2022-06-15 18:22:12
ဘာတွေဆက်ဖြစ်မလဲ?
မူဆယ် ရွှေလီမြစ်ဝှမ်း SSPP နှင့် TNLA ကို တိုက်ထုတ်ရန် KIO /KIA ဗဟိုဌာနမှ မသိရှိရသေး
သျှမ်းသံတော်ဆင့်၊ ဇွန်လ ၁၅
သျှမ်းမြောက် မူဆယ်မြို့နယ် ရွှေလီမြစ်ဝှမ်းဒေသအတွင်းလှုပ်ရှားနေသည့် SSPP နှင့် TNLA တပ်ဖွဲ့တို့ကို PDF များနှင့်ပူးပေါင်းကာ တိုက်ထုတ်ရန် ညွှန်ကြားချက် အမိန့်ပေး စာ ထွက်ပေါ်လာသည့်အကြာင်းကိစ္စ နှင့် ပက်သက်ပြီဂ KIO /KIA ဗဟိုဌာနမှ မသိရှိရကြောင်း ပြောဆိုသည်။
သျှမ်းပြည်မြောက်ပိုင်း မူဆယ်မြို့၊ နမ့်ခမ်းမြို့ရှိ ရွှေလီမြစ်ဝှမ်းတစ်လျှောက်မှ သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA) နှင့် တအာန်း(ပလောင်) အမျိုးသားတပ်မတော် (TNLA) တို့ကို တိုက်ထုတ်ရန် KIA အမှတ်တံဆိပ်ပါ စာထွက်ပေါ်လာခြင်းနှင့် ပက်သက်ပြီး KIO /KIA ဗဟိုဌာနမှ မသိရှိရကြောင်း ဗိုလ်မှူကြီး နော်ဘူက သျှမ်းသံတော်ဆင့်ကို ပြောသည်။
“ကျနော်တို့ဗဟိုဌာနချုပ်က ဘာမှ မသိရပါဘူး၊ အဲ့စာတွေက မြေပြင်မှာလုပ်ရှားနေတဲ့ ရုံးပိုင်းအဖွဲ့က ထုတ်လိုက် တာ ဖြစ်နိုင်ပါတယ်၊ ဘယ်လိုဖြစ်ပြီး အပြင်ဘက် ဆိုရှယ်မီဒီယာဘက် ရောက်သွားမှန်းလည်း မသိဘူး၊ ဒါက မြေပြင်က အဖွဲ့တွေ ထုတ်လိုက်တဲ့ ရုံးအချင်းချင်းပေးပို့စာလို့ပဲ မြင်တယ်၊ ကျနောတို့ ဗဟိုဌာနက ဘာမှ မသိရ ဘူး” ဟု KIA ပြောရေးဆိုခွင့်ရှိသူ ဗိုလ်မှူးကြီး နော်ဘူက သျှမ်းသံတော်ဆင့်ကို ပြောသည်။
ပြီးခဲ့သည့် မေလ ၁၁ ရက်နေ့နောက်ပိုင်းမှ စတင်ပြီး TNLA တပ်ဖွဲ့များသည် ရွှေလီမြစ်ကမ်းတစ်လျှောက်ရှိ KIA တပ်စခန်းနယ်မြေအတွင်း သွားရောက်လှုပ်ရှားရာမှ မြေပြင်ရှိ KIO/KIA ဌာနများမှ သတိပေးစာ ထုတ်ပြန်လိုက် ခြင်း ဖြစ်ကြောင်း ဒေသတွင်းသတင်းရင်းမြစ်များထံမှ သိရသည်။
ထို့အတူပင် ဇန်နဝါရီလဆန်းပိုင်းမှာလည်း SSPP/SSP တပ်ဖွဲ့ဝင်များက KIO/KIA လှုပ်ရှားနေလျက်ရှိသည့် ကချင်ပြည် မံစီမြို့နယ်မှ မန်ဝိန်းကြီးဒေသ သို့ရောက်ရှိလာပြီး ယခုအချိန်ထိ တပ်ဆုတ်ခွာခြင်း မရှိသေးကြောင်း လည်း မန်ဝိန်းဒေသမှ သျှမ်းအမျိုးသားတစ်ဦးက သျှမ်းသံတော်ဆင့်ကို ပြောသည်။
“SSPP/SSA တပ်ရင်းတစ်ခုက မန်ဝိန်းကြီးကို ရောက်လာပါတယ်၊ KIA မှ ဆက်ကြေးကောက်တာ ဘယ်လောက် လဲ နဲ့ လူမျိုးရေ ခွဲခြားဆက်ဆံတာ ရှိ၊ မရှိ မေးပြီး တစ်ပတ်လောက်တော့ ပြန်သွားကြတယ်၊ ဒါပေမဲ့ ယခုပြန်လာ ပြီး မန်ဝိန်းအနီးမှာ စခန်းချနေပါတယ်၊ ဒါကို KIA က ထွက်ခွာဖို့ လာညှိတာရှိတယ်” ဟု အထက်ပါ အမျိုးသားက ပြောသည်။
လက်ရှိ သျှမ်းပြည်မြောက်ပိုင်း ရွှေလီမြစ်ဝှမ်းတစ်လျှောက်တွင် KIA၊ TNLA နှင့် SSPP/SSA တို့က သုံးပွင့်ဆိုင်အနေအထားဖြင့် စစ်ဆင်ရေးတင်းမာနေသည့် သတင်းများထွက်ပေါ်နေပြီး ဒေသခံပြည်သူများ ကလည်း တိုက်ပွဲဖြစ်ပွားလာမည်ကို စိုးရိမ်နေကြကြောင်း သတင်းသိရသည်။
သျှမ်းပြည်မြောက်ပိုင်းအတွင်းတွင် စစ်ကောင်စီတပ်ဖွဲ့အပြင် PDF တပ်ဖွဲ့များ၊ စစ်ကောင်စီ လက်အောက်ခံ ပြည်သူ့စစ်တပ်ဖွဲ့များ နှင့် တိုင်းရင်းသားလက်နက်ကိုင်တပ်ဖွဲ့များ လှုပ်ရှားသည့် နယ်မြေဖြစ်သည်။
#SHANBurmese
#Shannews
#သျှမ်းသံတော်ဆင့် #မန့်ဟီးရိုး #ရွှေလီမြစ်ဝှမ်း
111 views15:22
သ
