2022-05-24 19:47:53
ઢાળ : જનનીની જોડ સખી...
દીઠા દેવોને દીઠા દેવળો રે લોલ
પણ આજે દીઠો મા તારો રાસ જો
આ સતીયું સાતવીસું રમે રાહડે રે લોલ
એના હોઠે છે હેત તણી હાકલું રે લોલ
એના મુખડે મોહન વરતાય જો
આ સતીયું સાતવીસું રમે રાહડે રે લોલ
જાણે રણની વચાળે એક વિરડી રે લોલ
વ્રજ જેવા વમળ સર્જાય જો
આ સતીયું સાતવીસું રમે રાહડે રે લોલ
શ્યામ સોહે વચાળે વ્રજધામમાં રે લોલ
એની ફરતે ફુલવાડીયું અપાર જો
આ સતીયું સાતવીસું રમે રાહડે રે લોલ
ધોમ તડકે શીતળ એક છાંયડી રે લોલ
લઇ લીધો વાલે જ્યાં વિશ્રામ જો
આ સતીયું સાતવીસું રમે રાહડે રે લોલ
માડી ટીંબે ટમટમતી એક તારલી રે લોલ
અમને આપે અદકેરો અજવાસ જો
આ સતીયું સાતવીસું રમે રાહડે રે લોલ
માએ ઝીણી ઝીણી ઝાંઝરીયું પ્હેરીયું રે લોલ
એનો ગગને થયો છે ઘંટનાદ જો
આ સતીયું સાતવીસું રમે રાહડે રે લોલ
મારી નજરું નિબંધ એનાં રાસની રે લોલ
મારી પાંપણ જાણે કે એનાં પાઠ જો
આ સતીયું સાતવીસું રમે રાહડે રે લોલ
તમે કીધેલ કવિતા મારા કાનની રે લોલ
સાતે વીસું વ્હાલપ કેરા વેદ જો
આ સતીયું સાતવીસું રમે રાહડે રે લોલ
તમે પેટાળ જઈ મા કેમ પોઢીયું રે લોલ
સુનો માવાની મોરલીનો સાદ જો
આ સતીયું સાતવીસું રમે રાહડે રે લોલ
- માવજી એમ આહીર
425 viewsH B Savani, 16:47