ERKIN VOHIDOV

2022-05-23 12:13:31 БОЛАЛАР

Сизлар - ота,
Биз - бола бу кун,
Биздан - салом, сизлардан алик.
Аммо эриш туюлар нечун
Энди сизга бизнинг болалик.
Сиз ҳам, ахир,бола бўлгансиз,
Кўзингизда порлаган ҳайрат.
Ўйнагансиз, шўхлик қилгансиз,
Қалбингизни қийнаган ғайрат.
Айтинг,
Ё сиз гоҳи-гоҳида
Қоидани бузмаганмисиз?
Тирмашиб ё ўрик шохига,
Кўк ғўралар узмаганмисиз?
Ўзбошимча номини олиб,
Чўмилмаганмисиз анҳорда?
Ялангоёқ, тўғри йўл қолиб,
Юрмаганмисиз ҳеч деворда?
Сизлар - ота,
Биз - бола бу кун,
Сиздан "ҳай-ҳай", биздан - тўпалон.
Нега сизга ҳар нарса мумкин,
Нега бизга ҳар иш қатағон?
Чиқирлайди деворда соат,
Секундларни қилади ҳисоб.
Сизга унинг борлиги - роҳат,
Бизга унинг сирлиги - азоб.
Магнитафон сизларги керак,
Қўндирмоқни истамаймиз гард.
Бизлар уни очиб кўрмасак,
Дилимиздан тарқамайди дард.
Тошойнага коптокни урса,
Синарми ё синмасми - қизиқ.
Ошпичоқни тупроққа суқса,
Унарми ё унмасми - қизиқ...

(Шеърнинг давомини келтиринг)

Ўзбекистон Қаҳрамони, Ўзбекистон халқ шоири Эркин Воҳидов, 1977 йил. Open / Comment

2022-05-22 18:03:57 МУҲАББАТ БИРЛА...

Муҳаббат бирла чеккан -
Ғурбатинг роҳат билан тенгдур.
Муҳаббатсиз ва лекин
Ишратинг кулфат билан тенгдур.

Унга жону жаҳоним
Бой бериб оламда бойдурман,
Сенинг, эй бемуҳаббат,
Нусратинг ҳасрат билан тенгдур.

Риё аҳлининг алдоқ -
Ҳурматига нафратим бордур,
Сенинг, эй дўст, менга
Нафратинг шафқат билан тенгдур.

Муҳаббат оташини
Ҳеч қачон дўзахга тенг қилмам,
Нечунким, менга нурли -
Талъатинг жаннат билан тенгдур.

Кечиб қўй, ошиқ ўлгач,
Икки олам мулкидан, Эркин,
Муҳаббат ичра барча -
Заҳматинг давлат билан тенгдур.

Ўзбекистон Қаҳрамони, Ўзбекистон халқ шоири Эркин Воҳидов, 1973 йил.


www.facebook.com/evohidov
www.t.me/Erkin_Vohidov
www.erkinvohidov.com Open / Comment

2022-05-22 17:35:04 ЭЗМА ЧОЛЛАР

Йигитлар чарчамас сўзлашиб дилдор,
Дўндиқ аёллардан, хушхаёллардан.
Оловдан қочгандай турфа жонивор
Юлқиниб қочамиз эзма чоллардан.

Аммо тақдир бизга осмайди қулоқ,
Рўбарў қилади нохуш ҳолларга.
Бизни жононларга учратиб камроқ,
Кўпроқ дучор этар эзма чолларга.

Гарчи ҳаёт бизни яратган бардам,
Бизга ато қилган мустаҳкам оёқ,
Инқиллаб юргувчи эзма чоллардан
Баъзида қочолмай қоламиз бироқ.

Ҳар бирининг битта гина, ёзғири,
Ҳар бирининг битмас бир достони бор.
Ана, оқсоқланиб келмоқда бири,
Қоч, тили тагида палахмони бор.

Улар овчи, бизлар қуёнмиз фақат,
Билмасдан қоламиз тутилганимиз.
Гоҳида биз учун чексиз саодат
Насиҳатдан омон қолганимиз.

Лекин биз билмаймиз, чоллардаги феъл,
Асли бу оламнинг адолатидир.
Қочиб юрмоғимиз бизларнинг бу хил
Камоли нодонлик аломатидир.

Билмаймизки, чоллар олам ҳикматин
Қолдириб кетсинлар дея табиат -
Олса ҳам кўздан нур, белдан қудратни,
Улар забонини қилган бақувват.

Билмаймиз, бизга энг мустаҳкам асо -
Асо ушлаган шу қомати доллар.
Бизга насиб бўлган бойликлар аро
Энг бебаҳо бойлик - шу эзма чоллар.

Уларнинг ҳар бири бир дорилфунун,
Тирик тарихимиз, ҳаёт дарсимиз.
Бахтлимиз, келажак олдида бир кун
Узолсак улардан олган қарзимиз.

Майлига, ҳар қанча қиссаси маҳзун,
Майли, эзмалиги ўтса жонлардан.
Бу дунё мукаммал бўлмоғи учун
Бизни айирмасин эзма чоллардан.

Ўзбекистон Қаҳрамони, Ўзбекистон халқ шоири Эркин Воҳидов, 1983 йил.


www.facebook.com/evohidov
www.t.me/Erkin_Vohidov
www.erkinvohidov.com Open / Comment

2022-05-22 16:10:25 БИР ТАВАККАЛЧИ ДЕЙДИ-КИ...

Менга на суду савдо,
Бор, нима бўлса бўлсин.
Мендан қолувчи дунё,
Бор, нима бўлса бўлсин.
Бир бор берилган олам,
Бир бор яшайдир одам,
Ғанимат айшу ялло,
Бор, нима бўлса бўлсин.
Мендан кетарми кетса,
Менга келарми келса,
Куйдирма жонни асло,
Бор, нима бўлса бўлсин.
Кўнглим саҳога мойил,
Ҳотамлигимга қойил,
Чекдим таваккал имзо,
Бор, нима бўлса бўлсин.
Сармаст эрур хаёлим,
Ҳам файласуфман, олим,
Бир ғоя менда танҳо:
"Бор, нима бўлса бўлсин".

Ўзбекистон Қаҳрамони, Ўзбекистон халқ шоири Эркин Воҳидов, 1983 йил.


www.facebook.com/evohidov
www.t.me/Erkin_Vohidov
www.erkinvohidov.com Open / Comment

2022-05-20 06:23:56 Не илож, биздамас ихтиёр, бироқ
Нур ва соялардан баҳс қилмоқ абас.
Қўшиб бир кафт ҳасад ва кафт нифоқ,
Одамзод лойини қорган биз эмас.

Биз эмас,бу дунё яралган вақтда
Ғишт қўйган вафосиз, бемеҳр, ёлғон.
Хиёнат зарби у - бизнинг луғатда,
Сизнинг тилда эса - салбий ҳаяжон.

Ғийбатдир, бўҳтондир, шубҳадир, киндир,
Балоким, қўл силтаб кетмоқ муаммо.
Инфарктдан югуриб қочмоқ мумкиндир,
Ўзимиздан қайга қочурмиз аммо?

Ўзбекистон Қаҳрамони, Ўзбекистон халқ шоири Эркин Воҳидов, "Салбий ҳаяжон'' шеъридан, 1982 йил.


www.facebook.com/evohidov
www.t.me/Erkin_Vohidov
www.erkinvohidov.com Open / Comment

2022-05-19 10:06:12 ГЎР УСТИДА БИР ИТ ИНГРАР ЗОР...

Қабристонда кеча ёққан қор
Милдир-милдир эриб ётибди.
Гўр устида бир ит инграб зор,
Лойга бағрин бериб ётибди.

Кеча тобут кўтарилган дам
У беором югурган-елган.
Қувсалар ҳам, тош отсалар ҳам
Эл ортидан мозорга келган.

Отасидан айрилса агар
Бунча куймас одам боласи.
Ёлғон эди кеча йиғилар,
Рост эди шу итнинг ноласи.

Совуқ тунда қотиб, дийдираб,
Қабрга у қўйиб ётди бош.
Эриган қор каби милдираб
Кўзларидан тинмай оқди ёш…

Биз инсонмиз, соҳиби дунё,
Қудратлимиз, мағрурмиз, тўқмиз.
Садоқатда, меҳрда аммо
Шу бечора бир итча йўқмиз...

Ўзбекистон Қаҳрамони, Ўзбекистон халқ шоири Эркин Воҳидов.


www.facebook.com/evohidov
www.t.me/Erkin_Vohidov
www.erkinvohidov.com Open / Comment

2022-05-19 07:07:41 РИЗҚИНГНИ ҲАЛОЛ ЭТГИЛ

Умрингни давом айлаб
Уқбони хаёл этгил,
Ақлингга калом айлаб
Кўнглингга савол этгил.
Ғайратинг мудом айлаб
Ғафлатни завол этгил,
Уйқуни ҳаром айлаб
Ризқингни ҳалол этгил.

Ўзбекистон Қаҳрамони, Ўзбекистон халқ шоири Эркин Воҳидов, 2003 йил.


www.facebook.com/evohidov
www.t.me/Erkin_Vohidov
www.erkinvohidov.com Open / Comment

2022-05-18 10:56:45 Тинглайман кўп ўзбек сўзларин,
Хоразмча талаффузини.
Хуш кўраман у ер қизларин,
"Қўйсангиз-а" деган сўзини.
Улар буни айтса мулойим,
Тилларидан асал тўкилар...
Хоразмлик қизларни доим
"Қўйсангиз-а" дегизгим келар.

Ўзбекистон Қаҳрамони, Ўзбекистон халқ шоири Эркин Воҳидов, 1957 йил.


www.facebook.com/evohidov
www.t.me/Erkin_Vohidov
www.erkinvohidov.com Open / Comment

2022-05-18 10:44:51 Ўлмас эди балки одамзод...

Ўлмас эди балки одамзод,
Бўлар эди дунёга устун.
Ақли бўлса жаҳлидан зиёд,
Сабри бўлса нафсидан устун.

Ажал дея аталувчи чоҳ –
Ичра зинҳор тушмасди одам,
Бўлса эди озгина огоҳ,
Ўйлабгина қўйсайди қадам.

Иш ўлдирмас, ишкал ўлдирар,
Жон заволи юз ёшмас, кўз ёш,
Инсон нега дунёдан кетар
Қувлаб унга отмасалар тош?!

Таҳқир заҳру ханжар ила тенг,
Туҳмат ортиқ ўқдан ва дордан.
Инсон ўлмас бири бирининг
Ўлишига бермаса ёрдам.

Инсон ўлмас ўлдирмаса ғам,
Макон қилмас қаро турбатни
Кўрса агар тиригида ҳам
Ўлганида топган ҳурматни.

Олам тўла фитна, адоват,
Мангу қолиб нетар одамзод?
Бир кун чарчаб, излаб фароғат
Тинч дунёга кетар одамзод

Ўзбекистон Қаҳрамони, Ўзбекистон халқ шоири Эркин Воҳидов


www.facebook.com/evohidov
www.t.me/Erkin_Vohidov
www.erkinvohidov.com Open / Comment

2022-05-17 14:29:44 Ёлғонни дўндиринг, қайнангу, жўшинг,
Лекин икки оғиз рост гап ҳам қўшинг.
Шунда сиз тайёрлаб узатган шарбат
Ҳам арзон бўлади, ҳам жонга лаззат.

Савлат тўкиб шунда эл кўрки ёшлар,
Шу эшик олдида йиғила бошлар.
Сиз тутган ажойиб неъматдан тотур,
Ҳар ким ўз қалбига керагин топур.

Барча қулоқ тутиб, кўз қадайдур жим,
Бу даргоҳдан қуруқ қайтмайдур ҳеч ким.
Кулар, кўз ёш тўкар қалби гўдаклар,
Томошадан узмас ҳайрат кўзини.

Кимки тутиб олган бўлса ўзини,
Унга асар қилмас турфа эртаклар.
Лекин қадам қўйган ҳаётга илк бор,
Барин англар, қилар ташаккур изҳор.

Иоганн Вольфганг Гёте, "Фауст"дан парча.

Ўзбекистон Қаҳрамони, Ўзбекистон халқ шоири Эркин Воҳидов таржимаси.


www.facebook.com/evohidov
www.t.me/Erkin_Vohidov
www.erkinvohidov.com Open / Comment