ERKIN VOHIDOV

2022-06-16 05:46:23 Ўзбекистон қаҳрамони, халқ шоири Эркин Воҳидовнинг шоир Абдулла Ориповнинг "Арслон чорлаганди..." шеърига жавоб шеъри...

Эркин Воҳидов Open / Comment

2022-06-16 05:46:23 Абдулла Орипов

АРСЛОН ЧОРЛАГАНДИ...

(Эркин Вохидовга)

Биз ҳам юксакларга тиккандик кўзни,
Бизда ҳам бор эди матонат, бардош.
Арслон чорлаганди қошига бизни,
Лекин қумурсқалар бўлди сафардош.

Жами тирикликка таниш бу хатар,
Қумурсқа яралган ёппа таларга.
Дўстим, алам қилар, арслон бехабар,
Ем бўлиб кетсак шу қумурсқаларга.

1982

Абдулла Орипов

@abdullaorifijodi Open / Comment

2022-06-15 18:50:25 https://ziyouz.uz/suhbatlar/erkin-vohidov-insonni-pul-mol-dunyo-emas-notogri-tarbiya-haqsizlik-buzadi-1989/ Open / Comment

2022-06-15 06:16:23 #Рост_ҳикматлар

Бу оламда йўқотишлар ичидаги энг оғир йўқотиш инсоннинг ўзлигини йўқотишидир.

Эркин Воҳидов

Каналга уланиш: https://t.me/rost_24uz Open / Comment

2022-06-14 12:33:27 ТЕМИРТАН ДАҲОЛАР

(Академик Восил Қобуловга)

Бу -
Кибернетика институти,
Сеҳру мўъжизалар мамлакатидир.
Музаффар,
баркамол
тафаккур юрти,
Темиртан даҳолар салтанатидир.

Бу ерда фикрлаш телиги нурдай,
Мана бу -
кўримсиз пўлат жомадон -
Биз бирни иккига қўшиб улгурмай,
Миллиардни миллиардга зарб қилур осон.

Фикрат қутисида
коинот сири,
Буржлар нурланади темир даҳодан.
Ер қаърига шуъла юборса бири,
Тўлқинлар тутади бири фазодан.

Мана бу чамбарак
"Каисса - 9"
"ЧС - 7" билан шахмат суради.
Манов сандиқ эса
уч кундан буён
Бўлажак шаҳарга режа қуради.

Бу рассом,
ўйнатиб нейлон кўзларин,
Суратлар чизади,
рангин, жимжима.
Бу ғўла - таржимон,
чулчут сўзларин
Қайта чулчутчага қилар таржима.

Темиртан даҳолар ишлар шу йўсин,
Шовқин йўқ,
жанжал йўқ -
тўлқин ишора.
Улкан темир тахта -
шифт бўйи устун
Улар меҳнатини қилар идора.

Бу юртда режа бор,
иш бор,
ғайрат бор,
Темирлар ҳордиқ кун қилмаслар талаб.
Душанба бошлари оғримас наҳор,
Кечикиб келмаслар ишга эрталаб.

Бунда тама қилмас
ҳеч ким дўстидан,
Бу юртда бўлмайди фитна, ғийбатлар.
Ҳеч қачон "К-14" "Д-5" устидан
"Б-3" га ёзмайди юмалоқ хатлар.

Темирлар бртида мажлисбозлик йўқ,
Соатлаб маъруза айтмайди ҳеч ким.
Асаблар торини узмас таҳқир - ўқ,
Ҳеч кимса йиқилмас кўксин ушлаб жим.

Ҳар ким ўз қудратин одил баҳолар,
Касбдоши йўлига қўймайди тузоқ.
Чунки улар фақат -
темир даҳолар,
Инсоний даҳодан ҳали кўп узоқ.

Не ажаб, улар ҳам ўрганса бир кун,
Ким билсин,
олимлар балки туймишлар.
Одамзод нафаси тегмасин учун
Уларни шишага солиб қўймишлар.

Темирларга ётдир ўкинч ва кўз ёш,
Дунё можароси
уларга абас.
Бизнинг низоларга бермаслар бардош,
Чунки улар - темир, одамлар эмас.

Ўзбекистон Қаҳрамони, Ўзбекистон халқ шоири Эркин Воҳидов, 1977 йил.


www.facebook.com/evohidov
www.t.me/Erkin_Vohidov
www.erkinvohidov.com Open / Comment

2022-06-14 11:37:50 Сиз менинг осмоним, моҳитобимсиз,
Моҳитобим эмас, офтобимсиз,
Ишончим, қувончим, юпанчим, яна
Соғинчим, ўкинчим, изтиробимсиз.

Сиз менинг қалбимсиз, қалбимдагм шеър,
Битмоқ орзу қилган бош китобимсиз.
Севгим, умрим, яна умрим давоми,
Бахтим, роҳатимсиз ва азобимсиз.

Сиздан шодлик кўриб кўзларимда нур,
Алам чексам майли, шунга ҳам шукур,
Бу дардли дунёда яхшики борсиз,
Борлигингиз учун сизга ташаккур.

Ўзбекистон Қаҳрамони, Ўзбекистон халқ шоири Эркин Воҳидов, 1998 йил.

Эркин Воҳидов ҳаёти ва ижоди ҳақидаги маълумотларни интернет орқали қуйидаги саҳифалардан кузатиб боришингиз мумкин:


www.facebook.com/evohidov
www.t.me/Erkin_Vohidov
www.erkinvohidov.com Open / Comment

2022-06-14 09:14:52 #Архив_материаллари

1992 йил, 14 июнь.

Америкалик миллатдошимиз Орхан Бабақурбан ардоқли шоиримиз Эркин Воҳидов билан интервью қилган эканлар. Open / Comment

2022-06-13 16:48:49 #Саволнома

Ушбу сатрлар ардоқли шоиримиз Эркин Воҳидовнинг қайси шеъридан олинган?


Бу ерда фикрлаш тезлиги нурдай,
Мана бу -
кўримсиз пўлат жомадон -
Бир-бирни иккига қўшиб улгурмай,
Миллиардни миллиардга
зарб қилур осон. Open / Comment

2022-06-13 12:41:59 Дўстларимни ҳайрон қолдирар
Баъзан ишқий шеърлар ёзганим.
Ҳазилкашлар қўймасдан сўрар:
— Куйлаганинг қайси нозанин?

Йўқ дей десам, кулги бўламан,
Алдамоқни ҳеч кўрмайман эп.
Не ҳам дердим, ҳазил қиламан,
Шоир ҳали изланишда, деб...

Эркин Воҳидов

@shomuz - Yo‘limiz bir! Open / Comment

2022-06-11 12:01:53 МАКСИМ ГОРЬКИЙ БИЛАН СУҲБАТ

Вафо қилди андуҳ олами кимга?
Кимга бахш этди у умрлик сафо?
Эй заҳмат соҳиби, болалигимга -
Гўдак аламларинг бўлди ошно.

Бетинч юрагимга дорилфунунда
"Дорилфунунларинг" солганда ғулу,
Мен ҳам ўз диёрим водийларинда
Пиёда кезмоқни қилганман орзу.

Устоз, сен бир инсон умри муқаддам
Хато қилган эдинг, излаб худованд.
Не тонг, даҳоларнинг хатолари ҳам
Майда рост йўллардан юз карра баланд.

Ишондим, дунёга келган кунидан
Башар изламабди бесабаб илоҳ.
Мен бугун қўрқмасман дин афъюнидан,
Худоси йўқлардан қўрқаман бироқ.

Мана, у қаршимда ўлтирар ҳозир,
Қалбида ҳис, кўзда маънаси йўқдир.
Берсанг, бу дунёни ютмоққа қодир,
Чунки юрагида худоси йўқдир.

Шоҳми у, гадоми, кулолми, заргар,
Йўлга солган чоғи шайтон нидоси,
У қайси тафтишдан қўрқадир, агар -
Қўрқмоққа бўлмаса дилда худоси?

Дўзах ўтларининг минг битта шаклин -
Кўрсатиб минг бир хил ёниши билан,
Лол қилмоқ бўлган ким одамзод ақлин,
Бўйла номуборак дониши билан?

Ким у зар қасдида, дунё қасдида
Ваҳшат ханжарини қайраган жаллод?
Муқаддас туйғуси йўқлар дастида
Жонсарак оҳудек бўлмиш одамзод.

Устоз, сен бир инсон умри муқаддам
Хато қилган эдинг излаб худованд.
Не тонг, даҳоларнинг хатолари ҳам
Майда рост йўллардан юз карра баланд.

Мен ҳақ билдим қалбим эътиқодини,
Оламга эзгулик зиёси тўлсин.
Имон денг, виждон денг, майли, отини,
Лекин одамзоднинг худоси бўлсин.

Ўзбекистон Қаҳрамони, Ўзбекистон халқ шоири Эркин Воҳидов, 1967 йил.


www.facebook.com/evohidov
www.t.me/Erkin_Vohidov
www.erkinvohidov.com Open / Comment