مندن سورسالار، کئچن قیرخ ایلده لاپ قارا و لاپ فاجیعه‌لی گونومو | ibrahim savalan
مندن سورسالار، کئچن قیرخ ایلده لاپ قارا و لاپ فاجیعه‌لی گونوموز هانسی گون ایدی؟ دئیرم: 31 خورداد، 1369، دونیانین اون قیرغینلی زلزله‌لریندن بیری ساییلان منجیل، تاریم، رودبار و لوشان زلزله‌سی
آمارلارا گؤره، او دپرَمده 50 مین آدام حایاتینی ایتیریب، 60 مین آدام آغیر صدمه‌لر آلیب، 100 مین ائو و 700 کند تماملیه داغیلیب، 4 کند اهالیسی ایله بیرلیکده نقشه‌دن یوخ اولوب، داغ آخیب و بیر کندی آلتینا آلیب و یاریم میلیون آدام ائوسیز و دیدرگین دوشوبدور.
ایران ایقتداری اوولجه زلزله مرکزینی باشقا یئر قئید ائدیر و یاردیمجیلار اورا دوغرو گئدیرلر و تورپاق آلتیندا قالانلاری قورتارماق اوچون «قیزیل ساعاتلار» آدلانان ایلکین زامانلار دا ائله‌جه الدن گئدیر. جنگ تزه بیتمیشدی و اؤلکه ایمکانات باخیمیندان پیس دورمدا ایدی و بو بعضی صدمه گؤرنلرین اؤلومونه سبب اولدو.
یوزمینه یاخین عاییله بوتون وار یوخونو، ائو- ائشیگینی، مال- داوارانی الدن وئریب، اؤلنلرین دردلی خاطیره‌لرینی اورکلرینده قویلاییب، باشدان باشلامالی اولدو و یوواسی داغیلمیش تورکلرین بیر عده‌سی همه‌شه‌لیک تهران اطرافینا سیغیندی و بو مسئله، منطقه ده بؤیوک اؤلچوده ائتنیک دییشیمی‌نه سبب اولدو.
ائلینی تک قویمایان شاعیرلریمیز، او فاجیعه‌نی اوخشاییب آغلادیلار. زنگانلی هوشنگ جعفری، قاراداغلی عباس بارز، ماراغالی نادرفرید فتحی، موغانلی جعفر قره‌پور، کرجدن آلاو، تهراندان آذرمازندرانی و تبریزدن باریش، ایتگین، باقر رشادتی، نجاراوغلو، نوروز کریمی، سعید امیردادبر و مجید یالقیز کیمی شاعیرلر، او مصیبته شعرلر قوشدولار.
آدی و یادی ابدی یاشار، دوکتور محمدحسین مُبیین، اوچ آی تامام او منطقه‌ده قالیب، خالقینی درمان ائتمه‌یه چالیشدی، هئچ اولماسا اونلارین یانیندا قالیب، اونلارلا آغلاییب، اونلارا اومود وئردی و بئش گوندن سونرا، تورپاق آلتیندان دیری چیخان اوغلانا شعر یازدی:
