Dr.Ahmed Elzalitini

2023-01-03 02:59:27 الفقرة الرابعة / محتوى السنوات السابقة .

لا أنصح أي طالب ان يقرا الباراسيتولوجي من أي محتوى سابق لأن الطريقة مختلفة كليا يعني مثلا نحن الحشرات قبل ما نركزوش عليهن واجد عبارة عن محاضرة وحدة بس لكن توا الحشرات هنا موضوعك في الجزئي الأول يعني المنهج الأول بشيتاته بسبوراته بكل شي ماينفعكش في ولا حاجة حالياً ، وشيتاتي كلهن سواء القدم الي بخط يدي سواء الكراسات الي يديرو فيهن الطلبة حتى شيتاتي المطبوعة الي كل الدفعات يقرو منهن لعند الدفعة 47 الدور الثاني كنا ناخذو منهن يعتبرن ملغية كل شغلي السابق حالياً ما ينفعش النظام التدريس الحالي وانا نبري ذمتي قدام الله اولاً وقدام الجميع اني مش مسؤول عن حد يقرا من شيتاتي السابقة او أي شغل عشوائي في القنوات العشوائية ونعاودها بصريح العبارة (كل شغلي السابق من شيتات او سبورات لا يعتمد عليه كمصدر للدراسة بالنظام الجديد نظام الintegration programme).

(يتبع بعد دقائق) Open / Comment

2023-01-03 02:42:18 الفقرة الثالثة / خطة الجامعة لمنهج الباراسيتولوجي .

بالنسبة لخطة الجامعة لمنهج الباراسيتولوجي بالشكل الاتي :

المحاضرة الأولى: اليوم الثلاثاء بتاريخ 3/1/2023م حتاخذو فيها مقدمة عن الباراسيتولوجي.
المحاضرة الثانية : يوم الاثنين بتاريخ 9/1 حتاخذو مواضيع في مفصليات الأرجل زي الذباب flies .
المحاضرة الثالثة : يوم الأربعاء بتاريخ 18/1 حتاخذو مواضيع في مفصليات الأرجل زي العثة mites وقشريات الماء cyclops وغيرهن.
المحاضرة الرابعة : يوم الاثنين بتاريخ 23/1 حتاخذو مواضيع في مفصليات الأرجل زي القمل lice وزي البراغيث Fleas وغيرهن.

بعد الأربع محاضرات هذينا يا طلبة حرفياً ماعش حتاخذو بارا بكل في الجامعة لعند امتحان الجزئي الأول متاع البارا يوم 11-3 يعني امتحانكم الجزئي في المواضيع هذينا كله حيكون في مفصليات الأرجل.

بعدها يردن المحاضرات بعد الجزئي طول يوم 14-3 وهنا يبدا منهج الديدان والبروتوزوا حسب الطريقة الجديدة الي وضحناها في الفقرة الأولى وفي الفترة هذي من نص شهر ثلاثة لعند يوم 1-6 اكثر فترة فيها منهج بارا في الفترة هذي حتاخذو في الجامعة حوالي 17 الى 18 محاضرة وحسب القسم شن يحدد يكون داخل في الجزء الثاني هذي في علم الغيب لكن الي نعرفوه ان امتحان الجزئي الثاني حيكون يوم 5-6 . يعني من توا دير في حسابك ان شهر ثلاثة وأربعة وخمسة راهو كلهن حتقرا فيهن بارا وتحطها من اولوياتك كيفها كيف أي مادة لان منهج الجزئي الثاني دسم ره قلتها من توا والله شاهد اني بلغت.

بعد الجزئي الثاني حيردن محاضرات البارا يوم 6-6 يعني ثاني يوم الامتحان ويستمرن لعند يوم 10-7 (تاريخ اخر محاضرة بارا في الجامعة) في الفترة هذي حتاخذو تقريباً 7 محاضرات ، يعني اكثر كمية منهج حتكون الجزئي الثاني الي يخش الجزئي الثاني مكمل المنهج (وهذا الي مفروض يصير) حرفياً الفاينال يقعد لعبة بالنسبة له لان مش حيزيد مواضيع جدد واجد وعنده فترة كويسة في الفاينال يثبت فيها كويس.

بعدها عندكم امتحان معمل الباراسيتولوجي حيكون يوم 15-7 وامتحان الفاينال البيبر حيكون يوم 24-8 وفترة الفاينال بالنسبة للبارا تعتبر كويسة كمراجعة (ماينفعش انك اتعرف عالمنهج في الفاينال) ، بصراحة خطة نزيكة من ناحية فيها ضغطة تخليك ما تسيبش شي في المنهج بس في نفس الوقت الجزئي الأول مواضيعه طشه والجزئي الثاني مواضيعه واجد هنا مافش تناسق واجد من ناحية كمية المنهج.

(يتبع بعد دقائق ) Open / Comment

2023-01-03 01:28:39 الفقرة الثانية / تجربة الدور الثاني للدفعة 47 ونظام class and channel .

بعد نتيجة الدور الأول للدفعة (47) كانت نسبة نجاح البارا في الدفعة 40% والمايكرو 42% والاخرات تقريباً بين 45-50% وبالنسبة للبارا بالذات الامتحانات سواء جزئي او الفاينال ماكانتش بسيطة وكانت الأجواء متوترة بين القسم والدفعة فياريت ما اديروش زيهم وخلوكم كويسين بكل ومحترمين وفي حالكم وطيبين وياريت تحضرو في الجامعة البارا بالذات ياريت تحضرولها نصيحة لوجه الله تعالى يا دفعة احضرو البارا وعبو المدرجات كان تبو السنة تمشي حلوة ونزيكة عليكم في جميع المواد ننصح بحضور الجامعة وحنعيدو النظر في جدولنا بالنسبة للتدارك بس الأسبوع هذا خلوه يمشي بنفس الجدول ، عموماً نردو لموضوعنا بعد نتيجة الدور الأول لاحظت ان الدفعة هذي بالذات تحتاج الى تركيز اكبر ماينفعش نظام تشرح في الكلاس وانتهت مهمتك في الكلاس ، ففكرت اني نعطيهم اهتمام اكبر ومن هنا جائت فكرة التعليم التكميلي (class and channel) بحيث ان طلبتي الي في الكلاس درتلهم Private channel والطلبة الي عندهم مشكلة في المواصلات درتلهم نظام الاشتراك في القناة بقيمة مالية ، الفكرة في بدايتها واجهت عليها انتقادات من قبل البعض بس بفضل الله توا لاقت انتشار في الوسط الطبي والكليات الاخرى وريحت الطلبة واجد من ناحية الي عنده مشكله مواصلات ومايقدرش ومن ناحية ان الطلبة مفروض ماعش يقرو من القنوات العشوائية الي انظر منين جايب السبورات ولا منين ملصق الكلام تلقى مشرف عليها طالب هو اصلاً احتمال كبير مش مصفي البار، عموماً اشتغلت باجتهاد ويعلم الله وأسالو الطلبة الي كانو مشتركين فيها وتيالي شفتو الشغل في قناة المايكرو السنة هذي والحمدلله الفكرة في النهاية أنبتت أغصانها وأزهرت ثمارها بوصول نسبة نجاح الطلبة المشتركين عندي في ال Private channel الى 90% بفضل الله كان عندي تقريباً 65 طالب ما بين طلبتي في الكلاس كانو حوالي 40 والبقية مشتركين في القناة بس , بين ال65 طالب هذوما بفضل الله نجحو عندي 58 طالب أي أن نسبة النجاح عندي (90%) بالرغم من صعوبة امتحان الدور الثاني، لما نجو نقارنو النسبة هذي بنسبة نجاح الدفعة في الدور الثاني كانو المشتركين في الامتحان 666 طالب الي نجحو 314 طالب والي رسبوا 352 طالب أي ان نسبة النجاح في مجمل الطلبة كانت 48% ، وهذا شي يجعلني فخور بنفسي ويطلبتي ان النسبة توصل عندي لهكي مقارنةً بسنوات ماضية كانت النسبة عندي تترواح بين 65-85% بس الاهتمام الي عطيته للطلبة في الكلاس وفي القناة كان كفيل بفضل الله اولاً ان يرفع النسبة هذي الى 90% وانا سعيد جداً بالطلبة الي صفوا والف الف الف مبروك لكل الدفعة 47 ويا رب تكونوا موفقين في بقية مسيرتكم .

(يتبع بعد دقائق) Open / Comment

2023-01-03 00:31:36 السلام عليكم ورحمة الله وبركاته طلبة ثالثة بشري دفعة (48)

اول شي حنقسم كلامي الى فقرات بش يقعد كل شي منظم
الفقرة الأولى / الطريقة الجديدة والدراسة بنظام Integration Programme أو برنامج التعليم التكاملي .

طبعاً يا دكاترة زي ما تعرفو النظام هذا ما يعتبرش نظام جديد معروف باسم (نظام البلوكات) وماشية بيه الجامعة الدولية منذ بدايتها وبصراحة هو نظام جميل من ناحية ان يكون في ربط بين المواد يعني على سبيل المثال :
كورس CVS ينعطى حسب الخطة الدراسية في الأسابيع 10-11 من العام الدراسي بحيث ان حتاخذ في الفارما كورس الcvs وتعرف كل ادوية القلب وحتاخذ في الباثو امراض القلب في كورس الcvs وحتاخذ في البارا طفيل مشهور بإن يدير مشاكل في القلب وهكذا .

مثال اخر بكورس Resp او الجهاز التنفسي حسب الخطة الدراسية ينعطى في الأسبوع 13 من العام الدراسي معناها في الأسبوع هذا محاضرات حيكونن في الفارما عن ادوية الريسباراتوري والباثو عن امراض الرسباراتوري والبارا عن طفيليات مشهورة يصيبن الرئة والمايكرو عن ميكروبات مشهورة انهن يصيبن الرئة ، وهكذا تيالي الفكرة واضحة للجميع وطريقة جميلة وفيها ربط معلومات بشكل نزيك .

باهي شن عيوب الطريقة هذي ؟
عارفين عيب الطريقة هذي الوحيد في وجهة نظري الشخصية هو في مادة الباراسيتولوجي، يسأل حد ليش البارا بالذات يا دكتور؟
لأن ببساطة الباراسيتولوجي تتكون من مجموعة كائنات (بروتوزوا – ديدان الي هنا ثلاث عائلات (نيماتودا ، سستودا وتريماتودا) – بالإضافة الى مفصليات الأرجل الي الطلبة يسمو فيها حشرات وعادة البارا تنعطا بالشكل هذا نظام ناخذو نيماتودا مثلاً وبعدها نقسموهن (هذينا نيماتودا متاعات امعاء ونبدو فيهن بالدودة وبعدها نقولو هذينا نيماتودا متاعات جهاز لمفاوي ونبدو فيهن بالدودة وبعدها نقولو هذينا نيماتودا متاعات الجلد ..الخ يعني بالعربي نبدو في الشرح من (اسم العائلة) وبعدها نفصلو ونغوصو في المعلومات داخل العائلة هذي لعند نكملوها ونمشو للعائلة الي بعدها ، هذي طريقتي وهذي طريقة القسم من يومها واي حد شرح باراسيتولوجي يعطي بطريقة العائلات ومعظم محتوى اليوتيوب حتلقاه بطريقة العائلات ، باهي حد يسألني ليش يا دكتور الأفضل طريقة العائلات ؟ لأن ببساطة نحن في البارا يهمنا دائماً نعرفو دورة حياة كل طفيل والطفيليات الي من نفس العائلة ديمه نلقو في تشابهات واضحة وكبيرة في دورة حياتهن هذا ليش بعد نشرحوهن في جرة بعضهن تقعد الصورة مكتملة عند المتلقي.
بينما في الطريقة الجديدة (متاع السنة هذي 2023) حناخذو طفيليات تصيب الأمعاء من عائلة البروتوزوا وبعدها طفيليات امعاء من عائلة السستودا وبعدها طفيليات تصيب الأمعاء من عائلة النيماتودا وبعد نكملو الأمعاء نمشو ناخذو موضوع الliver ونبدو فيهن سستودا متاعات كبد ونيماتودا متاعات الكبد وتريماتودا متاعات الكبد وهكذا يعني بالعربي في الطريقة الجديدة عنوان الشابتر حيكون اسم الorgan (مش اسم العائلة زي زمان) وبعدها ناخذو كل الطفيليات من مختلف العائلات الي تصيب هذا الorgan وبعد ما نكملو الorgan هذا نمشو للي بعده حسب ترتيب الجامعة ، هي فيها ربط أفكار من ناحية (اكلينيكية والتفكير السليم في التشخيص لما تواجهك حالة معينة كطبيب) ولكن عيبها تخرب الرتم متاع دورة الحياة الي انا شخصياً نحبه بكل .

هذا بالنسبة للطريقة الجديدة ورأيي فيها وحيكون عندكم جلسات نقاش وامتحانات TBL جميلات منها تقعد ديمه تقرا وفيهن درجات ساهلات وكل درجة في ثالثة مهمة جدا جداً.
(يتبع بعد دقائق) Open / Comment

2023-01-01 21:54:45 انضمو للقروب Open / Comment

2023-01-01 21:54:06 https://t.me/burnthebridgebehindyou Open / Comment

2023-01-01 21:44:35 السلام عليكم دكاترة ال48
غداً باذن الله يوم الاثنين محاضرة المايكرو في معهد التدارك .
مواضيع المحاضرة : cell membrane - cytoplasm - inracytoplasmic granules - ribosomes - nucleoid - plasmid
موعد المحاضرة 12:00 / 2:00
(قبلها في فارما وبعد المحاضرة باثو)

موفقين يا احسن دفعة بصراحة واضح ان مستواكم كويس بكل من بداية السنة يا رب تكملو علي هذا المستوى
رابط قناتي في المايكرو :
https://t.me/microwithzelto

رابط قناة التدارك :
https://t.me/Antonymai

بالنسبة للباراسيتولوجي حنوضح بكرة كل شي من ناحية الكورس والقناة والطريقة الجديدة والمنصة وكل شي يخص البارا حنحكي فيه بكره وانتم طيبين . Open / Comment

2022-12-28 23:50:08 سبورات المحاضرة 4 (مايكرو ثالثه بشري ) Open / Comment

2022-12-28 23:48:45 تسجيل المحاضرة 4 (مايكرو ثالثه بشري ) Open / Comment

2022-12-28 22:14:06 السلام عليكم يا دكاترة ودكتورات 48 ان شاءالله ربي يوفقكم وان شاءالله تكون سنة خفيفة عليكم وعلينا يا رب العالمين
الحمدلله تم انشاء قناتي التعليمية الخاصة بمادة المايكروبيولوجي بشكل مرتب ونزيك باذن الله ينال رضاكم انضموا للقناة وابدو اقرو مايكرو سادكم نوم ، قناة البارا حتكون نفس الطريقة باذن الله بالنسبة لطريقتي في المايكرو ان الطالب يدير كراس ويكتب السبورات كل الي نبيه منك قاعد عالسبوره لاني نشرح بطريقة شيتات الجامعة بنفس الترتيب ونسمع في تسجيلات دكاترة القسم .
رابط القناة : https://t.me/microwithzelto Open / Comment