ዐሹራእ ! የሙሐረም ወር 10ኛው ቀን እለተ ዐሹራእ በሚል ይታወቃል። ይህ እለት አላህ ነ | 🌺 ለስኬታማ ቤተሰብ 🌺

ዐሹራእ !

የሙሐረም ወር 10ኛው ቀን እለተ ዐሹራእ በሚል ይታወቃል።

ይህ እለት አላህ ነብዩላህ ሙሣንና ተከታይ አማኞችን በመርዳት ትምክህተኛውን ፊርዓውንና ጋሻጃግሬዎቹን ድባቅ የመታበት ቀን ነው።

ታዲያ ይህን እለት መልዕክተኛው ልዩ ትኩረት ይሰጡት ነበር። ለሙሣ ካላቸው ቅርበት አኳያና አላህንም ለማመስገን ፆመውታል እንዲፆምም አመላክተዋል። ነብዩላህ ሙሣም ይፆሙት ነበር።
" فصامه موسى" زاد مسلم في روايته: «شكراً لله تعالى فنحن نصومه»
" ሙሣ አላህን ለማመስገን ፆመውታል ፤ እኛም እንፆመዋለን"
ባልደረቦቻቸውንም አበክረው አነሳስተዋል።
"أنتم أحق بموسى منهم فصوموا"
" ከአይሁዶች ይልቅ እናንተ ለሙሣ የቀረባችሁ ( የተገባችሁ ) በመሆናችሁ ይህን ቀን ፁሙት " ብለዋል።

ዐሹራን በመፆም የሚገኘውንም ታላቅ ምንዳ አውስተዋል።
وقال النبي صلى الله عليه وسلم: «صيام يوم عاشوراء، إني أحتسب على الله أن يكفر السنة التي قبله» (رواه مسلم)
" እለተ ዐሹራእን መፃም አላህ ዘንድ ያለፈውን አንድ ዓመት( ትናንሽ ) ወንጀሎች ያስምራል ብዬ አስባለሁ " በማለት ገልፀዋል።
ታዲያ ይህን እለት አይሁዶችና ነሳራዎችም ክብር ይቸሩት ስለነበር የአላህ መልዕክተኛ በቀጣይ ከ10 ኛው ቀን በተጨማሪ 9ኛውንም ቀን ለመፆም እንዳሰቡ ተናግረዋል።
فقال رسول الله صلى الله عليه وسلم: «فإذا كان العام المقبل إن شاء الله صمنا اليوم التاسع»، قال: فلم يأتِ العام المقبل حتى توفي رسول الله صلى الله عليه وسلم. (رواه مسلم )
" የአላህ ፈቃድ ከሆነ በመጪው ዓመት ዘጠነኛውንም ቀን እንፆማለን " ይሁንና የቀጣዩ ዓመት ግዜ ሳይደርስ የአላህ መልዕክተኛ ወደ ኣኼራ ሄደዋል።