــــر أتحضِّروا للموت ودفن \\ عاليتامـــــــه صبَّح وبيهم حِدَه

----------------- 

كلبه أشد من الصخر مات الضمير \\ جره عليهم مثـل مامر بالسفير 

هل النماذج منها بســـم الله أستجير \\ علـــــه نارالله وجحيمه وارده

---------------- 

حيِّروا للــــــــــــــنذل بيمن يبتدي \\ وقدِّمولـه النصح بلجن يهتدي 

أبذبحنـــــــــــــــــه عله الله تعتدي \\ الحجي ويَّه الناصبي بلا فائده

--------------- 

كالوا أنصلِّيهه هاي آخــــر صلآة \\ مثل أبونه اليوم محتوم الممات 

راح ويَّه النبــــــــي نبديهه الحياة \\ رواحنـــــه لحسين منذوره فِده 

--------------- 

صورة العباس عنَّه موبعيد \\ الظلم نفس الظلـم رد من جديد

مثل جفّينه تلكوا للصعيد \\ والنهر وجروفــــه ألهم شاهده

****************************************** ** 


خالد الحجار
https://t.me/joinchat/AAAAAEXfC0WTgXR6jaIf6w


قناة تهتم بنشر القصائد و الألحان


@Ahbabalzahrae1

#خدمتكم شرف لنا Open / Comment

2022-06-24 21:05:57 هاليتامة شلون ذبحوهم عجيب ذولة مثل حسين واحدهم غريب
▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁▁

بويه مسلم..بويه مسلم.. عيوني تربي عالدرب
ها يبنتي..ها يبنتي..والامر بويه صعب

بويه مسلم.. بويه مسلم..ظلمت الدنيه عليهه
بويه مسلم..بويه مسلم..ناطره منك الجيهه
بويه مسلم..بويه مسلم..انتظر وكت المسيهه
بويه مسلم ..بويه مسلم..بويه شفت انه العجب


ها يبنتي..هايبنتي..اتعلمي من الحسين
هايبنتي..ها يبنتي..هذا ابو كلب الحنين
ها يبنتي..ها يبنتي..لو تفركنه السنين
هايبنتي..ها يبنتي..ينتظر بويه اليحب

بويه مسلم..بويه مسلم..ابقى من دونك وحيده
بويه مسلم ..بويه مسلم..بوحدتي ماني سعيده
بويه مسلم ..بويه مسلم.. رحلتك ادري بعيده
بويه مسلم..بويه مسلم..تفترك بويه غصب

ها يبنتي..ها يبنتي..لو وصل ليج الخبر
ها يبنتي..ها يبنتي.. حكمته ربي الامر
ها يبني..ها يبنتي..مسجل بلوح القدر
ها يبنتي ..ها يبنتي..يمكن اتصير الحرب

بويه مسلم..بويه مسلم..بحضنك وشفت الدلال
بويه مسلم..بويه مسلم..رجعتك بيه احتمال
بويه مسلم..بويه مسلم..مني تطع بالوصال
بويه مسلم ..بويه مسلم..مسافر لديرت غرب

ها يبنتي.. ها يبنتي..مو دعه بالله وعلي
ها يبنتي..ها يبنتي..انتي بحماية ولي
ها يبنتي.. ها يبنتي..ابقى انتي بمحملي
ها يبنتي..ها يبنتي..اتحملي بصدر الرحب

خادم اهل البيت
ابو علي السعيدي


✿https://t.me/joinchat/AAAAAEXfC0WTgXR6jaIf6w


قناة تهتم بنشر القصائد و الألحان


@Ahbabalzahrae1

#خدمتكم شرف لنا Open / Comment

2022-06-24 21:05:11 قصیدة: ((اشــگــد مــشــيــنــه))
عن لسان حال اولاد مسلم بن عقيل عليهم_السلام

نطوي بدروب الضياع و تطــوي بينه
وضـيعــتنه الــناس بـويــه و تيـهيـنه
اشگد مشينه

تهنــه بين الناس و ادروب الضياع
وگمنه نمشي وين ما عند الله گاع
وادي وادي ابــلايه مــاي و لامتاع
غيــر حظــن اليل مــا يحــظنه باع
و التــعب بين علينه اشگد مشينه

بــويه خاف اتشوفنه اعيون النهار
والغــريب ابهل البلد ما يستجــــار
كثــر ما فـرنه الدهر واعلينـــه جار
صرنــه ننــباع ابثمن لوضفنـــه دار
گلب يرحم مالگينه اشگد مشينه

بويــه نتــخفه النهار وللـه نشچــــي
بلچــي نغفــه ونستچن نرتاح بلچي
وسكتــه گــت ادمــوعنه نبچــــــــي
ولو حچينه امشاور و بهداي نحچي
انخاف لا يطلع بچينه اشگد مشينه

بويه ترفه اعوادنه والغربه تضهد
بويه من التعب گمنه ساعه نمشي وساعه نگعد
عله گبرك ما نشدنه انخاف ننشد
وبدل ما نگرب الك ظلينه نبعد
منوه ما صارت بدينه اشگد مشينه

بويه كل الظيم مرنه ما سلمنـــه
وبلسجن طحنه يبويه وانلزمنه
اشكثر يابويه انهظمنه وانظلمنه
ريت مذبوحين ويه احسين عمنه
ولابگينه اخلاف عينه اشگد مشينه

بويه چل ليل السجن وحنه وحدنه
مــن سمــع ونـــة عبــادتنه نــشدنه
امنين انتــو گلنه احنه الهادي جدنه
بويه بس مــا چل ضلام اليل هدنه
اردود فرينه وحدينه اشگد مشينه
**
بويه لفــنه الــيل بــدورب المنايــــه
وطحنه بيد الرجس وعرفنه النهايه
ابروســنه ياخذ من الطاغي الهدايه
اعله الفرات وما سگانه ابجاري مايه
بلمسيّب ونتهينه اشگد مشينه

#الشاعر_الکبیر_عزیز_الفیصلي
https://t.me/joinchat/AAAAAEXfC0WTgXR6jaIf6w


قناة تهتم بنشر القصائد و الألحان


@Ahbabalzahrae1

#خدمتكم شرف لنا Open / Comment

2022-06-24 21:04:32 #محرم
#أولاد_مسلم_ع
#طور_الفراق

لاتذبحه
رگبــة الغــالي زغيــرة
لاتذبحه
طفل و مضيع نصيـره
لاتذبحه
ينشد الماعنــده غيــرة

ـــــــــــــ ✾ ✾ ــــــــــــــ

يگله هوّن
آنــه اذبحنـــي بـــداله
يگله هوّن
ليش ما تـرأف بحاله

يگله هوّن
ازغيــر اخوي انظر دلاله

ـــــــــــــ ✾ ✾ ــــــــــــــ

بقلم الشاعرة زينب الخفاجي

~•~•~•~•~•~•~••~•~••~•
#اللهم_صل_على_محمد_وآل_محمد_وعجل_فرجهم
https://t.me/joinchat/AAAAAEXfC0WTgXR6jaIf6w


قناة تهتم بنشر القصائد و الألحان


@Ahbabalzahrae1

#خدمتكم شرف لنا Open / Comment

2022-06-24 21:03:19 ▁▁▁▁▁▁▁▁▁▁▁▁▁▁▁▁▁▁▁▁▁

يـا لـوعتهــا ويا لهفتهــــــا * محتاره إتدور إعله اخوتها
حميـــــده * حميـــــده
محتاره إتدور إعله اخوتها * محتاره إتدور إعله اخوتها
ــــــــــــــــــــ
بـت مسلم بالطـف محتــاره * تركـض ما بيـن الظـــــلام
خـوان إثنيـن إلـهـا نفـﮕـدوا * هَـم إطفـال وهَـم وإيتـــــام
فـَروا ما تـدري بهذا البـــر * لـو شـَبَـت بيهــم لخيـــــــام
تسألمـن عنهـم وتنــاشـــــد *مفجـوعــه وتلطـم عالهـــام
دم عـالخـد إتهـــل دمعتهــا
محتاره إتدور إعله اخوتها
حميـــــده * حميـــــده
محتاره إتدور إعله اخوتها * محتاره إتدور إعله اخوتها
ـــــــــــــــــــ
ساعه تصد بالعين الزينـب * ساعه تصد للكوفــه العيـن
مـا بين الـكوفه وعلتهـــــا * وبيـن الحيـره بفـﮕد حسيـن
ياهو يرد إخوانـي تنـــادي * وين إهل الغيـره الطيبــــن
تصرخ بويه اﮔـعد يامسلـم *رد ورد لـَيِّــه الطفليــــــن
طفلـه ومشدوهـا إبلوتهــــا
محتاره إتدور إعله اخوتها
حميـــــده * حميـــــده
محتاره إتدور إعله اخوتها * محتاره إتدور إعله اخوتها
ـــــــــــــــــــ
خيـل وعـدوان بـلا رحمـه * مـاضلـت غيــره بهالـنـاس
والطفل الفـَر إبهل هيمـــه * بجـِّرد الخيـل آحـا ينــداس
شكايه عله الشاطي تعنـت * تلطم بالعشره أعله الـراس
بلـﭼـي هناك وتلـﮔـه إخوتها * بلـﭼـن دخلـوا عـد عبـــاس
من وصلت شـافـت عمتهـا
محتاره إتدور إعله اخوتها
حميـــــده * حميـــــده
محتاره إتدور إعله اخوتها * محتاره إتدور إعله اخوتها
ـــــــــــــــــــ
شافت زينـب يَـم كافلهـــا * وتصـــب الــدمعــات دمـــــوم
ساعه تحظنه وساعه تشمه * ساعـه تـَفْزعه تريده يـﮔـوم 
وتـﮔلـه مصابك دوهنــــي * قَــــرَّح دلالــي المــــالــوم
وإعظم بلـوه المَرة بيهــــا * مـن حَـزَّوا راس المظلـوم
آ يــا روحـي ويـا لـوعتهــا
محتاره إتدور إعله اخوتها
حميـــــده * حميـــــده
محتاره إتدور إعله اخوتها * محتاره إتدور إعله اخوتها
ـــــــــــــــــــ
جيتـﭺ عمه تـﮔلها بلهفـــه * مـﮔبعـه لـﮔيتـﭺ بالأحـزان
وجيت إشكي العباس همومي * شفتـه مـوسـد عـالتـربـان
يالحالـﭺ إكلـف من حالي * مفجوعـه بفــﮔـد الخــوان
واحد ﮔطعوا منه ﭼفوفــه * واحـد راسـه تعالى الزان
يـا إخـــت المثلـــﭺ حالتهــا
محتاره إتدور إعله اخوتها
حميـــــده * حميـــــده
محتاره إتدور إعله اخوتها * محتاره إتدور إعله اخوتها
ـــــــــــــــــــ
يا عمه همومـﭻ ما تنعـد * مو فـَسْـرَن حتى الجلمــــود
إيَّسْتـي منخـوانـﭺ كهلــم * محـد منهــم بعــــد يعــــود
ذاك الصابه السهم بـﭼبده * وذاك انطـر راسـه بعامـود
وإنا إبـﮔـه أتأمل خوانـي * يــا عمـه يـردولـَــيَّ ردود
وإنتـي ليالي الهَـم خاوتهــا
محتاره إتدور إعله اخوتها
حميـــــده * حميـــــده
محتاره إتدور إعله اخوتها * محتاره إتدور إعله اخوتها


كريم الحاج فليح
https://t.me/joinchat/AAAAAEXfC0WTgXR6jaIf6w


قناة تهتم بنشر القصائد و الألحان


@Ahbabalzahrae1

#خدمتكم شرف لنا Open / Comment