2022-08-23 00:11:06
أسئلة المشاركين
السلام عليكم طيب يا ستي انا في بدايه سمستر أو مختبرات المهم عايزه اجيب معدل عالي لكن المشكله انو بمسك التلفون و غير كدا بتونس +انا عندي مشكله كمان إني ما واضحه مع الناس يعني لو مفروض أقرأ و جاني زول يتونس معاي بخلي ليو قرايتي +بالنسبه لإنو نحنا جامعين و مفروض شخصياتنا اتكونت بس انا ما بحس كدا انا بحس روحي ضايعة شويه و مرات بنفعل شديد انا زوله بت ناس والله بس ما عارفه ليي ما قادره اعمل كنترول +آخر حاجه اهم نصيحه تقدميها لي بالنسبه للقرايه و كيف اجيب معدل عالي علما بإنو آخر معدل لي كان 3.12 كيف اجيب 3.80 كيف افضل محافظه علي ليفيل القرايه و أركز و شكرا
المهم انا طالبه منك المساعده وريني اعمل شنو عشان اجيب معدل عالي و اعمل شنو عشان احسن من شخصيتي بحيث انو أكون زي البنات الواعيات ديل و أكون قويه و ما بتهز
▬▬▬▬▬▬▬▬▬▬▬▬
الجواب
وعليكم السلام ورحمة الله وبركاته
الناس في عمرك دا فعلا شخصياتهم بتكون اتكونت بس البتتكلمي عنها دي عادات ما شخصيتك العادات دي استمرت معاك فترة معينة لما خلاص اعتبرتيها جزء من شخصيتك والدليل انها عادات انك حسيتي انو في شي غلط ولازم اوقف اشوف الحاصل شنو ودي حاجة كويسة منك
بالنسبة ليك مشكلتك دي للآن انتي ما كونتي هدف واضح تمشي عليه عندك أهداف لكن جايطة كتيرة وما مرتبة والمشكلة الحقيقية ما بتعرفي تقولي لا...
فلما يكون عندك هدف واضح مثلا طلعتي من البيت ماشة الدكان لاقتك وحدة بتعرفيها قالت ليه ارح نمشي الفرن (وانتي عندك عيش في البيت ) فمشيتي معاها ونسيتي أصلا كنتي ماشة وين؟
لكن سؤال لما تمشي معاها وترجعي للبيت حيحصل شنو حتلقي ماعندك شي تاكليه غير صح؟
سؤال استفدي شنو انتي من مشيتك ؟
ولا حاجة
ما جبتي حاجتك يا تقعدي جوعانة يا حتقرضي عيش
لكن لو عملنا فلاش باك لورا كدا وعدنا الموقف تاني وانتي ماشة لاقتك صحبتك سلمتي واي شي ماشة وين ماشة الفرن تمشي معاي ... لا مافاضية حاليا ماشة الدكان واي وحدة مشت في حالها...
كلمة لا.. دي أول مرة حتكون صعبة وحتحسيها كيف كيف لكن لازم تتعلميها لا..لأي شي ضد مصلحتي
لأ لأي شي عكس هدفي في الحياة
ربنا بسألك من نفسك أول شي قبل الناس
اتدربي على كلمة لا زي الموقف بتاع الدكان دا صوري المشهد اذا قلتي لا واذا قلتي نعم حيحصل شنو اتخيلي واختاري بعدها عايزة شنو انتي؟
وحدة قعدت جمبك وعايزة تتونس وانتي بتذاكري قوليها استوب هنا معليش انا بذاكر بدون أي كلام كتير عشان في الامتحان الاخير اسمك براه واسمها براه وكذلك درجتك
تحافظي على معدلك كيف... تركزي في المحاضرات، تسألي عن الحاجات الفايتة عليك، تحددي وقت للقراية وتلتزمي بيه
بالنسبة للجوال وانك بتمسكيه كتير، شوفي انت بتمسكيه ليه؟ شوفي التطبيق المضيع وقتك شنو ؟ امسحيه وبرضو حددي وقت لمسكة الجوال
انت بالنسبة لي هسي واعية عشان عرفتي انو في شي غلظ في أسلوب حياتك ، وقوية عشان قررتي تعترفي بالغلط وتصلحيه والشخصية البتعترف بغلطها وبتحاول تصلحه ما في شي بهزها وبتكون متصالحة مع نفسها
سورة البقرة اقريها يوميا حياتك كلها حتتغير، أول مرة حتكون صعبة تاني بش تاني حتتعودي عليها
صلواتك في وقتها، أذكارك، قربي من ربنا عندك ونسة في راسك دا امشي احكيها لربنا
قللي كلامك مع الناس عشان لما تتكلمي كتير بتحسي انك ضعيفة و شخصيتك ماقوية والصفات الذكرتيها دي
وأخيرا ربنا يوفقك
#عهــــد_فتح الله
101 viewsDr.A'hd Fathallah, 21:11