ERKIN VOHIDOV

2022-06-07 07:52:04 ДИАГНОЗ

(Қишлоқ докторининг айтганлари)

Ҳамма билар:
Тиббий илмда
Овропадан анча йироқмиз.
Ҳамма бало, менинг наздимда,
Диагноз қўйишга нўноқмиз.

Дейлик,
Бемор бошида оғриқ,
Бу - чарчоқдан.
Ким дер: дам олгин?
Юборамиз, текширмай ортиқ,
Думбасидан тўртта анальгин.
Касал кўриб,
Айтамиз - бўйрак!
Нақд Луқмоннинг ўзи сингари.
Ўлигини сўнг ёриб кўрсак,
Илма-тешик чиқар жигари.
Э, жигарнинг иши кўп нозик,
Қишлоқда йўқ, асли, соғ одам,.
Дейлик,
Тўғри диагноз қўйдик,
Тепки еймиз райком тоғадан.

"Сиёсий онг қани?,- дейди у,
Деҳқон соғлом!
Деҳқон - чавандоз!
Далада йўқ заҳарли дори,
Диагнозни шамоллаш деб ёз!
Сариқ касал кўпми? Камайтир,
Чорани мен айтмай ўзинг топ.
Мен эмас, сен докторсан, ахир,
Ўқиш керак газет ва китоб".
Не ёзилган анави шиорда?
"Пахтазор - бу жанггоҳ", бўлсин
Жанггоҳ бўлгач, қурбон ҳам бор-да
Бор зотилжам, заҳарланиш, бод...

Шундоқ.
Бизлар тиббий илмда,
Овропадан анча йироқмиз.
Ҳамма бало менинг наздимда,
Диагноз қўйишга нўноқмиз.
Ҳолимиз шу,
Не узримиз бор?
Бизнинг хато завол деган сўз.
Аслида-ку жамият бемор,
Кимлар қўяр унга диагноз?
Уни даво қилгувчи кимлар?
Не савдолар бордир бошида -
Биз сингари ношуд ҳакимлар,
Зўр тоғалар турса қошида.
Келажакнинг жарроҳи бир кун
Айтмасин-да, ўтиб замонлар:
- Бу юрт дарди бошқа эди-ку,
Ҳайф сизларга, жоҳил луқмонлар!

Ўзбекистон Қаҳрамони, Ўзбекистон халқ шоири Эркин Воҳидов, 1988 йил.


www.facebook.com/evohidov
www.t.me/Erkin_Vohidov
www.erkinvohidov.com Open / Comment

2022-06-07 07:48:44 БИР БУРДА НОН

Мўйсафид йўл узра бир бурда нонни
Тупроқ орасида кўрдию ногоҳ,
Аста қўлга олди, ўпди, бу онни
"Шиқ" этиб суратга туширди сайёҳ.

Бир куни бу сурат олис маконда,
Рўзномалар аро бўлди намоён.
Ёздилар: шўрлик халқ Ўзбекистонда
Мана шундай яшар зору нотавон.

Ким рад этар сурат далолатини,
Ишонмай, не қилсин бехабар олам?
Ўзбек деб аталган халқ одатини
Қаёқдан ҳам билсин бехабар одам?

Қаёқдан ҳам билсин ғофил одамлар,
Бир бурда нон учун энгашган шу чол,
Кеча ош берганин етти пуд дамлаб
Етмишга етгани учун безавол?

Бу шеърдан мақсадим раддия эмас,
Юртим жаҳон билган Ўзбекистондир.
Дастурхони олам қилгудек ҳавас,
Лекин нон қадри ҳам унга аёндир.

Мен ўша йилларни эслайман ҳамон,
Эслаб юрагимга чўкади музлар.
Ўртада бир бўлак қора кепак нон,
Очликдан ичига ўтирган кўзлар...

Шукрким, у кунлар олисда қолди,
Шукрким, Ватаним маъмур ва обод,
Шукрким, бу юртда менинг авлодим
Муҳтожликни кўрган энг сўнгги авлод.

Олис рўзномалар не ёзсалар ҳам
Майлига ёлғоннинг умри бир кунлик.
Оч, юпун элларга биз ҳамкор, ҳамдам,
Чунки бизга аён очлик, юпунлик.

Биз йўқсил бўлганмиз, йўқсил бу жаҳон,
Заҳматини тортиб бораётирмиз.
Эҳсонлар юкини бамисли карвон,
Елкамизга ортиб бораётирмиз.

Нажот юлдузи деб олам шу боис,
Кўз тикар толебахш бизнинг юлдузга.
Ердан ушоқ топсак биз ҳам шу боис,
Эъзозлаб ўпамиз, суртамиз кўзга.

Ўзбекистон Қаҳрамони, Ўзбекистон халқ шоири Эркин Воҳидов, 1979 йил.


www.facebook.com/evohidov
www.t.me/Erkin_Vohidov
www.erkinvohidov.com Open / Comment

2022-06-06 10:28:24 А. С. ПУШКИН

ҲОФИЗДАН

Жанг шавқини дилда уйғотма,
Ёнма, йигит, зафар, шон билан.
Қонли ҳарбга ўзингни отма
Карабахлик оломон билан.

Балки сени ўлдирмас қотил,
Майдон аро, қиличлар аро.
Барнолигинг кўрган Азроил
Юбормагай бемаҳал қазо.

Бир нарсадан қўрқаман фақат:
Ошно бўлиб жангда бебоклик,
Сенда қолмас дилбар назокат,
Бу майинлик, гўзаллик, поклик.

Ўзбекистон Қаҳрамони, Ўзбекистон халқ шоири Эркин Воҳидов таржимаси.


www.facebook.com/evohidov
www.t.me/Erkin_Vohidov
www.erkinvohidov.com Open / Comment

2022-06-06 10:27:08 А. С. ПУШКИН

СЕН ВА СИЗ

Ҳавойи Сиз ўрнига янглиш
Қиз ногаҳон Сен дея айтди.
Шу дилбар сўз кўнглимда ёниш,
Ўйларимда орзу уйғотди.

Термуламан сўз дерга ожиз,
Сеҳри тамом ром этган мени.
Сиртди дейман: қандай яхшисиз,
Қалбда эса: севаман сени.

Ўзбекистон Қаҳрамони, Ўзбекистон халқ шоири Эркин Воҳидов таржимаси.


www.facebook.com/evohidov
www.t.me/Erkin_Vohidov
www.erkinvohidov.com Open / Comment

2022-06-06 08:48:45 6 июнь - буюк рус шоири Александр Пушкин таваллуд топган кун.

ПУШКИН

Мен илк бор мактабга қўйганда қадам,
Илк бор алифбодан олганда таълим,
Менга олам аро юз очган олам
Пушкин даҳосига қилурман таъзим.

Ҳали мен англамай Алишерни ҳам,
Гёте руҳи ҳали бўлмасдан ҳоким,
Хаёлим бешигин тебратган онам -
Пушкин даҳосига қилурман таъзим.

Улғайдим, кенгайди уфқи ҳаётнинг,
Дунё кўркин очди улуғвор, азим.
Кўзларимга қилган кенг оламни кенг
Пушкин даҳосига қилурман таъзим.

Мурғак дилга тушиб шеърнинг ҳаваси
Баён этганимда илк кўнгил арзим -
Менга мадад бўлган оташ нафаси -
Пушкин даҳосига қилурман таъзим.

Ҳали йўлим олис, ҳаёт ҳали бор,
Ҳали бу дунёдан кўп менинг қарзим.
То тирик эканман такрор ва такрор
Пушкин даҳосига қилурман таъзим.

Шоир бўлсам бир кун элга муносиб,
Мени - шоирим, деб атаса халқим,
Навоий девонин кўксимга босиб,
Пушкин даҳосига қилурман таъзим.

Ўзбекистон Қаҳрамони, Ўзбекистон халқ шоири Эркин Воҳидов, 1974 йил.


www.facebook.com/evohidov
www.t.me/Erkin_Vohidov Open / Comment

2022-06-03 14:36:34 ​​​​USTOZ ERKIN VOHIDOV G‘AZALIGA MUXAMMAS

Bu chin izhor, bu chin iqror: seningdirman, seningdirman,
Bo'lay sobit va yo sayyor, seningdirman, seningdirman,
Magar sog'man va gar bemor, seningdirman, seningdirman,
Vatan, to tanda jonim bor, seningdirman, seningdirman,
Tanim xok o'lsa ham sen yor, seningdirman, seningdirman.

Raqib tegsa hamiyatga dilimni qo'zg'agan orsan,
Yigitlik sozida baravj vafoni kuylagan torsan,
Ajab ruhiy safo mavjud, vujudim ichraki yorsan,
Jahon kengdir, falak kengdir, yurak kengdir chu sen borsan,
Seningsiz ikki dunyo tor, seningdirman, seningdirman.

Agar xosman – senga mosman, senga xoslik ulug' ne'mat,
Teray rizqimni kiprik-la quchog'ingda qilib g'ayrat,
Sening ishqingki beta'ma, sening mehringki beminnat –
Menga begona ellarda nasib gar o'lsa yuz rohat,
Chekay bag'ringda ming ozor, seningdirman, seningdirman.

Qadimdan bu qadim g'ozdir: meningdirsan, meningdirsan,
Boshim mag'rur, sarafrozdir, meningdirsan, meningdirsan,
So'zim darding-la mumtozdir, meningdirsan, meningdirsan,
Agar shodliklaring ozdir, meningdirsan, meningdirsan,
Magarkim g'amlarim bisyor, seningdirman, seningdirman.

Senga manzur bitik bitsam salaflardin bo'lak, ayru,
Shudur oliy menga matlab, biroq undan buyuk orzu –
Sadaf bag'rida dur yanglig' nihon tutgan duoim bu –
Bugun bor, erta yo'q jismim, vale ruhim uchun mangu
Sening manguliging darkor, seningdirman, seningdirman.

Abad jisminga mos isming qolur jon toqida zarnaqsh,
Senga Rustam bu taxmisni umid birlan etibdur baxsh,
Sharaf – dil ko'ziga garding surishkim to'tiyo aylash,
Sening ishqing bilan yondim, ketar jonimda bu otash,
Seningdirman, yana takror, seningdirman, seningdirman.

2018-yil

​​Joriy yil 30-may kuni O'zbekiston xalq shoiri, Qahramoni ustoz Erkin Vohidov xotirasiga bag'ishlangan Adabiy tur doirasida poytaxtimiz "Magic city" bog'ining yozgi amfiteatridan esdalik.

Rustam Mirvohid

@Rustam_MIRVOKHID Open / Comment

2022-06-02 08:31:46 Иқтидорли актёр Муҳаммадазиз Дилмуродов ижро этган ушбу мисралар ардоқли шоиримиз Эркин Воҳидовнинг қайси асаридан олинган?

Режиссёр: Нурмуҳаммад Иброҳимжонов


www.facebook.com/evohidov
www.t.me/Erkin_Vohidov
www.erkinvohidov.com Open / Comment

2022-06-01 13:19:30 https://telegra.ph/ЎZBEGIMNING-FIDOJI-SHOIRI-FAITHFUL-POET-OF-UZBEK-PEOPLE-05-31 Open / Comment

2022-06-01 12:34:21 #Хотира

РАҲИМЖОН ШОДИЕВ: Эркин ака сингари камтарин, одамшинаванда, қўлидан келадиган ёрдамни аямайдиган инсонни учратиш қийин.
1977 йилнинг июнь ойида бизнинг уйимизга - ўша пайтдаги туман мухбирини уйига Миртемир домла, Акмал Пўлат, Салимжон Маҳкамов билан ташрифларини ҳеч унутмайман. Афсуски, ўшанда меҳмонларни тасвирга олиш имконим бўлмаганди. Биргина шу сурат газета фотографи томонидан қишлоқ аҳолиси билан учрашувимиз жараёнида олинган экан.


www.facebook.com/evohidov
www.t.me/Erkin_Vohidov
www.erkinvohidov.com Open / Comment

2022-06-01 00:18:56 1 ИЮНЬ - БОЛАЛАРНИ ҲИМОЯ ҚИЛИШ ХАЛҚАРО КУНИ

ҚИЗАЛОҚ

(Синглим ФЕРУЗАга)

Кўғирчокдан бир зум нари кетмасдан
Эркалар, бағрига босар қизалоқ.
Ҳаёт нима — ҳали идрок этмасдан,
Гўдаклигига ҳам ақли етмасдан,
Она бўламан деб ўсар кизалоқ.

Таажжуб, ким солмиш унинг кўнглига,
Кирмоқ кайда ҳали ҳаёт йўлига,
Она алласига қонмасдан ҳали,
Эртага шу уйга бека бўлгали
Супурги тутади жажжи қўлига.

Ҳалитдан оналик меҳр-шафқатин
Дилингга солдингми, эрка қизалоқ?
Татиб кўрмай ҳали ҳаёт заҳматин,
Мушфиқ оналикнинг бор машаққатин
Бўйнингга олдингми, эрка қизалоқ?

Гулзор яшагандек ғунча қатида,
Томчида қуёшнинг жамолин кўрдим.
Ўйласам, ўй битмас ҳаёт ҳақида,
Шу жажжи қизалоқ табиатида
Табиатнинг буюк камолин кўрдим.

Ўзбекистон Қаҳрамони, Ўзбекистон халқ шоири Эркин Воҳидов, 1961 йил.


www.facebook.com/evohidov
www.t.me/Erkin_Vohidov
www.erkinvohidov.com Open / Comment